හෝමාගම, පිටිපන දකුණ ප්රදේශයේ කුඹුරු යායක් ආසන්නයේ පිහිටි ළිඳකින් යුද හමුදා සෙබළෙකුගේ මළසිරුරක් සොයාගෙන තිබේ. ඊයේ (15) පෙරවරුවේ හෝමාගම පොලිස් ස්ථානය වෙත ලැබුණු පැමිණිල්ලකට අනුව සිදුකළ විශේෂ විමර්ශනයකදී මෙම මෘත ශරීරය සොයා ගැනීමට පොලිසියට හැකි වී ඇත.
මෙසේ අවාසනාවන්ත ලෙස ජීවිතක්ෂයට පත්ව ඇත්තේ මොරොන්තුඩුව, මහාලන්ද ප්රදේශයේ පදිංචිව සිටි 43 හැවිරිදි වියේ පසු වූ යුද හමුදා සෙබළෙකි. ඔහු සිය නිල හමුදා රාජකාරි කටයුතුවලින් බාහිරව, අමතර ආදායමක් උපයා ගැනීම සඳහා කුලී පදනම මත ත්රීරෝද රථයක් ධාවනය කිරීමේ ද නිරතව සිටි අයෙකු බව අනාවරණය වී තිබේ.
පසුගිය පෙරේදා රාත්රී කාලයේදී කුලී ගමනක් සඳහා සිය ත්රීරෝද රථයෙන් පිටත්ව ගිය මෙම සෙබළා නැවත නිවසට පැමිණ නොමැති අතර, ඒ පිළිබඳව ඔහුගේ බිරිඳ විසින් මීගොඩ පොලිස් ස්ථානය වෙත පැමිණිල්ලක් ද ඉදිරිපත් කර තිබුණි. පසුව සිදුකළ සෝදිසි කිරීම්වලදී මළසිරුර හමුවූ ළිඳ ආසන්නයේ තිබී ඔහු පදවාගෙන පැමිණි ත්රීරෝද රථය ද පොලිස් භාරයට ගැනීමට හැකි වී ඇත.
මෙම මරණය සම්බන්ධයෙන් වන මහෙස්ත්රාත් පරීක්ෂණය සහ පශ්චාත් මරණ පරීක්ෂණය මේ වන විට පවත්වා අවසන් කර ඇති අතර, ඉන් අනතුරුව සිරුර පවුලේ ඥාතීන් වෙත භාරදීමට කටයුතු කර තිබේ. මෙය සැකකටයුතු මරණයක් සේ සලකා හෝමාගම පොලිස් ස්ථානයේ නිලධාරීන් විසින් සිද්ධිය සම්බන්ධයෙන් වැඩිදුර විමර්ශන කටයුතු සිදු කරනු ලබයි.
