අකුරැස්ස ප්රදේශයේ පවත්වාගෙන ගිය සූදු පොළක් වටලන බවට කල්තියා ඔත්තුවක් ලබාදීමේ සිද්ධියකට අදාළව මාතර කොට්ඨාස බුද්ධි අංශයට අනුයුක්තව සේවය කළ පොලිස් සැරයන්වරයෙකුගේ වැඩ තහනම් කිරීමට පියවර ගෙන තිබේ. මාතර ජ්යෙෂ්ඨ පොලිස් අධිකාරී කාර්යාලය විසින් මෙම තීරණය ගෙන ඇති බව වාර්තා වේ.
පසුගිය අප්රේල් මස 14 වන දින අකුරැස්ස පොලිසියේ නිලධාරීන් පිරිසක් අදාළ සූදු පොළ පවත්වාගෙන ගිය නිවස වැටලීම සඳහා පිටත්ව ගොස් ඇත. එම අවස්ථාවේදී අකුරැස්ස පොලිසියේම රාජකාරි කළ මෙම සැකකාර බුද්ධි අංශ සැරයන්වරයා විසින් අදාළ නිවෙස් හිමියා වෙත ජංගම දුරකථනයෙන් ඇමතුමක් ලබා දී පොලිස් වැටලීම පිළිබඳව පූර්ව දැනුවත් කිරීමක් කර ඇති බව පොලිස් පරීක්ෂණවලින් තහවුරු වී තිබේ.
මෙම සිදුවීම සම්බන්ධයෙන් අදාළ පොලිස් නිලධාරියාගේ, සූදු පොළ පවත්වාගෙන ගිය පුද්ගලයාගේ සහ පොලිස් ස්ථානයේ දුරකථන දත්ත විශ්ලේෂණය කිරීමක් සිදු කර ඇත. එම විමර්ශනයේදී ලබාගත් දුරකථන වාර්තා මගින් සැකකාර නිලධාරියා විසින් සැබවින්ම අදාළ නිවෙස් හිමියාට පොලිසිය පැමිණෙන බවට ඔත්තුව ලබා දී ඇති බවට නිශ්චිතවම අනාවරණය කරගෙන තිබේ.
මේ අනුව යමින් සිය රාජකාරිය නිසි පරිදි ඉටු නොකිරීම, දෙපාර්තමේන්තුවේ විශ්වාසය කඩ කිරීම සහ පොලිස් සේවයේ ගෞරවයට හානි වන ආකාරයේ දූෂිත ක්රියාවක නිරත වීම යන බරපතළ චෝදනා යටතේ මෙම නිලධාරියාගේ සේවය මෙලෙස අත්හිටුවීමට මාතර ජ්යෙෂ්ඨ පොලිස් අධිකාරී කාර්යාලය ක්රියා කර ඇත.
