ශ්රී ලංකා මහ බැංකුවේ කිසිදු නියාමනයක් හෝ ලියාපදිංචියක් නොමැතිව මහජනතාවගෙන් මුදල් තැන්පතු ලබාගන්නා වංචනික මූල්ය සහ වැවිලි ආයෝජන ව්යාපෘති ප්රවර්ධනය කිරීම මෙන්ම ඒවායේ වෙළෙඳ දැන්වීම් පළකිරීම වහාම නතර කරන ලෙස මහ බැංකුව විසින් මෙරට සියලුම මාධ්ය ආයතන වෙත දැඩි අවවාදයක් නිකුත් කර තිබේ. මහ බැංකුව විසින් කොතරම් දැනුවත් කිරීම් සිදු කළද, ඇතැම් ප්රමුඛ පෙළේ මාධ්ය ආයතන ඔස්සේ මෙවැනි නියාමනයක් නොමැති වංචනික ආයතනවල ප්රචාරක වැඩසටහන් සහ සම්මුඛ සාකච්ඡා විකාශය කිරීම හේතුවෙන් අහිංසක ජනතාව විශාල වශයෙන් සිය මුදල් අහිමි කරගන්නා බව නිරීක්ෂණය වී ඇත.
ඒ අනුව, මින් ඉදිරියට මෙවැනි වංචනික ආයතන වෙත සිය වේදිකාව සපයා දෙන මාධ්ය ආයතන ද අදාළ මූල්ය අපරාධයේ හවුල්කරුවන් ලෙස සලකා නීතිය දැඩිව ක්රියාත්මක කිරීමට තීරණය කර තිබේ. මෙම නීති රීති උල්ලංඝනය කරමින් කටයුතු කරන මාධ්ය ආයතන ප්රධානීන්ට සහ මාධ්යවේදීන්ට එරෙහිව මහාධිකරණය හමුවේ නඩු පැවරීමට නියමිත අතර, එහිදී රුපියල් මිලියන පහක උපරිම දඩයක් හෝ වසර පහක් දක්වා වූ සිරදඬුවමක් හෝ එම දඬුවම් ද්විත්වයම පැනවීමට නීතිමය ප්රතිපාදන පවතී. මීට අමතරව, වින්දිතයන්ගේ අහිමි වූ තැන්පතු අධිකරණ අධීක්ෂණය යටතේ පියවීමට ද අදාළ මාධ්ය ආයතන නීතියෙන් බැඳී සිටින බව අවධාරණය කෙරේ.
මහ බැංකුව විසින් මෙම ක්ෂණික පියවර ගැනීමට මූලික හේතුව වී ඇත්තේ පසුගිය ජුනි මස අටවැනි දින රජයට අයත් ස්වාධීන රූපවාහිනී නාලිකාවේ විකාශය වූ සම්මුඛ සාකච්ඡාවකි. එම වැඩසටහනට එක්වූ 'කසාගල ග්රීන් ප්ලාන්ටේෂන්' (Kasagala Green Plantation Pvt Ltd) නැමති සමාගමේ අධ්යක්ෂවරයෙකු වන මල්වත්තගේ රංජිත් නන්දන පීරිස් මහතා විසින් සිය වැවිලි ආයෝජන ව්යාපෘතිය මහ බැංකුවේ නියාමනයට යටත් ආයතනයක් බවට එහිදී අසත්ය ප්රකාශයක් සිදු කර තිබේ. මෙම සිදුවීම පදනම් කරගනිමින්, අදාළ සමාගම 2011 අංක 42 දරන මුදල් ව්යාපාර පනත උල්ලංඝනය කරමින් නීතිවිරෝධී ලෙස මහජන තැන්පතු ලබාගෙන තිබේද යන්න සම්බන්ධයෙන් සොයා බැලීමට මහ බැංකුව මේ වන විටත් විශේෂ විමර්ශනයක් ආරම්භ කර ඇත.
මේ සම්බන්ධයෙන් සියලුම මාධ්ය ආයතන ප්රධානීන් දැනුවත් කරමින් මහ බැංකු සභාපතිවරයා විසින් විශේෂ ලිපියක් යොමු කර ඇති අතර, එහි මුදල් ව්යාපාර පනතේ 49 සහ 56(4) යන වගන්ති යටතේ මාධ්ය ආයතන සතු නීතිමය වගකීම පැහැදිලි කර තිබේ. ඒ අනුව, ඕනෑම ආයතනයක තැන්පතු ලබාගැනීමේ හෝ ආයෝජන ප්රවර්ධනය කිරීමේ වෙළෙඳ දැන්වීමක් පළකිරීමට ප්රථම, අදාළ ආයතනය ශ්රී ලංකා මහ බැංකුවේ අනුමත ලැයිස්තුවට ඇතුළත් කර ඇති නිත්යානුකූල ආයතනයක්ද යන්න අනිවාර්යයෙන්ම පරීක්ෂා කර තහවුරු කරගැනීම මාධ්ය ආයතනවල නීතිමය වගකීමක් බව එමඟින් වැඩිදුරටත් දන්වා ඇත.