තුර්කි මුහුදු සීමාවට ඇතුළුවීම තහනම් කිරීමෙන් දින කිහිපයකට පසු, LGBTQ+ ප්රජාව රැගත් මගී නෞකාවකට ඊජිප්තුවට ඇතුළුවීම ද ප්රතික්ෂේප කර තිබේ. ඇතන්ස් සිට වැනීසිය දක්වා දින 10ක සංචාරයක නිරත වන මෙම නෞකාවට ඇතුළුවීම තුර්කිය විසින් මුලින්ම වළක්වන ලද්දේ, ඔවුන්ගේ සමාජ ව්යුහයට සහ සාරධර්මවලට නොගැලපෙන හැසිරීම් සහිත කණ්ඩායමක් විසින් මෙම නෞකාව වෙන්කරවා ගෙන ඇති බව පවසමිනි.
ඉන් අනතුරුව, ඊජිප්තු බලධාරීන් විසින් ද කිසිදු නිල හේතුවක් ප්රකාශ නොකරමින් නෞකාවට ඇලෙක්සැන්ඩ්රියා වරායට ඇතුළුවීම තහනම් කර ඇත.වර්ජින් වොයේජස් (Virgin Voyages) සමාගමට අයත් ‘ස්කාර්ලට් ලේඩි’ (Scarlet Lady) නැමති මෙම නෞකාවේ මගීන් 2,000ක් පමණ ගමන් කරන අතර, ඒ අතර ප්රවීණ බ්රෝඩ්වේ රංගන ශිල්පිනියක වන 77 හැවිරිදි පැටි ලුපෝන් (Patti LuPone) ද වෙයි. නෞකාවට ඊජිප්තු මුහුදු සීමාවට ඇතුළුවීමට අවසර නොලැබුණු බවත්, ඒ වෙනුවට විකල්ප වරායන් වෙත ගමන් කිරීමට සිදුවන බවත් දන්වමින් මගීන් අවදි වීමට පෙර ඔවුන්ගේ කුටි වෙත ලිපියක් යොමු කර තිබුණි. මෙම සංචාරය සංවිධානය කළ ඇට්ලන්ටිස් ඉවෙන්ට්ස් (Atlantis Events) ආයතනයේ ප්රධානී රිච් කැම්බල් මගීන්ට ප්රකාශ කර සිටියේ, පසුගිය වසරේදී ද කිසිදු බාධාවකින් තොරව මෙවැනිම ගමනක් සාර්ථකව නිම කළ බැවින් මෙම හදිසි තීරණය පිළිබඳව තමන් පුදුමයට පත්වන බවයි.
තුර්කිය විසින් ගනු ලැබූ මෙම තීරණය පිළිබඳව අදහස් දක්වමින් කැම්බල් CNN පුවත් සේවයට පවසා තිබුණේ, මෙය සමලිංගික කණ්ඩායමක් වීම මෙම තහනමට එකම හේතුව බවයි. පසුගිය වසර 25 පුරාවට කිසිදු ගැටලුවකින් තොරව 13 වතාවක් තම ආයතනය තුර්කිය වෙත මෙවැනි සංචාර සංවිධානය කර ඇති බව ද ඔහු සඳහන් කළේය. මෙම තහනම ඉවත් කරගැනීම සඳහා තුර්කියේ එක්සත් ජනපද තානාපති කාර්යාලය හරහා ගත් උත්සාහයන් ද අසාර්ථක වී තිබේ. කෙසේ වෙතත්, නෞකාව මේ වන විට සිය ගමන් මාර්ගය වෙනස් කර ඇති අතර, එය ග්රීසියේ ක්රීට් දූපතේ චානියා වෙත සහ ඉරිදා දිනයේ මොන්ටිනිග්රෝ වෙත සේන්දු වීමට නියමිතව ඇත.
මෙම සිදුවීම සම්බන්ධයෙන් නෞකාවේ ගමන් කරන මගීන් සිය කනස්සල්ල මෙන්ම නොසැලෙන බව ද ප්රකාශ කර තිබේ. රංගන ශිල්පිනී පැටි ලුපෝන් සිය ඉන්ස්ටග්රෑම් ගිණුමේ සටහනක් තබමින්, මෙම තීරණය සම්බන්ධයෙන් තමන් දැඩි කෝපයට පත්ව සිටියද, නෞකාවේ සිටින අපූරු මිනිසුන් වෙනුවෙන් සිය රංගනයන් ඉදිරිපත් කිරීමට සූදානම් බව පවසා ඇත. එසේම තවත් මගියෙකු වන රැන්ඩි ස්ලෝවසෙක් සිය බ්ලොග් අඩවියේ සටහන් කර ඇත්තේ, ඔවුන්ට තම සංචාරක ව්යාපාරය අවශ්ය නොවේ නම්, තමන් වෙනත් ස්ථානයක සිය කාලය සහ මුදල් වැය කරමින් සතුටු වීමට සූදානම් බවයි.