ඇමරිකා එක්සත් ජනපදයේ 250 වැනි නිදහස් සංවත්සරය සැමරීම නිමිත්තෙන් නිකුත් කෙරෙන නව අමෙරිකානු ගමන් බලපත්ර සඳහා එරට ජනාධිපති ඩොනල්ඩ් ට්රම්ප්ගේ රුව ඇතුළත් කිරීමට රාජ්ය දෙපාර්තමේන්තුව තීරණය කර තිබේ. ජනාධිපතිවරයාගේ නාමය සහ රුව දැනටමත් විවිධ නිල ගොඩනැගිලි, නව මුදල් කාසි සහ ජාතික වනෝද්යාන බලපත්රවල සටහන් කර ඇති අතර, මෙම නවතම පියවර එහි තවත් එක් දිගුවක් ලෙස සැලකේ.
රාජ්ය දෙපාර්තමේන්තුව විසින් නිකුත් කරන ලද නිල නිවේදනයේ විශේෂ ගමන් බලපත්රයක් පිළිබඳව සඳහන් කර තිබුණද, එහි ජනාධිපතිවරයාගේ රුව ඇතුළත් වන බවක් දක්වා නොතිබුණි. එහෙත් ඔවුන් විසින් මුදාහැර ඇති ආදර්ශන (renders) රූප මගින් ජනාධිපතිවරයාගේ දෙවන ධුර කාලයේ නිල ඡායාරූපය ගමන් බලපත්රයේ එක් පිටුවක මුද්රණය කර ඇති බව තහවුරු වේ. මෙම ඡායාරූපය 1776 මුල් ජනපද දහතුනේ නිදහස් ප්රකාශන ලේඛනය මත ස්ථාපනය කර ඇති අතර, ඊට ඉහළින් රන්වන් පැහැති අකුරින් ඔහුගේ අත්සනද සටහන් කර ඇත. ගමන් බලපත්රයේ මීළඟ පිටුවේ නිදහස් ප්රකාශනයට අත්සන් තබන ඓතිහාසික අවස්ථාව නිරූපණය කෙරෙන සිතුවමක්ද අන්තර්ගත වේ.
මවුන්ට් රෂ්මෝර් ස්මාරකයේ සිතුවමක් හැරුණු විට, මින් පෙර අමෙරිකානු ගමන් බලපත්රවල කිසිදු ජනාධිපතිවරයෙකුගේ රුවක් මෙලෙස සටහන් කර නොතිබීම විශේෂත්වයකි. ඇමෙරිකානු රාජ්යතාන්ත්රික ප්රකාශක ටොම් පිගොට් ප්රකාශ කරන පරිදි, ලොව ආරක්ෂිතම ගමන් බලපත්රය ලෙස අමෙරිකානු ගමන් බලපත්රයට ඇති පිළිගැනීම සහ එහි ආරක්ෂක විධිවිධාන එලෙසම පවත්වා ගනිමින්, විශේෂයෙන් නිර්මාණය කරන ලද කලාත්මක සිතුවම් සහ වඩාත් නිවැරදි රූප මෙම නව සංස්කරණය සඳහා යොදාගනු ඇත. කෙසේ වෙතත්, මෙම විශේෂ සංවත්සර ගමන් බලපත්රය මේ වසරේදී නව ගමන් බලපත්ර සඳහා අයදුම් කරන සැමටම නිකුත් කරන්නේද, නැතහොත් එය ඉල්ලා සිටින අයට පමණක් ලබා දෙන්නේද යන්න මෙතෙක් පැහැදිලි කර නැත.
මීට සමගාමීව, ජාතියේ 250 වැනි සංවත්සරය වෙනුවෙන් වත්මන් ජනාධිපතිවරයාගේ රුව රැගත් සාමාන්ය භාවිතයේ පවතින එක් ඩොලරයේ කාසි මෙන්ම විශේෂ සමරු රන් කාසිද නිකුත් කරන බව එක්සත් ජනපද මුදල් නෝට්ටු සහ කාසි මුද්රණාගාරය නිවේදනය කර ඇත. බලයේ සිටින ජනාධිපතිවරයෙකුගේ අත්සන සහිතව මුදල් නෝට්ටු නිකුත් කරන ඉතිහාසයේ පළමු අවස්ථාව සනිටුහන් කරමින්, ට්රම්ප්ගේ අත්සන සහිතව නව මුදල් නෝට්ටු නිකුත් කිරීමට භාණ්ඩාගාර දෙපාර්තමේන්තුවද කටයුතු කරමින් සිටී. තවද, නිදහස් සංවත්සරය සැමරීමේ අරමුණින් ජනවාරි පළමුවැනිදා සිට ජාතික වනෝද්යානවල වාර්ෂික ප්රවේශපත්ර සඳහාද ජනාධිපතිවරයාගේ රුව එක් කිරීමට ජාතික වනෝද්යාන සේවය පියවර ගෙන තිබේ.
ජනාධිපතිවරයාගේ පෞද්ගලික සලකුණු ෆෙඩරල් දේපළ හා ලේඛනවලට මෙලෙස එකතු කළ පළමු අවස්ථාව මෙය නොවේ. ඔහුගේ නමින් නව යුද නෞකා කාණ්ඩයක් ඉදිකිරීමට පෙන්ටගනය තීරණය කර ඇති අතර, ඝාතනයට ලක්වූ හිටපු ජනාධිපතිවරයෙකු සිහිවීම පිණිස ඉදිකළ 'කෙනඩි කලා මධ්යස්ථානයේ' නමට "ට්රම්ප්" යන නාමයද එක් කිරීමට එහි පාලක මණ්ඩලය අනුමැතිය ලබා දී ඇත. රාජ්ය දෙපාර්තමේන්තුවට අනුබද්ධ ආයතනයක් වන එක්සත් ජනපද සාම ආයතනයද මේ වනවිට 'ට්රම්ප් ආයතනය' ලෙස නම් කර තිබේ. මීට අමතරව, අමෙරිකාවේ ස්ථිර පදිංචිය ලබා ගැනීම සඳහා ඩොලර් මිලියන එකත් පහත් අතර මුදලක් ආයෝජනය කිරීමට සූදානම් විදේශිකයන් වෙනුවෙන් හඳුන්වා දුන් නව වීසා කාණ්ඩයකටද ඔහුගේ නම යොදා ඇත.
සිය දෙවැනි ධුර කාලය තුළදී ජනාධිපතිවරයා තවත් නව ව්යාපෘති කිහිපයක්ම හඳුන්වා දී තිබේ. ඒ යටතේ වට්ටම් සහිතව ඖෂධ මිලදී ගැනීම සඳහා ‘TrumpRx.gov’ නමින් නව වෙබ් අඩවියක් නිර්මාණය කර ඇති අතර, ළමුන් සඳහා ධවල මන්දිරය විසින්ම හඳුන්වනු ලබන ‘ට්රම්ප් ගිණුම්’ (Trump accounts) නමින් නව ඉතුරුම් ගිණුම් ක්රමයක්ද ආරම්භ කර ඇත.
