කොල්ලුපිටියේ පිහිටි සුප්රකට ක්රිකට් ක්රීඩකයෙකුගේ නිවසේ ආරක්ෂිත බිත්ති අතරින් ඇසෙන නිහඬ සාක්ෂි, හිටපු ගුවන් සේවා ප්රධානියෙකුගේ අවසන් හෝරා කිහිපය පිළිබඳව අබිරහස් කතාවක් මවා පාමින් තිබේ.
ශ්රී ලන්කන් ගුවන් සමාගමේ හිටපු ප්රධාන විධායක නිලධාරී කපිල චන්ද්රසේන මහතා හිටපු ප්රවීණ ක්රිකට් ක්රීඩක අරවින්ද ද සිල්වා මහතාගේ නිවසේදී ගෙල වැලලාගෙන සැකකටයුතු ලෙස මියයාමේ සිද්ධිය සම්බන්ධයෙන් වන මහේස්ත්රාත් පරීක්ෂණය ඊයේ (26) කොටුව මහේස්ත්රාත් පසන් අමරසේන මහතා ඉදිරියේ කැඳවූ අවස්ථාවේදී, එම නිවසේ ආරක්ෂිත කැමරා පද්ධතිය දෝෂ රහිතව ක්රියාත්මක වූ බවට අධිකරණයේදී තහවුරු විය. මෙම මරණ පරීක්ෂණයෙන් යම් තොරතුරක් වසන් කිරීමට අදාළ දත්ත මකාදමා ඇතැයි යන බරපතල සැකය මේ අනුව නිර්මාණයවී ඇති අතර කපිල වාසය කළ අනෙක් නිවසේද මේ ආකාරයටම සීසීටීවී දත්ත ක්රියා නොකිරීම මෙම සැකය තීව්ර කර ඇත.
අරවින්ද ද සිල්වා මහතාගේ කොල්ලුපිටිය පේද්රිස් මාවතේ පිහිටි නිවසේ කැමරා පද්ධතිය නඩත්තු කළ කාර්මික ශිල්පියෙකු වන හේමන්ත සමන් කුමාර මහතා සාක්ෂි දෙමින් පවසා සිටියේ, 2024 වසරේදී යන්ත්රයේ දෝෂයක් මඟහරවා නව මොනිටරයක් ද සමඟින් කැමරා පහකින් යුත් පද්ධතියක් එහි ස්ථාපිත කළ බවයි. කොළඹ අපරාධ කොට්ඨාසයේ ප්රධාන උප පොලිස් පරීක්ෂක අරුණ ක්රිෂාන්ත මහතා ඇතුළු නිලධාරීන්ගේ ප්රශ්න කිරීම් හමුවේ ඔහු වැඩිදුරටත් අවධාරණය කළේ, එම අලුත්වැඩියාවෙන් පසු නිවැසියන්ට දර්ශන නිසි ලෙස පටිගත වන බව තමා පෞද්ගලිකවම පෙන්වා දුන් බවත්, ඉන්පසු කිසිදු දිනෙක එම නිවසට නඩත්තු කටයුත්තක් සඳහා තමා නොගිය බවත්ය.
මේ අතර, ආන්දෝලනාත්මක එයාර්බස් ගනුදෙනුව සම්බන්ධයෙන් රක්ෂිත බන්ධනාගාරගතව සිටි චන්ද්රසේන මහතා වෙනුවෙන් රුපියල් ලක්ෂ සියයක දැවැන්ත ශරීර ඇපයක් ලබාදීමට ඉදිරිපත් වූ ඔහුගේ දිගුකාලීන හිතවතෙකු වන ඉන්දික මනෝජ් රත්නායක මහතාගේ සාක්ෂිය, මියගිය නිලධාරියාගේ අවසන් රාත්රිය පිළිබඳ හැඟීම්බර සිතුවමක් අධිකරණය හමුවේ දිගහැරියේය. වසර දහයක පමණ සිට මියගිය පුද්ගලයාව තමා හඳුනන බව පැවසූ ඔහු, චන්ද්රසේන මහතා බන්ධනාගාරගත වීමට පෙර තමාගෙන් කළ ඉල්ලීමකට අනුව මැයි මස පස්වැනිදා නීතිඥවරයාගේ කැඳවීම මත ගොස් ඇපයට අත්සන් තැබූ බව විස්තර කළේය.
ඛේදවාචකයට පෙර දින රාත්රියේ සිදුවීම් පෙළගැස්ම අතිශය තීරණාත්මකය. මනෝජ් රත්නායක මහතාගේ සාක්ෂියට අනුව, මැයි හත්වැනිදා අරවින්ද ද සිල්වා මහතාගේ නිවසට ගිය ඔහු, පසුව සිල්වා යුවළ සහ තවත් පිරිසක් සමඟ නීතිඥවරයාගේ කාර්යාලයට ගොස් නඩුව පිළිබඳව සාකච්ඡා කර ඇත. අනතුරුව යළිත් සිල්වා මහතාගේ නිවසට පැමිණ රාත්රී භෝජනය ද ගෙන සියලු දෙනා විසිර ගොස් ඇත්තේ රාත්රී එකොළහමාරට පමණය. ඒ මොහොත වන විටත් කපිල චන්ද්රසේන මහතා එම නිවසේ සජීවීව රැඳී සිටි බව ඔහු තහවුරු කළේය.
පසුදා උදෑසන සිය හිතවතාගේ හදිසි මරණය පිළිබඳ පුවත දුරකථන පණිවිඩයකින් දැක කම්පනයට පත් රත්නායක මහතා වහාම අරවින්ද ද සිල්වා මහතා ඇමතූ විට, ඔහු "පොලිසියේ ඉන්නවා, පස්සේ කතා කරන්නම්" යැයි කෙටි පිළිතුරක් පමණක් දී තිබේ. ජනාධිපති නීතිඥ රියන්සි අර්සකුලරත්න සහ නීතිඥ උදාර මුහන්දිරම් යන මහත්වරුන්ගේ සාක්ෂි විමසීම ලබන 29 වැනිදාට කල් තැබීමට මහේස්ත්රාත්වරයා නියෝග කරද්දී, එදින රාත්රී එකොළහමාරෙන් පසු ඒ දැවැන්ත නිවසේ සිදුවූයේ කුමක්ද යන ප්රශ්නය, නිහඬව පටිගත වූ සීසීටීවී දර්ශන තුළ තවමත් සැඟව පවතී.
