විදේශ විනිමය අනුපාත ගණනයේ දෝෂයකින් මහජන බැංකුව මිලියන 656ක් අපතේ යවන්නට සිදුවූ බවත් ඒ ගැන පරීක්ෂණයක් අරඹා ඇති බවත් මහජන බැංකුව නිල නිවේදනයක් මගින් පැහැදිලි කර තිබේ.
2023 වසරේ මැයි මාසයේ සිට 2026 වසරේ මාර්තු මාසය දක්වා වූ කාලසීමාව තුළ සිය විදේශ විනිමය හුවමාරු පද්ධතියේ ක්රියාත්මක වූ එක්තරා මුදල් ඒකකයක විනිමය අනුපාත පරිවර්තන දෝෂයක් හේතුවෙන් ගනුදෙනුකරුවන් පිරිසකට හිමිවිය යුතු ප්රමාණයට වඩා වැඩි මුදලක් නිකුත් වී ඇති බව මහජන බැංකුව විසින් නිවේදනය කර තිබේ. මෙම තාක්ෂණික ගැටලුව හඳුනාගත් වහාම එය මුළුමනින්ම යථා තත්ත්වයට පත් කිරීමට අදාළ අංශ කටයුතු කර ඇත.
මෙම තත්ත්වය අනාවරණය වීමත් සමඟ වහාම ක්රියාත්මක වන පරිදි අභ්යන්තර විමර්ශනයක් දියත් කර ඇති අතර, ඒ හරහා බැංකුවේ මෙහෙයුම් පද්ධතිවල ක්රියාවලිය තවදුරටත් ශක්තිමත් කිරීමට පියවර ගෙන තිබේ. ශ්රී ලංකා මහ බැංකුව සහ අනෙකුත් අදාළ නියාමන හා අධීක්ෂණ අධිකාරීන්ගේ සෘජු උපදෙස් යටතේ මේ සම්බන්ධයෙන් තවදුරටත් පුළුල් පරීක්ෂණ ක්රියාත්මක වෙමින් පවතින බව ද වාර්තා වේ.
අදාළ දෝෂය හේතුවෙන් බැංකුවට සිදුව ඇති සමස්ත මූල්යමය බලපෑම ආසන්න වශයෙන් රුපියල් මිලියන 656ක් ලෙස ඇස්තමේන්තු කර ඇත. කෙසේ නමුත්, එම අගය මේ වන විටත් අදාළ කාලසීමාවට අයත් ගිණුම් ප්රකාශන වෙත ඇතුළත් කර ඇති බැවින්, වර්තමාන ගණනය කිරීම්වලට අනුව මින් ඉදිරියට බැංකුව වෙත කිසිදු අමතර මූල්යමය බලපෑමක් එල්ල නොවනු ඇතැයි බැංකුව අපේක්ෂා කරයි. එසේම, ගනුදෙනුකරුවන් වෙත නිකුත් වූ අමතර මුදල් නැවත අයකර ගැනීමේ කටයුතු මේ වන විටත් ආරම්භ කර ඇති බවත්, එම ක්රියාවලිය සාර්ථකව සිදුවෙමින් පවතින බවත් සඳහන් වේ.
රුපියල් ට්රිලියන 3.8ක පමණ දැවැන්ත වත්කමකින් සමන්විත අතිශය ශක්තිමත් මූල්ය ආයතනයක් වන මහජන බැංකුවේ මූල්ය ස්ථාවරත්වයට, ලාභයට හෝ පාරිභෝගික තැන්පතුවල ආරක්ෂාවට මෙම සිදුවීම හරහා කිසිදු බලපෑමක් එල්ල නොවන බව අවධාරණය කර ඇත. තවද, බැංකුවේ දෛනික රාජකාරි, ඩිජිටල් බැංකුකරණ පහසුකම් මෙන්ම ගනුදෙනුකාර සේවාවන් ද කිසිදු බාධාවකින් තොරව සුපුරුදු පරිදිම ක්රියාත්මක වන බව සියලුම ගනුදෙනුකරුවන් සහ පාර්ශ්වකරුවන් වෙත දැනුම් දී තිබේ.
