බ්රිතාන්යයේ පළමු සමලිංගික පියා ලෙස සැලකෙන බැරී ඩෲවිට්-බාර්ලෝ (57) සහ ඔහුගේ වත්මන් සහකරු වන ස්කොට් හචින්සන් (32) තවත් ළමා අපයෝජන චෝදනා 18ක් යටතේ යළිත් අධිකරණයට ඉදිරිපත් කර තිබේ. මොවුන් දෙදෙනාට එරෙහිව මීට පෙරද ස්ත්රී දූෂණය, ලිංගික අතවර කිරීම සහ ලිංගික සූරාකෑම සඳහා මිනිසුන් ජාවාරම් කිරීම යන බරපතළ චෝදනා ගණනාවක් එල්ල වී තිබුණි.
කෙසේ වෙතත්, ඊයේ චෙල්ම්ස්ෆර්ඩ් කෲන් (Chelmsford Crown) අධිකරණයට ඉදිරිපත් කිරීමට පෙර පොලිසිය විසින් මෙම නව චෝදනා 18 පිළිබඳව අනාවරණය කරන ලදී.මෙම නව චෝදනා අතරින් 15ක්ම එල්ල වී ඇත්තේ බැරී ඩෲවිට්-බාර්ලෝට වන අතර, ඊට ළමයෙකු සමඟ ලිංගිකව හැසිරීම සහ ළමයෙකුගේ ලිංගික සේවාවන් සඳහා මුදල් ගෙවීම වැනි චෝදනා ද ඇතුළත් වේ. මීට අමතරව ස්ත්රී දූෂණය සහ කැමැත්තකින් තොරව ලිංගික ක්රියාවල නිරත වීමට බල කිරීම යන චෝදනා ද ඔවුන්ට එල්ල වී ඇත. වර්ෂ 1999 දී සිය පළමු සහකරු සමඟ එක්ව අන්වාදේශ මවක් (surrogate) හරහා දරුවන් ලැබූ පළමු සමලිංගික යුවළ ලෙස මොවුන් බ්රිතාන්යය තුළ ප්රසිද්ධියට පත්ව සිටියහ. මෙම නඩුව ලබන වසරේ ජනවාරි මාසයේදී විභාගයට ගැනීමට නියමිත අතර, එතෙක් මොවුන් දෙදෙනා රක්ෂිත බන්ධනාගාරගත කර ඇත.
මේ අතර, වාර්තා වන වෙනත් පුවතකින් කියැවෙන්නේ සිය බිරිඳට මත්ද්රව්ය ලබා දී වෙනත් පිරිමින් 12 දෙනෙකු සමඟ එක්ව ඇයව දූෂණය කිරීමට සැලසුම් කළ බවට චෝදනා ලැබූ හැට හැවිරිදි වියේ පසුවන ස්වාමිපුරුෂයෙකු, සිය බිරිඳට ලිංගික අතවර කිරීමේ චෝදනාවන්ට වරද පිළිගෙන ඇති බවයි. මැන්චෙස්ටර් නුවර මින්ෂුල් ස්ට්රීට් කෲන් (Minshull Street Crown) අධිකරණයේ පැවති නඩු විභාගයකදී ඔහු විසින් 2022 සහ 2023 කාලය තුළ සිදු කරන ලද ලිංගික අතවර කිරීම් සහ පුද්ගලික ඡායාරූප බෙදා හැරීම යන චෝදනාවලට මෙලෙස වරද පිළිගන්නා ලදී.
කෙසේ වෙතත්, වසර 20ක පමණ කාලයක් තිස්සේ ඇයට මත්ද්රව්ය ලබා දී සමූහ දූෂණයකට ලක් කිරීමට කුමන්ත්රණය කිරීමේ චෝදනාව ඔහු විසින් ප්රතික්ෂේප කර ඇත. මෙම අපරාධයට සම්බන්ධ බවට චෝදනා ලැබ සිටින අනෙක් පිරිමින් 12 දෙනා ද තමන්ට එල්ල වී ඇති ස්ත්රී දූෂණය සහ ලිංගික අතවර කිරීම් ඇතුළු චෝදනා ප්රතික්ෂේප කර තිබේ. මීට අමතරව පනස් හැවිරිදි වියේ පසුවන තවත් අයෙකු මීට පෙර මෙම අපරාධයට අදාළ චෝදනා හතරකට වරද පිළිගෙන ඇත. මෙම නඩුවේ වැඩිදුර විභාගය එළඹෙන සැප්තැම්බර් 1 වනදා ආරම්භ වීමට නියමිත අතර, එය සති 12ක පමණ කාලයක් පුරා පැවැත්වෙනු ඇතැයි අපේක්ෂා කෙරේ.
