ඇමරිකානු ජනාධිපති ඩොනල්ඩ් ට්රම්ප් විසින් යුද්ධය අවසන් කිරීම සඳහා වූ ඇමරිකානු යෝජනාවලට ඉරානය ලබා දුන් ප්රතිචාරය "සම්පූර්ණයෙන්ම පිළිගත නොහැකි" බව පවසමින් ප්රතික්ෂේප කර තිබේ. ඔහු සිය 'Truth Social' සමාජ මාධ්ය ගිණුමේ සටහනක් තබමින් ප්රකාශ කර ඇත්තේ ඉරාන නියෝජිතයින්ගේ යැයි කියන ප්රතිචාරය තමා කියවූ බවත්, එය තමාට කිසිසේත්ම ප්රියමනාප නොවන බවත්ය.
මෙම ඉරාන යෝජනාව ඇමරිකාව වෙත යොමු කර ඇත්තේ පාකිස්තානයේ මැදිහත්වීම හරහා වන අතර, ඉරානයේ අර්ධ නිල පුවත් සේවයක් වන 'Tasnim' වාර්තා කරන පරිදි එමගින් ප්රධාන ඉල්ලීම් කිහිපයක් ඉදිරිපත් කර ඇත. සියලුම පෙරමුණුවල යුද්ධය වහාම අවසන් කිරීම, ඇමරිකානු නාවික අවහිරතා ඉවත් කිරීම සහ ඉරානයට එරෙහිව තවදුරටත් ප්රහාර එල්ල නොකරන බවට සහතික වීම එම ඉල්ලීම් අතරට අයත් වේ.
පසුගිය පෙබරවාරි මාසයේදී ඇමරිකාව සහ ඊශ්රායලය එක්ව ආරම්භ කළ මෙම යුද්ධය අවසන් කිරීමේ සාකච්ඡා සඳහා පහසුකම් සැලසීමේ අරමුණින් ක්රියාත්මක කළ සටන් විරාමය, වරින් වර සිදුවන සුළු වෙඩි හුවමාරු කිරීම් මධ්යයේ වුවද මේ දක්වා බොහෝ දුරට ආරක්ෂා වී තිබේ. මෙම තත්ත්වය යටතේ, ඉරානයේ යුද්ධය "ඉතා ඉක්මනින් නිමා වනු ඇති" බවට ජනාධිපති ට්රම්ප් මේ සතිය මුලදී ද නැවත වරක් අවධාරණය කළේය.
එහෙත් ඊශ්රායල අග්රාමාත්ය බෙන්ජමින් නෙතන්යාහු 'CBS' නාලිකාවේ '60 Minutes' වැඩසටහන සමඟ සම්මුඛ සාකච්ඡාවකට එක්වෙමින් ඊට වෙනස් අදහසක් පළ කර ඇත. ඔහු පෙන්වා දෙන්නේ ඉරානයට එරෙහි යුද්ධය අවසන් වූ බව සැලකීමට නම් ඊට පෙර ඉරානය සතු බලගන්වන ලද යුරේනියම් සංචිත විනාශ කර දැමිය යුතු බවත්, තවදුරටත් විසුරුවා හැරිය යුතු යුරේනියම් බලගැන්වීමේ මධ්යස්ථාන ඉරානය සතුව පවතින බවත්ය.
මේ අතර, ඉරාන ජනාධිපති මසූඩ් පෙසෙෂ්කියන් ඉරිදා දිනයේදී ඉරාන යෝජනාව පිළිබඳව සෘජුවම අදහස් දැක්වීමෙන් වැළකී සිටියද, තම ස්ථාවරය සම්බන්ධයෙන් පැහැදිලි කිරීමක් සිදු කළේය. සතුරා ඉදිරියේ කිසිදා හිස නමන්නේ නැති බවත්, සංවාදයක් හෝ සාකච්ඡාවක් ගැන කතා කිරීම යනු කිසිසේත්ම යටත් වීමක් හෝ පසුබැසීමක් නොවන බවත් ඔහු එහිදී වැඩිදුරටත් ප්රකාශ කර තිබුණි.
