ශ්රී ලංකාවේ මුදල්, සැලසුම් සහ ආර්ථික සංවර්ධන අමාත්යාංශය යටතේ පවතින ජනලේඛන හා සංඛ්යාලේඛන දෙපාර්තමේන්තුව විසින් 2026 අප්රේල් මාසය සඳහා වන ජාතික පාරිභෝගික මිල දර්ශකය සහ මාසික පාරිභෝගික උද්ධමන අනුපාතය අද දින ප්රකාශයට පත් කරනු ලැබීය. 2021 වර්ෂය පදනම් වර්ෂය ලෙස සලකා මෙම ගණනය කිරීම් සිදු කර ඇත.
ඒ අනුව, ශ්රී ලංකාවේ සමස්ත ලක්ෂ්යමය උද්ධමන අනුපාතය 2026 අප්රේල් මාසයේදී සියයට 4.7ක් ලෙස වාර්තා වේ. පසුගිය 2026 මාර්තු මාසයේදී 210.9 ක් ලෙස පැවති ජාතික පාරිභෝගික මිල දර්ශකය මෙම අප්රේල් මාසයේදී 216.3 දක්වා වර්ධනය වී තිබේ. තවද, 2021 දර්ශක යොමු කාලයට සාපේක්ෂව පොදු මිල මට්ටමෙහි සමස්ත වැඩිවීම සියයට 116.3ක් ලෙස සටහන් වේ.මෙම උද්ධමන අගයන් ගණනය කිරීමේදී ආහාර කාණ්ඩය සඳහා සියයට 39.22ක බර තැබීමක්ද, ආහාර නොවන කාණ්ඩය සඳහා සියයට 60.78ක බර තැබීමක්ද සිදු කර ඇත. 2026 අප්රේල් මාසය සඳහා ආහාර කාණ්ඩයේ ලක්ෂ්යමය උද්ධමන අනුපාතය සියයට 1.1ක් ලෙස වාර්තා වන අතර, ආහාර නොවන කාණ්ඩයේ ලක්ෂ්යමය උද්ධමන අනුපාතය සියයට 7.8ක් ලෙස දැක්වේ. සමස්ත ලක්ෂ්යමය උද්ධමන අනුපාතය වන සියයට 4.7ක අගය සඳහා ආහාර කාණ්ඩය මගින් සියයට 0.5ක දායකත්වයක් සහ ආහාර නොවන කාණ්ඩය මගින් සියයට 4.3ක දායකත්වයක් සපයා තිබේ. දර්ශකයේ මාසික වෙනස් වීමට ආහාර කාණ්ඩය මගින් සියයට 0.46ක බලපෑමක් සහ ආහාර නොවන කාණ්ඩය මගින් සියයට 2.08ක බලපෑමක් ඇති කර ඇත.
ආහාර නොවන කාණ්ඩය යටතේ විවිධ අංශවල උද්ධමන අනුපාතයන් 2026 මාර්තු මාසයට සාපේක්ෂව අප්රේල් මාසයේදී කැපී පෙනෙන වෙනස්කම් පෙන්නුම් කරයි. ඒ අනුව, අප්රේල් මාසය තුළ ප්රවාහන අංශයේ උද්ධමනය සියයට 14.3ක් ලෙසත්, අධ්යාපන අංශයේ උද්ධමනය සියයට 8.9ක් ලෙසත් ඉහළ අගයක වාර්තා වේ. මීට අමතරව, නිවාස, ජලය, විදුලිය සහ ගෑස් ඇතුළු කාණ්ඩයේ උද්ධමනය සියයට 7.8ක් ද, ආපනශාලා සහ හෝටල් කාණ්ඩයේ උද්ධමනය සියයට 6.7ක් ද වේ. මධ්යසාර පාන වර්ග සහ දුම්කොළ කාණ්ඩය සියයට 2.5ක සහ විනෝදාත්මක හා සංස්කෘතික කාණ්ඩය සියයට 2.3ක උද්ධමනයක් අප්රේල් මාසය සඳහා සටහන් කර ඇත.
නිතර මිල වෙනස්වන ආහාර, බලශක්ති හා ප්රවාහන වියදම් ඉවත් කළ පසු ගණනය කරනු ලබන යටිදැරි ලක්ෂ්යමය උද්ධමන අනුපාතය අප්රේල් මාසය සඳහා සියයට 4.4ක් ලෙස ප්රකාශයට පත් කර තිබේ. 2026 මාර්තු මාසයේදී 198.6 ක් ලෙස පැවති යටිදැරි ජාතික පාරිභෝගික මිල දර්ශකය 2026 අප්රේල් මාසයේදී 202.2 දක්වා වැඩි වී ඇත. මීළඟ මාසය එනම්, 2026 මැයි මාසය සඳහා වන ජාතික පාරිභෝගික මිල දර්ශකය 2026 ජූනි මස 22 වන දින පස්වරු 3.00 ට නිකුත් කිරීමට ජනලේඛන හා සංඛ්යාලේඛන දෙපාර්තමේන්තුව විසින් සැලසුම් කර තිබේ.
