වයස අවුරුදු දහපහක් වූ ඉන්දීය යොවුන් ක්රිකට් තරුවක් වන වෛභව් සූරියවංශි, ඉන්දීය ජ්යෙෂ්ඨ ජාතික ක්රිකට් කණ්ඩායම නියෝජනය කරමින් සිය මංගල තරගාවලියට එක්වීමට සූදානමින් සිටියි. අයර්ලන්තය සහ එංගලන්තය සමඟ පැවැත්වෙන තරගාවලි මෙන්ම ආසියානු ක්රීඩා උළෙල සඳහා ද නම් කර ඇති මෙම දක්ෂ පිතිකරු, මේ වන විට සිය පළමු ඉන්දීය ජාතික ක්රිකට් කණ්ඩායමේ නිල ඇඳුම පැළඳ සිටින අතර, තමා බොහෝ කාලයක සිට මෙම මොහොත වෙනුවෙන් සිහින මැවූ බව හැඟීම්බරව ප්රකාශ කර ඇත.
මෙම වසරේ පැවැති ඉන්දීය ප්රිමියර් ලීග් (IPL) තරගාවලියේදී රාජස්ථාන් රෝයල්ස් කණ්ඩායම නියෝජනය කරමින් විශිෂ්ට දස්කම් දැක්වූ සූරියවංශි, තරගාවලියේ වැඩිම ලකුණු ලාභියා ලෙස ලකුණු 776ක් ලබා ගනිමින් 'ඔරේන්ජ් කැප්' සම්මානය දිනා ගැනීමට සමත් විය. එම තරගාවලියේදී ශතකයක් සහ අර්ධ ශතක පහක් වාර්තා කරමින් සිය පිතිකරණ හැකියාව ලොවටම පෙන්වා දුන් ඔහු, ශ්රී ලංකා 'ඒ' කණ්ඩායමට එරෙහිව පැවැති තුන්කොන් තරගාවලියේ අවසන් තරගයේදී පන්දු 11කින් ලැයිස්තු ඒ (List A) තරගයක වේගවත්ම අර්ධ ශතකය වාර්තා කරමින් ඉන්දීය 'ඒ' කණ්ඩායමේ ජයග්රහණයට ද විශාල දායකත්වයක් ලබා දුන්නේය.
ඉන්දීය ක්රිකට් පාලක මණ්ඩලය (BCCI) විසින් නිකුත් කරන ලද වීඩියෝවක දැක්වෙන පරිදි, සිය නම සහ අංක 03 සහිත ජාතික කණ්ඩායමේ නිල ඇඳුම ලැබීම පිළිබඳව අදහස් දක්වමින් සූරියවංශි සඳහන් කර ඇත්තේ, තමන් ක්රිකට් පිත්තක් අතට ගත් පළමු දින සිට මෙම අවස්ථාව බලාපොරොත්තුවෙන් සිටි බවත් එම හැඟීම වචනයෙන් විස්තර කළ නොහැකි බවත්ය. 1989 වසරේදී වයස අවුරුදු 16කුත් දින 205කදී ජාත්යන්තර ටෙස්ට් වරම් දිනාගත් සචින් ටෙන්ඩුල්කාර් වාර්තා කළ ඉන්දියාවේ ලාබාලතම ක්රීඩකයා වීමේ වාර්තාව අභිබවා යමින්, ජාත්යන්තර ක්රිකට් පිටියට පිවිසෙන ලාබාලතම ඉන්දීය ක්රීඩකයා වීමට සූරියවංශිට මේ අනුව අවස්ථාව උදාවී ඇත.
ශ්රේයාස් අයියර්ගේ නායකත්වයෙන් යුත් ඉන්දීය සංචිතය ජූනි 26 වැනි දින චෙන්නායි ජාත්යන්තර ගුවන්තොටුපළෙන් පිටත්ව යාමට නියමිතව ඇති අතර, ඔවුන් අයර්ලන්තය සමඟ විස්සයි විස්ස තරග දෙකකටත්, එංගලන්තය සමඟ විස්සයි විස්ස තරග පහකට සහ එක්දින තරග තුනකටත් සහභාගී වීමට නියමිතය. කෙසේ වෙතත්, මෙම තරගාවලියට පෙර ආබාධයකට ලක්වූ තුන් ඉරියව් ක්රීඩක නිතීෂ් කුමාර් රෙඩ්ඩිට සංචිතයෙන් ඉවත් වීමට සිදුවූ අතර, ඔහු වෙනුවට දේශීය තරගාවලිවල සහ ඉන්දීය 'ඒ' කණ්ඩායම වෙනුවෙන් දස්කම් දැක්වූ 23 හැවිරිදි මුම්බායි ක්රීඩක සූර්යාන්ෂ් ශෙජ්ව ජාතික කණ්ඩායමට කැඳවීමට තේරීම් කමිටුව පියවර ගෙන ඇත.