උතුරු කොරියාව න්යෂ්ටික අවිවලින් තොර කලාපයක් බවට පත් කිරීම සඳහා ඇමෙරිකා එක්සත් ජනපදය දරන උත්සාහය කාලයට නොගැලපෙන සිහිනයක් බව උතුරු කොරියානු නායක කිම් ජොන් උන්ගේ බලවත් සොහොයුරිය වන කිම් යෝ ජොන්ග් පවසයි. ඇමෙරිකාව ප්රමුඛ තර්ජන හමුවේ උතුරු කොරියාව සිය න්යෂ්ටික අවි ගබඩාව අඛණ්ඩව පුළුල් කරන බව ද ඇය ඉරිදා ප්රකාශ කළාය.
මෙම ප්රකාශය නිකුත් කරනු ලැබුවේ චීන ජනාධිපති ෂී ජින්පිං උතුරු කොරියාවේ සංචාරයක නිරත වීමට දිනකට පෙර වීම විශේෂත්වයකි. මෙය වසර හතකට පසු චීන ජනාධිපතිවරයා උතුරු කොරියාවේ සිදුකරන පළමු සංචාරය වන අතර, 2026 වසරේ ඔහුගේ ප්රථම විදෙස් සංචාරය ද වේ.
ඇමෙරිකා එක්සත් ජනපදයේ ඒකපාර්ශ්වික වාගාලාප මගින් උතුරු කොරියාවේ න්යෂ්ටික බලය හෑල්ලුවට ලක් කළ නොහැකි බවත්, එයට කිසිදු නෛතික බලපෑමක් නොමැති බවත් කිම් යෝ ජොන්ග් අවධාරණය කළාය. පසුගිය මාසයේ බීජිං හි පැවති සමුළුවේදී ඇමෙරිකානු ජනාධිපති ඩොනල්ඩ් ට්රම්ප් සහ චීන ජනාධිපති ෂී ජින්පිං විසින් උතුරු කොරියාව න්යෂ්ටික අවිහරණය කිරීමේ පොදු අරමුණක් තහවුරු කළ බවට ඇමෙරිකාව කළ නිවේදනය ඇය මුළුමනින්ම ප්රතික්ෂේප කළේ එය අසත්ය තොරතුරක් බව පවසමිනි. සමහර ඇමෙරිකානු නිලධාරීන් තවමත් සිය යථාර්ථවාදී නොවන සිහිනවලින් අවදි වී නොමැති බව ද ඇය වැඩිදුරටත් ප්රකාශ කළාය.
2019 වසරේදී ට්රම්ප් සමඟ පැවති රාජ්යතාන්ත්රික සාකච්ඡා බිඳ වැටීමෙන් පසු, උතුරු කොරියාව සිය න්යෂ්ටික අවි ශක්යතාව වේගයෙන් වර්ධනය කරමින් සිටී. පසුගිය සතියේ නව න්යෂ්ටික ද්රව්ය නිෂ්පාදන කම්හලක නිරීක්ෂණ චාරිකාවකට එක්වෙමින් උතුරු කොරියානු නායක කිම් පවසා සිටියේ තම න්යෂ්ටික බලය ඝාතීය වේගයකින් වර්ධනය කරන බවයි. එමෙන්ම පස් අවුරුදු සැලැස්මක් යටතේ මිසයිල නිෂ්පාදන ධාරිතාව දෙගුණහමාරකින් වැඩි කරන ලෙස ද ඔහු ඉල්ලා ඇත. තමන්ගේ සහ තම රටේ ආරක්ෂාව වෙනුවෙන් ක්රියාත්මක කරන මෙම න්යෂ්ටික වැඩපිළිවෙළ කොන්දේසි විරහිතව ක්රියාත්මක කළ යුතු ආපසු හැරවිය නොහැකි අවසන් තීරණයක් බව කිම් යෝ ජොන්ග් වැඩිදුරටත් පෙන්වා දුන්නාය. එසේම ඇමෙරිකාව සහ දකුණු කොරියාව අඛණ්ඩව ආයුධ ගොඩනැගීමේ නිරත වන බවට ද ඇය චෝදනා කළාය.
විශේෂඥයින්ගේ මතය වන්නේ ජාත්යන්තර සම්බාධක ඉවත් කර ගැනීම සඳහා න්යෂ්ටික රාජ්යයක් ලෙස ලෝකයේ පිළිගැනීමක් ලබාගැනීමට උතුරු කොරියානු නායකයා උත්සාහ කරන බවයි. මෑත කාලයේ රුසියාව වෙත යොමුව තිබූ චීනයේ අවධානය සහ බලපෑම යළි උතුරු කොරියාව තුළ තහවුරු කිරීම චීන ජනාධිපතිවරයාගේ මෙම සංචාරයේ ප්රධාන අරමුණක් බව විශ්ලේෂකයෝ පවසති. ඔහු න්යෂ්ටික අවිහරණය ගැන සෘජුවම කතා නොකර ආර්ථික ආධාර ලබා දීමට ඉඩ ඇති බවට ද ඔවුන් අනුමාන කරයි. මීට අමතරව, යුක්රේනයට එරෙහි යුද්ධය සඳහා උතුරු කොරියාව රුසියාවට හමුදාව සහ සම්ප්රදායික අවි යවා ඇති අතර, ඒ වෙනුවට රුසියාවෙන් ආර්ථික හා වෙනත් ආධාර ලබාගෙන ඇති බව දකුණු කොරියානු සහ ඇමෙරිකානු නිලධාරීහු තහවුරු කරති.
