කුඩා කල සිටම අප බොහෝ දෙනෙකු අසා ඇති ප්රධාන මිථ්යාවක් නම්, වැරදීමකින් චුයින්ගම් (chewing gum) එකක් ගිල දැමුවහොත් එය වසර හතක් පමණ ආමාශයේ ඇලී පවතිනු ඇති බවයි. නමුත් සෞඛ්ය විශේෂඥයින් පෙන්වා දෙන්නේ මෙය කිසිදු විද්යාත්මක පදනමක් නොමැති හුදු බියක් පමණක් බවයි.
එදිනෙදා ජීවිතයේදී මානසික ආතතිය අඩු කර ගැනීමට සහ මුඛයට නැවුම් බවක් ලබා දීමට බහුලව භාවිත කරන චුයින්ගම් එකක් අහම්බෙන් ගිලීමෙන් කිසිදු බරපතල සෞඛ්ය ගැටලුවක් මතු නොවන බව වෛද්ය විද්යාත්මකව මේ වන විට තහවුරු කර ඇත.චුයින්ගම් කෘත්රිම ද්රව්ය යොදාගෙන නිපදවා ඇති බැවින් අපගේ ඛේටයට හෝ ආමාශයේ ඇති ආහාර ජීර්ණ යුෂ වලට එය සම්පූර්ණයෙන්ම දිය කර හැරීමට නොහැකි බව සත්යයකි. එසේ වුවද, අපගේ ආහාර ජීර්ණ පද්ධතිය සැකසී ඇත්තේ ගිල දමන ඕනෑම දෙයක් ඉදිරියට ගමන් කරවීමේ හැකියාව සහිතවය. ඒ අනුව, නොදිරන තත්ත්වයෙන්ම ආමාශයෙන් බඩවැල් වෙත ගමන් කරන චුයින්ගම්, අනෙකුත් ආහාර කොටස් මෙන්ම ශරීරය හරහා ගමන් කර මළපහ සමඟින් පිටවී යයි. සාමාන්යයෙන් දින හතරක් හෝ පහක් වැනි කෙටි කාලයක් තුළදී මෙය සම්පූර්ණයෙන්ම සහ ස්වභාවිකවම ශරීරයෙන් බැහැර වීම සිදු වේ.
ගිල දමන ලද චුයින්ගම් අභ්යන්තර අවයවවල හෝ ආමාශ බිත්තියේ ඇලී පවතින බවට ඇති විශ්වාසය සම්පූර්ණයෙන්ම වැරදි සහගතය. මෙය ආහාර ජීර්ණ පද්ධතියේ ස්වභාවික ක්රියාකාරීත්වයට හෝ චලනයන්ට කිසිදු ආකාරයක බාධාවක් ඇති කරන්නේ නැත. බොහෝ දෙනා බිය වන ආකාරයට වැරදීමකින් ගිලෙන කුඩා චුයින්ගම් කැබැල්ලක් නිසා බඩේ කැක්කුම, අජීර්ණය, වමනය හෝ මලබද්ධය වැනි රෝගී තත්ත්වයන් ඇති වන්නේ ද නැත. කෙසේ වෙතත්, මෙහි අඩංගු කෘත්රිම සංඝටක ආහාරයක් ලෙස සැලකිය නොහැකි බැවින්, චුයින්ගම් ගිලීම පුරුද්දක් කර ගැනීමෙන් වළකින ලෙස වෛද්යවරුන් විසින් වැඩිදුරටත් උපදෙස් දෙනු ලබයි.
