විදේශිකයන් විසින් සිදු කරනු ලබන විවිධ නීති විරෝධී ක්රියාකාරකම් සහ අපරාධ රැල්ල පාලනය කිරීමේ අරමුණින් තායිලන්ත රජය සිය වීසා රෙගුලාසි කඩිනමින් දැඩි කිරීමට පියවර ගෙන තිබේ. ඒ අනුව 2026 මැයි 19 වන දින තායිලන්ත අමාත්ය මණ්ඩලය විසින් එරට ක්රියාත්මක වූ දින 60 ක වීසා රහිතව රැඳී සිටීමේ පහසුකම සම්පූර්ණයෙන්ම අවලංගු කිරීමට අනුමැතිය ලබා දී ඇත.
රාජ්ය ගැසට් පත්රයේ ප්රකාශයට පත් කර දින 15 කින්, එනම් 2026 ජූනි මාසයේ මුල් භාගයේ සිට බලාත්මක වන පරිදි මෙම නව නීති ක්රියාවට නැංවීමට නියමිත අතර, එතෙක් පැමිණෙන සංචාරකයින් සඳහා දැනට පවතින දින 60 සීමාව වලංගු වනු ඇත. දින 60 ක් සඳහා ශ්රී ලාංකිකයින්ට හිමිව තිබුණ මෙම පහසුකමද ඒ අනුව අහෝසිවී යනු ඇත.(පසුගියදා මත්කුඩු රැගෙන හිමිවරු කණ්ඩායමක් මෙරටට ආවේද තායිලන්තයේ සිටයි)
කොවිඩ් වසංගතයෙන් පසු දැඩි ලෙස ඇද වැටුණු සංචාරක කර්මාන්තය නැවත නඟා සිටුවීමේ අරමුණින් 2024 ජූලි මාසයේදී රටවල් 93 ක සංචාරකයින් සඳහා මෙම දින 60 ක වීසා රහිත ක්රමය හඳුන්වා දෙන ලදී. කෙසේ වෙතත්, නව සංශෝධන යටතේ එම ලිහිල් ප්රතිපත්තිය වෙනස් කරමින් බහුතරයක් රටවල් සඳහා පැරණි දින 30 ක සීමාව නැවත බලාත්මක කෙරේ. මෙහිදී අමෙරිකාව, බ්රිතාන්යය, ඕස්ට්රේලියාව සහ කැනඩාව ඇතුළු රටවල් 54 ක සංචාරකයින්ට දින 30 ක වීසා රහිත කාලසීමාවක් හිමිවන අතර, ආගමන විගමන නිලධාරියෙකුගේ අභිමතය පරිදි තායි බාත් 1,900 ක ගාස්තුවක් ගෙවා එය තවත් දින 30 කින් දීර්ඝ කර ගැනීමේ හැකියාව පවතී.
නව නීති මාලාව යටතේ මාලදිවයින සහ සීෂෙල්ස් වැනි රටවල් කිහිපයකට දින 15 ක වීසා රහිත පහසුකමක් හිමිවන අතර, මෙතෙක් දින 60 ක සහනයක් භුක්ති විඳි ඉන්දියානු සංචාරකයින් සඳහා පැමිණීමේදී ලබාගන්නා වීසා (Visa on Arrival) ක්රමය යටතේ තායි බාත් 2,000 ක ගාස්තුවකට යටත්ව දින 15 ක කාලයක් පමණක් ලබාදීමට රජය තීරණය කර ඇත. එසේ වුවද, පවතින ද්විපාර්ශ්වික ගිවිසුම් හේතුවෙන් චීනය මෙන්ම දින 90 ක රැඳී සිටීමේ සහනය හිමි දකුණු කොරියාව, ආර්ජන්ටිනාව, බ්රසීලය, චිලී සහ පේරු වැනි රටවල සංචාරකයින්ට මෙම නව සංශෝධන මගින් බලපෑමක් එල්ල නොවේ. මීට අමතරව ගොඩබිම් දේශසීමා හරහා පැමිණෙන සංචාරකයින් සඳහා වසරකට දෙවතාවක් පමණක් දින 30 ක වීසා රහිතව ඇතුළු වීමේ සීමාවන් ද පනවා ඇත.
විදේශිකයන් සංචාරක මුවාවෙන් පැමිණ නීති විරෝධී රැකියා අත්පත් කර ගැනීම, වීසා කාලය ඉක්මවා රැඳී සිටීම, ව්යාජ ව්යාපාර ජාල පවත්වාගෙන යාම, මත්ද්රව්ය ජාවාරම් සහ ජාත්යන්තර අපරාධ කල්ලිවලට සම්බන්ධ වීම වැළැක්වීම මෙම දැඩි තීරණයට මූලික හේතුව වී තිබේ. මේ පිළිබඳව අදහස් දැක්වූ තායිලන්තයේ සංචාරක සහ ක්රීඩා අමාත්ය සුරසාක් පන්චරෝන්වොරකුල් ප්රකාශ කර සිටියේ රජයේ ප්රධාන අරමුණ කෙටි කාලීන ආර්ථික ලාභ ලැබීම නොව, ගුණාත්මක සංචාරකයින් රටට ආකර්ෂණය කර ගැනීම සහ සංචාරක මුවාවෙන් පැමිණෙන අපරාධකරුවන් වැළැක්වීම බවයි. මෙම වීසා රහිත ක්රමය වෙනස් කිරීමෙන් එරට ප්රධාන සංචාරක වෙළඳපොළට දැඩි බලපෑමක් එල්ල නොවන බව ද ඔහු අවධාරණය කළේය.
තායිලන්තයේ දළ දේශීය නිෂ්පාදිතයෙන් සියයට 10 කට වඩා වැඩි ප්රමාණයක් සංචාරක කර්මාන්තයෙන් උපයන බැවින්, වියට්නාමය වැනි අනෙකුත් තරඟකාරී රටවල් සමඟ පවතින තරඟකාරිත්වය හමුවේ මෙම තීරණය පිළිබඳව එරට සංචාරක ව්යාපාරිකයන් යම් කනස්සල්ලක් පළ කර ඇත. විශේෂයෙන්ම මාස කිහිපයක් රැඳී සිටීමට බලාපොරොත්තු වන ඩිජිටල් නාමිකයන් (Digital Nomads) සහ වීසා අලුත් කරගැනීම සඳහා කෙටි කාලීනව දේශසීමාවෙන් පිටවී නැවත පැමිණීමේ උපක්රම භාවිතා කරන්නන්ට මෙම නව සීමා කිරීම් දැඩි ගැටලුවක් වනු ඇත. කෙසේ වෙතත්, තායිලන්තයට පැමිණෙන බහුතරයක් සංචාරකයින්ගේ සාමාන්ය රැඳී සිටීමේ කාලය දින නවයකට වඩා අඩු බැවින්, මෙම රෙගුලාසි මගින් සාමාන්ය සංචාරකයින්ට විශාල බාධාවක් ඇති නොවන බව රජයේ බලධාරීන් පෙන්වා දෙයි. දිගුකාලීනව රැඳී සිටීමට කැමති අය සඳහා විශේෂ සංචාරක වීසා හෝ දින 180 ක් දක්වා රැඳී සිටිය හැකි 'ඩෙස්ටිනේෂන් තායිලන්ත වීසා' (DTV) වැනි විකල්ප ක්රමවේද විවෘතව පවතින බව ද බලධාරීන් සිහිපත් කරයි.
