2026 ඉන්දීය ප්රිමියර් ලීග් ක්රිකට් තරගාවලියේ ඉතිරි තරග සඳහා සන්රයිසස් හයිද්රාබාද් කණ්ඩායම විසින් ශ්රී ලංකා වේග පන්දු යවන ක්රීඩක දිල්ෂාන් මධුශංකව සිය සංචිතයට ඇතුළත් කරගෙන තිබේ. ඔහු මෙලෙස කණ්ඩායමට කැඳවා ඇත්තේ ආබාධයකට ලක්ව සිටින බ්රයිඩන් කාර්ස් වෙනුවට ප්රතිස්ථාපන ක්රීඩකයෙකු වශයෙනි.
බ්රයිඩන් කාර්ස් මෙලෙස අතෙහි ආබාධයකට ලක්වූයේ රෝයල් චැලෙන්ජර්ස් බැංගලෝර් කණ්ඩායමට එරෙහිව පැවති පළමු තරගයට පෙර පැවති දැල් පුහුණුවීම් අතරතුර පන්දුවට පහරදෙමින් සිටියදීය. ඒ අනුව, වම් අතින් මඳ වේග පන්දු යවන මධුශංක ඉන්දීය රුපියල් ලක්ෂ 75ක වටිනාකමකට හයිද්රාබාද් කණ්ඩායම සමඟ එක්වනු ඇත. මීට පෙර මුම්බායි ඉන්දියන්ස් සංචිතය නියෝජනය කළ ද, ඔහුට මේ දක්වා කිසිදු අයි.පී.එල්. තරගයකට ක්රීඩා කිරීමේ අවස්ථාවක් හිමිවී නොමැත.
ආබාධයකින් සුවය ලබමින් සිටින නිත්ය නායක පැට් කමින්ස්ගේ සහභාගීත්වයෙන් තොරව තරගාවලියට මුහුණ දෙන සන්රයිසස් කණ්ඩායම, මෙවර තරග වාරයේ මේ දක්වා ක්රීඩා කළ තරග පහෙන් තරග දෙකක ජයග්රහණය තහවුරු කරගෙන ඇත. පසුගිය සඳුදා රාජස්ථාන් රෝයල්ස් කණ්ඩායම ලකුණු 57කින් පරාජය කිරීමත් සමඟ ඔවුන් මේ වන විට ප්රසාද ලකුණු සටහනේ සිව්වන ස්ථානයේ පසුවන අතර, ඔවුන්ගේ මීළඟ තරගය එළඹෙන අප්රේල් 18 වනදා චෙන්නායි සුපර් කිංග්ස් කණ්ඩායමට එරෙහිව පැවැත්වීමට නියමිතව තිබේ.
