2016 වර්ෂයේදී රාජගිරිය ප්රදේශයේදී සන්දීප් සම්පත් නමැති තරුණයා බරපතළ රිය අනතුරකට ලක් කර, ඊට අදාළ සාක්ෂි වසන් කිරීම සහ අසත්ය සාක්ෂි නිර්මාණය කිරීම යන චෝදනා මත හිටපු අමාත්ය පාඨලී චම්පික රණවක ඇතුළු තුන්දෙනෙකුට එරෙහිව පවරා ඇති නඩුවේ සාක්ෂි විභාගය කොළඹ මහාධිකරණ විනිසුරු රශ්මි සිංගප්පුලි මහතා ඉදිරියේදී ඊයේ (05) ආරම්භ විය. නීතිපතිවරයා විසින් ගොනු කර ඇති මෙම නඩුවේ සෙසු විත්තිකරුවන් ලෙස හිටපු අමාත්යවරයාගේ රියදුරු වන දිළුම් තුසිත කුමාර සහ එවකට වැලිකඩ පොලීසියේ ස්ථානාධිපතිවරයාව සිටි සහකාර පොලිස් අධිකාරී සුදත් අස්මඩල යන මහත්වරුන් නම් කර සිටිති.
පැමිණිල්ල මෙහෙයවමින් නියෝජ්ය සොලිසිටර් ජෙනරාල් යොහාන් අබේවික්රම මහතා විසින් පළමු සාක්ෂිකරු වන ගයාන් විනෝදක නමැත්තාගෙන් සාක්ෂි සටහන් කරගැනීම මෙහිදී සිදු කෙරිණි. අනතුර සිදුවූ දිනයේදී සිය මිතුරෙකු සමග යතුරුපැදියකින් ගමන් කරමින් සිටියදී දුමක් සහිත ස්ථානයක් දැක ඒ දෙසට ගිය බවත්, එහිදී අනතුරට ලක්ව සිටි සන්දීප්ව හඳුනාගෙන වහාම වාහනයක් මාර්ගයෙන් ඔහුව රෝහල්ගත කිරීමට පියවර ගත් බවත් සාක්ෂිකරු අධිකරණය හමුවේ පැවසීය. අනතුරුව, අනතුර සිදුකළ වාහනය සම්බන්ධයෙන් එම ස්ථානයේ සිටි පිරිස ලබාදුන් තොරතුරු මත තම යතුරුපැදියෙන් අදාළ ජීප් රථය ලුහුබැඳ ගොස් කෑගසමින් එය නවතා ගත් බව ඔහු වැඩිදුරටත් සඳහන් කළේය.
ජීප් රථය නැවැත්වීමෙන් පසු එහි මගී අසුන දෙසින් ගොස් රියදුරු අසුනේ සිටි පුද්ගලයාගෙන් හැඳුනුම්පත සහ රියදුරු බලපත්රය ඉල්ලා බැණ වදිමින් ඔහුට පහරදීමට තමා උත්සාහ කළ බව සාක්ෂිකරු විස්තර කළේය. එම අවස්ථාවේදී රියදුරු අසුනේ සිටියේ අව් කණ්ණාඩියක් පැළඳ, කළු පැහැති ටී ෂර්ටයකින් සැරසී සිටි උස පුද්ගලයෙකු බවත්, ඔහු තමන් පාඨලී චම්පික බව පවසමින් තමා සමග බොරැල්ල පොලීසියට යාමට පැමිණෙන ලෙස දැනුම් දුන් බවත් සාක්ෂිකරුගේ ප්රකාශයේ සඳහන් විය. රූපවාහිනියෙන් සහ පුවත්පත්වලින් නිතර දැක තිබූ බැවින් තමා එම පුද්ගලයාව හඳුනාගත් බව පැවසූ සාක්ෂිකරු, විවෘත අධිකරණයේ විත්ති කූඩුවේ සිටි හිටපු අමාත්යවරයාව පෙන්වමින් රියදුරු අසුනේ සිටියේ ඔහු බවට හඳුනා ගන්නා ලදී.
මෙම අවස්ථාවේදී පළමු විත්තිකාර පාඨලී චම්පික රණවක මහතා වෙනුවෙන් පෙනී සිටි ජනාධිපති නීතිඥ සරත් ජයමාන්න මහතා මූලික විරෝධතාවක් මතු කරමින් කියා සිටියේ, මෙම අනතුර සම්බන්ධයෙන් මහේස්ත්රාත් අධිකරණයේ පැවති නඩුවේදී දෙවන විත්තිකාර දිළුම් තුසිත කුමාර වරද පිළිගෙන ඇති බැවින්, එකම සිද්ධියකට විත්තිකරුවන් දෙදෙනෙකු සිටීම නීතියේ ආධිපත්යය කෙලෙසීමක් බවයි. කෙසේ වෙතත්, මහේස්ත්රාත් අධිකරණයේ පැවති ක්රියාපටිපාටිය මෙම මහාධිකරණ නඩු විභාගය සඳහා කිසිදු බාධාවක් නොවන බව නියෝජ්ය සොලිසිටර් ජෙනරාල්වරයා ඊට ප්රතිචාර දක්වමින් ප්රකාශ කළේය.
ඉන් අනතුරුව දෙවන විත්තිකාර රියදුරු දිළුම් තුසිත කුමාර වෙනුවෙන් පෙනී සිටි ජනාධිපති නීතිඥ මෛත්රී ගුණරත්න මහතා විසින් සාක්ෂිකරුගෙන් හරස් ප්රශ්න ඇසීම සිදු කළ අතර, ඉදිරිපත් වූ කරුණු සලකා බැලූ මහාධිකරණ විනිසුරුවරයා විසින් වැඩිදුර සාක්ෂි විභාගය අද (06) දින දක්වා කල් තැබීමට නියෝග කළේය.
