දශක හතරකට ආසන්න කාලයක් කුරුණෑගල නගරයේ වීදි සැරිසැරූ, නමින් පමණක් මුළු රටම දැන සිටි ‘ඩයනා’ ගේ ජීවිත කතාව අවසන් වන්නේ දෙනගමුව ඇළේ මඩ සහ දියරැළි අතරිනි.
ලොව පැරණිම වෘත්තියට උරුමකම් කියූ ඇය, පසුගියදා පස්වරුවේ කුරිරු ලෙස ඝාතනය කර සමන්පුර ප්රදේශයෙන් ගලා බසින දෙනගමුව ඇළට දමා තිබියදී දොරටියාව පොලිසිය විසින් සොයාගනු ලැබීය. සිද්ධිය සම්බන්ධයෙන් දඹුල්ලේ පදිංචි හතළිස් පස් හැවිරිදි පලතුරු වෙළෙන්දෙකු පොලිස් අත්අඩංගුවට පත්වන්නේ ත්රිරෝද රථ රියැදුරෙකු ලබාදුන් තීරණාත්මක තොරතුරක් මතය.
නීතිවිරෝධී ගංජා ජාවාරමක් සම්බන්ධයෙන් අත්අඩංගුවට පත්වූ සිය මිතුරෙකුට ඇප තැබීම සඳහා කුරුණෑගලට පැමිණි මෙම සැකකරු, සිය රාජකාරිය නිමවීමෙන් පසු ඩයනාගේ සේවය ලබාගැනීමට එකඟ වී ඇත. රුපියල් දෙදහස් පන්සියයක මුදලක් කතාකරගත්තද, තමන් දැන් වයස්ගත යැයි පවසමින් ඇය ඔහුගෙන් ලබාගෙන ඇත්තේ රුපියල් දහසක් පමණි. සමන්පුර ලැගුම්හලකින් පිටවීමෙන් පසු ඇයව නොදුටු බවත්, තමන්ට ඇතිවූ උදරාබාධයක් හේතුවෙන් ශරීර කෘත්යය සඳහා ඇළට බැසි බවත් සැකකරු පවසයි.
එහෙත්, මහ වැසි මැද පිටාර ගලමින් තිබූ දෙනගමුව ඇළේ සැකකරු සහ අනුලා රාජපක්ෂ (ඩයනා) යම්කිසි පොරබැදීමක නිරතවනු දුටු බවට ත්රිරෝද රථ රියැදුරෙකු කළ හෙළිදරව්ව මෙම අබිරහසේ දිශානතිය මුළුමනින්ම වෙනස් කළේය. මුදල් ආරවුලක් හෝ වෙනත් ගැටුමක් දුරදිග ගොස්, ඇයව දියේ ගිල්වා මරා දමන්නට ඇති බවට පොලිසිය දැඩි ලෙස සැක කරන්නේ එබැවිනි.
ඩයනා යනු හුදු වීදි සරන කතක් පමණක් නොවූවාය. අසූව දශකයේ බ්රිතාන්යයේ ඩයනා කුමරියගේ මනබඳින "ඩයනා කට්" කොණ්ඩා මෝස්තරයෙන් හැඩගැන්වී මේ වෘත්තියට පිවිසි ඒ රූමත් තරුණිය, පසුකාලීනව කුරුණෑගල නගරයට ම නැතිවම බැරි, එහෙත් කිසිවෙකුටත් කරදරයක් නොකළ චරිතයක් බවට පත්වූවාය. ඇගේ සැබෑ නම හෝ ගම්පළාත නිශ්චිතව කිසිවෙකු නොදන්නා තරම්ය. ඇතැමුන් ඇය කෙළිමුනේ පදිංචිකාරියක යැයි පැවසුවද එයද ස්ථිර නැත.
එහෙත් ඇය තුළ සැඟවී සිටියේ සංවේදී, ආදරණීය මවකි. මුදල් පසුපසම හඹා නොගිය ඇය, නගරයේ නිකරුණේ රස්තියාදු වන පාසල් සිසුන්ට සැරවැර කර නිවෙස්වලට පන්නා දැමීමටත්, කුඩා දරුවන්ට සහ තරුණයන්ට කිසිදිනෙක කය නොවික්කීමටත් තරම් ප්රතිපත්තිගරුක වූ බව නගරවාසීහු සාක්ෂි දරති. සමාජ මාධ්යයේ පවා ඇය ඇතැම්විට හාස්යයට ලක්වුවද, ඈ පසුපස තිබුණේ කියාගත නොහැකි වූ ඛේදවාචකයක් විය හැකිය.
දිනක් මහමග දන්සලකින් බත් පාර්සලයක් ඉල්ලාගත් ඈට, තවත් එකක් අවශ්යදැයි ඇසූ විට, "මම දෙකක් කෑවොත් තව කවුරුහරි බඩගින්නේ ඉඳියි නේද පුතා" යැයි පැවසූ බවට පසුගියදා සමාජ මාධ්යයේ සටහනක් හුවමාරු විය. එය සමාජයේ පහළම ස්ථරයේ ජීවත් වූවත්, ඇගේ හදවතේ තිබූ මනුෂ්යත්වයේ ගැඹුර කියාපාන අපූරු කැඩපතකි.
තරුණ වියේදී අත්වූ යම් අවාසනාවන්ත ඉරණමක් හෝ අසරණකමක් නිසා මේ ගොරහැඩි මාවතට පිවිසෙන්නට ඇති ඈ, ජීවිතයේ සැඳෑ සමය වනතුරුම සමාජයේ විවිධ ගැරහුම් මැද තනිවම ජීවිතය ගැටගසා ගත්තාය. එහෙත්, කිසිවෙකුගේත් බත්පතක් උදුරා නොගත් ඒ අසරණ ගැහැනියගේ අවසන් හුස්ම, අඳුරු දිය දහරක් යට මෙලෙස අමානුෂිකව නිමාවීම සමස්ත සමාජයටම ඉතිරි කරන්නේ නිහඬ, කඳුළු පිරුණු ප්රශ්නාර්ථයකි.
