වත්මන් රජය බිඳ හෙළීමේ කිසිදු අරමුණක් හෝ සූදානමක් තමන්ට නොමැති බව ප්රකට ව්යාපාරික ඩඩ්ලි සිරිසේන මහතා අවධාරණය කරයි. මාධ්ය වෙත අදහස් දක්වමින් ඔහු පෙන්වා දුන්නේ, ආණ්ඩුව වැටෙන තත්ත්වයක් පවතින්නේ නම් තමන් ඇතුළු පිරිස මෙලෙස නිහඬව නොසිටින බවයි.
එසේම වත්මන් රජය පෙරළා දැමීමට මේ මොහොතේ කිසිවෙකුටත් හැකියාවක් නොමැති බව ද ඔහු ප්රකාශ කළේය. රජය පෙරළා දමා බලය ලබා ගැනීමට විපක්ෂය කොතරම් උත්සාහ කළ ද, ඉන් පසු රටේ පාලනය භාර ගන්නේ කවුරුන්ද යන්න බරපතළ ගැටලුවක් බව සිරිසේන මහතා වැඩිදුරටත් කියා සිටියේය.මෙහිදී පාර්ලිමේන්තු මන්ත්රී මහාචාර්ය ජී. එල්. පීරිස් මහතා වෙත දැඩි විවේචනයක් එල්ල කළ ඩඩ්ලි සිරිසේන මහතා, මහලු වියට එළඹ නිසි පරිදි ඇවිදීමට පවා අපහසු තත්ත්වයක පසුවන මෙවැනි දේශපාලනඥයින් වහාම දේශපාලනයෙන් සමුගත යුතු බව පැවසීය. වයසට ගිය පසු සියලු දේ අත්හැරීම සාමාන්ය ධර්මතාව වුවත්, ඔවුන් තවදුරටත් බලයේ රැඳී සිටීමට දරන උත්සාහය ඔහු ප්රතික්ෂේප කළේය. ඊළඟ ආත්මභාවය වෙනුවෙන් පින් දහම් කරගනිමින් නිවසට වී තරුණ පරපුරට ආදර්ශයක් වන ලෙස ඔහු මෙවැනි වයස්ගත දේශපාලනඥයන්ගෙන් ඉල්ලීමක් ද කළේය.
ඉදිරි ජනාධිපතිවරණය සඳහා තරග කිරීමේ කිසිදු අභිලාෂයක් හෝ වුවමනාවක් තමන්ට නොමැති බව ද සිරිසේන මහතා මෙහිදී තහවුරු කළේය. සිය සහෝදරයා වන මෛත්රීපාල සිරිසේන මහතා මීට පෙර රටේ විධායක ජනාධිපතිවරයා ලෙස කටයුතු කර ඇති බවත්, එම ධුර කාලය තුළ ඔහු තමන්ට හැකි උපරිමයෙන් රට වෙනුවෙන් සිය වගකීම් ඉටු කර ඇති බවත් ඔහු සිහිපත් කළේය.
ජනාධිපති රනිල් වික්රමසිංහ මහතාගේ ආර්ථික ප්රතිපත්ති සහ විවෘත වෙළෙඳපොළ ක්රියාමාර්ග තමන් අනුමත කරන බව පැවසූ ඩඩ්ලි සිරිසේන මහතා, එහෙත් අතීත සිදුවීමක් සම්බන්ධයෙන් දැඩි චෝදනාවක් ද එල්ල කළේය. තමන් ඇතුළු පිරිස සිය ජීවිත, දේපළ මෙන්ම දරුවන්ගේ අනාගතය ද දැඩි අවදානමකට ලක් කරමින් 2015 වසරේදී දියත් කළ දේශපාලන අරගලය, මාස දෙකක් වැනි කෙටි කාලයක් තුළ රනිල් වික්රමසිංහ මහතා විසින් පාවා දුන් බව ඔහු ප්රකාශ කළේය. එම මහඟු කැපකිරීම් වංචාකරුවන් ආරක්ෂා කිරීමේ අරමුණින් යොදා ගැනීම සම්බන්ධයෙන් තමන් තුළ දැඩි අප්රසාදයක් පවතින බව ද ඔහු වැඩිදුරටත් අවධාරණය කළේය.
