බොදු බල සේනා සංවිධානය වෙත අමාත්ය බිමල් රත්නායක මහතා විසින් පසුගියදා පාර්ලිමේන්තුවේදී එල්ල කරන ලද චෝදනාවලට ප්රතිචාර දැක්වීම සඳහා එම සංවිධානයේ ලේකම් පූජ්ය ගලගොඩඅත්තේ ඥානසාර හිමියන් විසින් විශේෂ මාධ්ය හමුවක් පවත්වන ලදී. රාජපක්ෂ රජය විසින් බොදු බල සේනා සංවිධානයට මුදල් ලබා දෙමින් මුස්ලිම් විරෝධයක් නිර්මාණය කළ බවටත්, එමඟින් ඉස්ලාම් අන්තවාදයට මාවත විවර වූ බවටත් එල්ල වන චෝදනා උන්වහන්සේ එහිදී දැඩි ලෙස ප්රතික්ෂේප කළහ.
වත්මන් රජයට දැන් බලය හිමිව ඇති බැවින්, එලෙස මුදල් ලබා දුන්නේ නම් ඒ කුමන ගිණුම් හරහාදැයි වහාම රටට හෙළි කරන ලෙස ඥානසාර හිමියෝ රජයට අභියෝග කළහ. දේශපාලන වාසි තකා මෙවැනි අසත්ය ප්රකාශ පාර්ලිමේන්තු වරප්රසාද මුවාවෙන් සිදු කිරීම බලවත් වරදක් බවත්, මෙරට ක්රියාත්මක ඉස්ලාම් අන්තවාදයේ සැබෑ ස්වභාවය යටපත් කිරීමට විවිධ දේශපාලන පක්ෂ කටයුතු කරන බවත් උන්වහන්සේ පෙන්වා දුන්හ.මෙරට ඉස්ලාම් අන්තවාදය සම්බන්ධයෙන් තම සංවිධානය හඬ නැගීම ආරම්භ කළේ 2012 වසරේදී සාම්ප්රදායික සූෆි මුස්ලිම්වරුන්ගෙන් ලද ඉල්ලීම් මත බව උන්වහන්සේ මෙහිදී අවධාරණය කළහ. වහාබ්වාදීන්ගෙන් තමන්ට සිදුවන තාඩන පීඩන සම්බන්ධයෙන් සූෆි මුස්ලිම් ජනතාව විසින් බොදු බල සේනා සංවිධානය වෙත ලිඛිතව දැනුම් දී තිබූ බවත්, ඊට පෙර 2007 වසරේදී එවකට බස්නාහිර පළාත් ආණ්ඩුකාර අලෙවි මවුලානා මහතා විසින්ද වහාබ්වාදය මෙරට ජාතික ආරක්ෂාවට බරපතළ තර්ජනයක් බවට පූර්ව අනතුරු ඇඟවීමක් කර තිබූ බවත් මාධ්ය හමුවේදී අනාවරණය කෙරිණි. 2004 සහ 2006 වසර වලදී කාතන්කුඩි සහ තිහාරිය ඇතුළු ප්රදේශ කිහිපයක සාම්ප්රදායික මුස්ලිම්වරුන්ගේ දේවස්ථානවලට සහ නායකයින්ට එල්ල වූ ප්රහාර පිළිබඳව සිහිපත් කළ උන්වහන්සේ, මෙම අන්තවාදී වර්ධනය පිළිබඳව සියලුම රජයේ බුද්ධි අංශ මෙන්ම දේශපාලන පක්ෂද මනාව දැන සිටි බව ප්රකාශ කළහ.
ජාතික ජන බලවේගය ඇතුළු ප්රධාන දේශපාලන ප්රවාහයේ කිසිදු පක්ෂයක් මෙම සැබෑ මුස්ලිම් අන්තවාදී අර්බුදය පිළිබඳව නිසි අයුරින් සාකච්ඡා කර නොමැති අතර, බලය ලබා ගැනීමේ අරමුණින් ඔවුන් නිරතුරුවම සත්ය වසන් කරමින් සිටින බවට ඥානසාර හිමියෝ චෝදනා නැගූහ. පාස්කු ඉරිදා ත්රස්ත ප්රහාරයට සම්බන්ධ ඉබ්රාහිම් වැනි පුද්ගලයින් මෙන්ම, අන්තවාදය පෝෂණය කළ බවට චෝදනා ලබන ෆස්ලුල් හක් වැනි පුද්ගලයින්ද ප්රධාන දේශපාලන පක්ෂ සමඟ සෘජු සබඳතා පවත්වා ඇති බවට ඡායාරූප සහ සාක්ෂි සහිතව උන්වහන්සේ කරුණු ඉදිරිපත් කළහ. එපමණක් නොව, සැබෑ අන්තවාදය පිළිබඳව හඬ නගන පිරිස් ජාතිවාදීන් ලෙස හංවඩු ගසමින් මර්දනය කිරීමට කටයුතු කිරීම හේතුවෙන් පාස්කු ප්රහාරය වැනි ඛේදවාචකයක් රටට අත්විඳීමට සිදුවූ බවත්, අන්තවාදී කණ්ඩායම් තම න්යායපත්ර ක්රියාත්මක කිරීම සඳහා සියලුම ආණ්ඩු සූක්ෂම ලෙස භාවිතා කර ඇති බවත් උන්වහන්සේ පෙන්වා දුන්හ.
පාස්කු ප්රහාරයේ සැබෑ මහ මොළකරුවන් සෙවීම දේශපාලනීකරණය වී ඇති බව පවසන බොදු බල සේනා ලේකම්වරයා, ඉස්ලාම් අන්තවාදී ප්රශ්නය දේශපාලනයෙන් බැහැර කර එය බුද්ධිමත්ව විග්රහ කරගත යුතු බව අවධාරණය කළේය. පාස්කු ප්රහාරය සම්බන්ධයෙන් වන වාර්තා අධ්යයනය කරමින් පාර්ලිමේන්තු මන්ත්රී උදය ගම්මන්පිල මහතා විසින් මෑතකදී එළිදක්වන ලද කෘතිය ඇගයීමට ලක් කළ උන්වහන්සේ, පිටු පනස්දහසකට අධික තොරතුරු සංක්ෂිප්ත කර ජාතියට ඉදිරිපත් කිරීම සම්බන්ධයෙන් ඔහුට කෘතවේදීත්වය පළ කළහ. එසේම, පාස්කු ප්රහාරයේ මහ මොළකරු කවුරුන්ද යන්න සහ අන්තවාදයේ සැබෑ ස්වරූපය පිළිබඳව සියලු තොරතුරු ඇතුළත් සවිස්තරාත්මක හෙළිදරව්වක් 'බුද්ධිමය මිසයිලයක්' ලෙස නුදුරේදීම තමන් විසින් රටට ඉදිරිපත් කිරීමට සූදානම් වන බවද ගලගොඩඅත්තේ ඥානසාර හිමියෝ මෙම මාධ්ය හමුවේදී වැඩිදුරටත් ප්රකාශ කළහ.
