මීගොඩ, හයිලෙවල් මාර්ගයේ පැවති රොටී දන්සැලක් අසල රැඳී සිටි පිරිසක් වෙත ඊයේ (31) මධ්යම රාත්රියට ආසන්නයේදී කැබ් රථයක් කඩා වැදීමෙන් පුද්ගලයින් හය දෙනෙකු ජීවිතක්ෂයට පත්වී තවත් හත් දෙනෙකු බරපතළ තුවාල ලබා තිබේ. බීමත් රියදුරෙකු විසින් පදවන ලද මෙම කැබ් රථය පිරිස යටකරමින් ධාවනය කර ඇති අතර, මෙම ඛේදවාචකය සිදුව ඇත්තේ රාත්රී 11.57 ට පමණ බව වාර්තා වේ.
මෙම අවාසනාවන්ත සිදුවීමට මුහුණ දුන් පිරිස වෙසක් සිරි නැරඹීම සඳහා පැමිණි අය වන අතර, ඔවුන් දන්සල අසල දිගු වේලාවක් පෝලිමේ රැඳී සිට ඇත. ඔවුන් දන්සල ආසන්නයටම පැමිණෙන විට රොටී අවසන් වී ඇති බැවින්, ඉතිරිව ඇති පිටිවලින් තවත් රොටී කිහිපයක් සකසා දෙන තෙක් මඳ වේලාවක් රැඳී සිටින ලෙස සංවිධායකයින් ඔවුන්ට දැනුම් දී තිබේ. මෙම අනතුර සිදුව ඇත්තේ ඔවුන් එලෙස දන්සල අසල රැඳී සිටිමින් සිටි අවස්ථාවේදීය.
අනතුර සිදු කළ රියදුරා පිළියන්දල ප්රදේශයේ පදිංචි ගරාජ් සේවකයෙකු බව මූලික පොලිස් විමර්ශනවලදී අනාවරණය වී ඇත. ඔහු බීමතින් රිය පදවා මෙම අනතුර සිදුකර ඇති අතර, අනතුරින් පසුව වාහනය නොනවත්වා ධාවනය කර එය අතරමඟ දමා පළාගොස් තිබේ. කෙසේ වෙතත්, දැඩි පරිශ්රමයකින් අනතුරුව සැකකාර රියදුරා අත්අඩංගුවට ගැනීමට පොලීසිය සමත් වී ඇත. රථවාහන පාලන හා මාර්ග ආරක්ෂාව භාර නියෝජ්ය පොලිස්පති ඩබ්.පී.ජේ. සේනාධීර මහතා අද (01) පැවති මාධ්ය හමුවකදී තහවුරු කළේ, මෙම රියදුරාට වලංගු රියදුරු බලපත්රයක් නොමැති බවත්, කැබ් රථයේ ආදායම් බලපත්රය ඇතුළු ලියකියවිලි ද කල් ඉකුත් වී ඇති බවත්ය.
මෙම සිදුවීම සම්බන්ධයෙන් අත්අඩංගුවට ගත් රියදුරා වෛද්ය පරීක්ෂණයකට භාජනය කිරීමෙන් පසු අද (01) අධිකරණයට ඉදිරිපත් කිරීමට නියමිතය. ඔහු බීමතින් රිය පදවා පුද්ගලයින් යටකර පළාගොස් ඇති බැවින්, ඔහුට එරෙහිව මිනීමැරුම් චෝදනා ඇතුළුව අපරාධ නීතිය යටතේ ගොනු කළ හැකි උපරිම චෝදනා ඉදිරිපත් කිරීමට පොලීසියේ අවධානය යොමුව ඇති බව නියෝජ්ය පොලිස්පතිවරයා අවධාරණය කළේය. තවද, අනතුර සිදුවන අවස්ථාවේදී කැබ් රථයේ හිමිකරු ද එහි ගමන් කර ඇති බවත්, ඔහු ද අනතුරින් පසු රථයෙන් බැස පළාගොස් ඇති බැවින් ඔහුට එරෙහිව ද නීතිමය පියවර ගන්නා බවත් පොලීසිය වැඩිදුරටත් ප්රකාශ කර ඇත.
