අනුරාධපුර, සිවලාකුලම් පොලිස් වසමට අයත් වෙම්බුවැව ප්රදේශයේදී බීමත්ව යතුරුපැදියක් පදවාගෙන ගිය පුද්ගලයෙකු අත්අඩංගුවට ගැනීමට උත්සාහ කළ අවස්ථාවකදී, ඔහුගේ ඥාතීන් සහ හිතවතුන් පිරිසක් පොලිස් නිලධාරීන්ට පහර දී සැකකරු සහ යතුරුපැදිය පැහැරගෙන පලාගොස් තිබේ. මෙම කලහකාරී සිදුවීමේදී පොලිස් නිලධාරීන් තිදෙනෙකු තුවාල ලබා ඇති බව ප්රදේශයේ උසස් පොලිස් නිලධාරියෙකු සනාථ කර ඇත.
මෙම පහරදීම හේතුවෙන් සිවලාකුලම් පොලිස් ස්ථානාධිපතිවරයා ලෙස කටයුතු කරන ප්රධාන පොලිස් පරීක්ෂකවරයා, පොලිස් සැරයන්වරයෙකු සහ පොලිස් කොස්තාපල්වරයෙකු තුවාල ලබා ඇති අතර, ඔවුන් ප්රතිකාර සඳහා පයිරිමඩුව රෝහලට ඇතුළත් කර තිබේ. පොලිස් ස්ථානාධිපතිවරයා ඇතුළු හයදෙනෙකුගෙන් යුත් නිලධාරීන් කණ්ඩායමක් පොලිස් ජීප් රථයෙන් මාර්ග සංචාරයේ නිරතව සිටියදී වෙම්බුවැව ප්රදේශයේදී මෙම ගැටුම හටගෙන ඇත. සැකකටයුතු ලෙස ධාවනය වූ යතුරුපැදියක් නතර කර එහි පැදිකරු පරීක්ෂා කිරීමට පොලිසිය පියවර ගෙන තිබුණේ එම අවස්ථාවේදීය.
එහිදී යතුරුපැදිකරු දැඩි ලෙස මත්පැන් පානය කර සිට ඇති බව ඔහුගේ මුවින් වහනය වූ මත්පැන් ගඳින් පොලිස් නිලධාරීන්ට නිරීක්ෂණය වී තිබේ. මේ හේතුවෙන් ඔහුව සැකපිට අත්අඩංගුවට ගැනීමට සූදානම් වනවාත් සමඟම, සැකකරු ඊට දැඩි ලෙස ප්රතිවිරෝධය දක්වමින් කෑකෝ ගසා කලහකාරී ලෙස හැසිරෙන්නට පටන් ගෙන ඇත.
එම අවස්ථාවේදී සැකකරුගේ කෑගැසීම ඇසී ඒ අසල සිටි ඔහුගේ නෑදෑයින් සහ මිතුරන් පිරිසක් වහාම එම ස්ථානයට කඩා වැදී ඇත. ඔවුන් පොලිස් නිලධාරීන් සමඟ බලහත්කාරයෙන් පොරබදමින්, නිලධාරීන්ගේ ග්රහණයෙන් සැකකරු මුදාගෙන, අදාළ යතුරුපැදියද රැගෙන එම ස්ථානයෙන් ක්ෂණිකව පලාගොස් තිබේ. සිද්ධිය සම්බන්ධයෙන් පලාගිය යතුරුපැදිකරු සහ පොලිසියට පහරදී ඔහුව මුදාගත් අනෙකුත් සැකකරුවන් වහාම අත්අඩංගුවට ගැනීම සඳහා සිවලාකුලම් පොලිසිය මේ වන විට පුළුල් විමර්ශන ආරම්භ කර ඇත.
