කෘත්රිම බුද්ධියේ (AI) ශීඝ්ර ව්යාප්තියත් සමඟ ලොව පුරා රැකියා වෙළෙඳපොළ දැඩි අර්බුදයකට මුහුණ දෙනු ඇතැයි බොහෝ දෙනා අපේක්ෂා කළහ. ෆෝචූන් 100 (Fortune 100) සමාගම් සඳහා සයිබර් ආරක්ෂණ විධායකයින් බඳවා ගන්නා ඔස්ටින් කෝවන් වැනි බඳවාගැනීමේ නිලධාරීන්ද මේ වසර නිහඬ වසරක් වනු ඇතැයි සිතුවද, සිදුවී ඇත්තේ එහි අනෙක් පැත්තයි.
දත්ත ආරක්ෂා කිරීම සහ කේත (code) පරීක්ෂා කිරීම සම්බන්ධයෙන් පළපුරුදු සයිබර් ආරක්ෂණ විශේෂඥයින් සඳහා මේ වන විට තාක්ෂණික සමාගම්වලින් ලැබෙන්නේ පෙර නොවූ විරූ දැවැන්ත ඉල්ලුමකි.මෙම හදිසි ඉල්ලුම ඉහළ යාමට ප්රධාන හේතුව වී ඇත්තේ කෘත්රිම බුද්ධිය හරහා මෘදුකාංග නිර්මාණය කිරීමේදී සිදුවන දෝෂ සහ දුර්වලතා වැඩි වීමයි. තාක්ෂණික සේවකයින් කේත ලිවීමට AI භාවිත කිරීම නිසා හැකර්වරුන්ට සමාගම්වල දත්ත ජාලයන්ට ඇතුළු වීමට නව අවස්ථා නිර්මාණය වී ඇත. ලින්ක්ඩ්ඉන් (LinkedIn) ආයතනයේ ප්රධාන තොරතුරු ආරක්ෂණ නිලධාරී ලීයා කිස්නර් පෙන්වා දෙන්නේ සමාගම්වලට මෙම දෝෂ වසංගතය සමග කටයුතු කිරීමට නව තාක්ෂණික නිපුණතා සහිත සේවකයින් අත්යවශ්ය වී ඇති බවයි.
විශේෂයෙන්ම Anthropic සමාගමේ Mythos සහ OpenAI හි GPT-5.4-Cyber වැනි නවතම AI මාදිලි හැකර්වරුන් විසින් අවභාවිත කරනු ඇතැයි යන බිය නිසා ගෝලීය වශයෙන් සයිබර් ආරක්ෂණ සූදානමක් නිර්මාණය වී තිබේ. Glassdoor රැකියා වෙබ් අඩවියට අනුව, වසරේ පළමු කාර්තුව තුළ සයිබර් ආරක්ෂණ රැකියා අවස්ථා 11% කින් ඉහළ ගොස් ඇත. දක්ෂ සයිබර් ආරක්ෂණ විධායකයින් සඳහා ඇති ඉල්ලුම කෙතරම්ද යත්, ඔවුන්ට ඩොලර් මිලියන 7ක් හෝ 8ක් වැනි අතිශය ඉහළ වැටුප් පැකේජ පවා ලබා දීමට ඇතැම් සමාගම් ඉදිරිපත් වී සිටින අතර, තොරතුරු තාක්ෂණ ක්ෂේත්රයේ බඳවාගැනීම් සිදුකරන Hitch Partners වැනි ආයතන වෙත ලැබෙන ඉල්ලුම් ප්රමාණයද පස් හය ගුණයකින් පමණ වැඩි වී ඇත.
කෙසේ වෙතත්, කෘත්රිම බුද්ධිය ආශ්රිතව මෙම නව රැකියා නිර්මාණය වුවද, Meta සමාගමෙන් සේවකයින් 8,000ක් හා Amazon සමාගමෙන් සේවකයින් 16,000ක් දොට්ට දැමීම වැනි දැවැන්ත රැකියා අහිමිවීම් මෙමගින් සම්පූර්ණයෙන්ම ආවරණය නොවන බවද විචාරකයෝ පෙන්වා දෙති. මේ නිසාම බ්රයන් ගෝඩෙන්ටි වැනි සයිබර් ආරක්ෂණ ඉංජිනේරුවන් අවධාරණය කරන්නේ, වර්තමාන රැකියා වෙළෙඳපොළ තුළ තරගකාරීව රැඳී සිටීම සඳහා සාම්ප්රදායික තාක්ෂණික සේවකයින්ද කෘත්රිම බුද්ධිය පිළිබඳව හැදෑරීම සහ ඒ හරහා සිය කුසලතා වර්ධනය කර ගැනීම අත්යවශ්ය වී ඇති බවයි.
