පසුගිය මැයි 19 වන දින ඊජිප්තුවේ හර්ගාඩා නුවර සිට මගීන් 180 දෙනෙකු රැගෙන ලන්ඩනයේ ලූටන් බලා පියාසර කරමින් තිබූ ඊසිජෙට් (easyJet) ගුවන් යානයක් හදිසියේම රෝමය වෙත ගොඩබෑමට පියවර ගෙන තිබේ. මෙලෙස යානය වෙනත් ගමනාන්තයකට හැරවීමට ප්රධාන හේතුව වී ඇත්තේ, ගුවන් යානයේ භාණ්ඩ සහ ගමන් මලු රඳවන කුටියේ (hold luggage) තිබූ බෑගයක් තුළ ජංගම දුරකථනයකට සම්බන්ධ කර චාජ් වෙමින් තිබූ පවර් බෑන්ක් (power bank) උපකරණයක් පිළිබඳව මගියෙකු විසින් කාර්ය මණ්ඩලය දැනුවත් කිරීමයි.
ගුවන් ගමන ආරම්භ වී පැය තුනකට පමණ පසු මෙම අනතුරු ඇඟවීම ලැබීමත් සමඟම, ගුවන් නියමුවා වහාම ක්රියාත්මක වී විනාඩි 20ක් ඇතුළත රෝමයේ ෆියුමිසිනෝ ගුවන් තොටුපළ වෙත යානය සුරක්ෂිතව ගොඩබස්වා ඇත. මෙම හදිසි ගොඩබෑම හේතුවෙන් මගීන්ට රාත්රී නවාතැන් පහසුකම් ලබා දීමට ගුවන් සමාගම පියවර ගත් අතර, ඔවුන්ට පසුදින පස්වරු 2.00ට පමණ ලූටන් බලා යන වෙනත් ගුවන් යානයකින් සිය ගමනාන්තය කරා යාමට පහසුකම් සලසා දී තිබුණි. ගුවන් යානයේ ගමන් කළ 57 හැවිරිදි පෝල් කැස්ටර්ටන් නැමැති මගියා පවසා සිටියේ, යානය හදිසියේම දිශාව වෙනස් කර පහතට ගමන් කරන විට මගීන් දැඩි බියට පත් වූ බවත්, ගමන් මලු කුටිය තුළ බෝම්බයක් නොමැති වීම පිළිබඳව පසුව සියලු දෙනාම සැනසුම් සුසුම් හෙලූ බවත්ය.
මෙවැනි අතේ ගෙන යා හැකි ආරෝපණ උපකරණ අධික ලෙස රත්වීම හෝ කෙටි පරිපථ ඇතිවීම හේතුවෙන් ගිනි ගැනීම් සහ ආරක්ෂිත අවදානම් මතු විය හැකි බැවින්, බොහෝ ගුවන් සමාගම් මේ වන විටත් ඒ සම්බන්ධයෙන් දැඩි නීතිරීති පනවා ඇත. ඊසිජෙට් සමාගමේ මාර්ගෝපදේශයන්ට අනුව, ලිතියම් බැටරි සහිත පවර් බෑන්ක් රැගෙන යා හැක්කේ මගීන්ගේ අත් බෑගයේ පමණක් වන අතර, ඒවා ගමන් මලු රඳවන ප්රධාන කුටියේ තැබීම සපුරා තහනම් වේ. තවද, එම උපකරණවල ධාරිතාවය වොට් පැය 160 (160Wh) නොඉක්මවිය යුතු අතර, ගුවන් ගමන අතරතුර ගුවන් යානය තුළදී වෙනත් උපකරණ චාජ් කිරීම සඳහා ඒවා භාවිතා කිරීම ද සම්පූර්ණයෙන්ම තහනම් කර ඇත.
ගුවන් මගීන්ගේ සහ කාර්ය මණ්ඩලයේ ආරක්ෂාව තම ප්රමුඛතම වගකීම වන බව ඊසිජෙට් සමාගමේ ප්රකාශකයෙකු මාධ්ය වෙත සඳහන් කර තිබේ. පසුගිය වසරේදී එයාර් චයිනා ගුවන් සේවයට අයත් A321 එයාර්බස් යානයක් තුළ ද මෙලෙස පවර් බෑන්ක් එකක් අධික ලෙස රත්වී ගිනි ගැනීමේ සිද්ධියක් වාර්තා වූ අතර, එහිදී කාර්ය මණ්ඩලය විසින් ගින්න වහාම නිවා දැමීමට සමත් විය. මෙම ආරක්ෂක අවදානම් තත්ත්වයන් සැලකිල්ලට ගනිමින්, මේ වසරේ මුලදී ලුෆ්තාන්සා ගුවන් සමාගම ද ගුවන් ගමන් වලදී පවර් බෑන්ක් භාවිතය තහනම් කිරීමට පියවර ගත් අතර, බ්රිතාන්ය ගුවන් සේවය (British Airways) ද වොට් පැය 100ට වැඩි ධාරිතාවයකින් යුත් පවර් බෑන්ක් ගුවන් යානය තුළට රැගෙන යාම තහනම් කර තිබේ.