දිවයින පුරා රජයේ රෝහල්වල ක්රියාත්මක වූ පැය 48ක සංකේත වැඩ වර්ජනය අද (11) උදෑසන 8.00න් නිමාවට පත් වූ බව රජයේ වෛද්ය නිලධාරීන්ගේ සංගමය පවසයි. ඒ අනුව මේ වන විට දිවයිනේ සියලුම රෝහල්වල සාමාන්ය සේවා කටයුතු යථා තත්ත්වයට පත්ව ඇති බව එම සංගමය තහවුරු කර සිටී.
මේ සම්බන්ධයෙන් අදහස් දක්වමින් රජයේ වෛද්ය නිලධාරීන්ගේ සංගමයේ මාධ්ය ප්රකාශක, වෛද්ය චමිල් විජේසිංහ මහතා ප්රකාශ කළේ අද උදෑසන අටෙන් පසුව වෛද්යවරුන් සිය රාජකාරි සඳහා සාමාන්ය පරිදි වාර්තා කර ඇති බවයි. සමස්ත රෝහල් පද්ධතියම මේ වන විට බාධාවකින් තොරව තම දෛනික මෙහෙයුම් කටයුතු සහ රෝගී සත්කාරක සේවාවන්හි නිරත වෙමින් සිටින බවද හෙතෙම අවධාරණය කළේය.
කෙසේ වෙතත්, සිය සංගමය ඉදිරියේදී ගැනීමට නියමිත වෘත්තීය පියවර කුමක්ද යන්න පිළිබඳව එළඹෙන විධායක කමිටු රැස්වීමේදී සාකච්ඡා කර නිශ්චිත තීරණයකට එළඹෙන බවද මාධ්ය ප්රකාශකවරයා සඳහන් කළේය. සිංහල හා දෙමළ අලුත් අවුරුද්දෙන් පසුව එකී අනාගත තීරණ කඩිනමින් රටට දැනුම් දීමට අපේක්ෂා කරන බවත්, අදාළ ගැටලුව මේ වන විට අධිකරණය හමුවට ද යොමු කර ඇති බැවින් ඒ පිළිබඳවද දැඩි අවධානයක් යොමු කරමින් ඉදිරි කටයුතු සැලසුම් කරන බවත් වෛද්ය චමිල් විජේසිංහ මහතා වැඩිදුරටත් කියා සිටියේය.
