මයිකල් ජැක්සන්ගේ ජීවිත කතාව අලළා නිර්මාණය වූ නවතම සිනමාපටය වන 'මයිකල්' (Michael) විචාරකයින්ගේ දැඩි දෝෂදර්ශනයට ලක්ව ඇති අතර, බොහෝ දෙනෙකු එය හඳුන්වන්නේ ඔහුගේ ජීවිතයේ සැබෑ සිදුවීම් වසන් කරමින් නිර්මාණය කළ එකක් ලෙසිනි. ජැක්සන් පවුලේ සාමාජිකයෙකු වන ජාෆාර් ජැක්සන් විසින් පොප් රජුගේ චරිතය නිරූපණය කරන මෙම චිත්රපටය, ජැක්සන් ෆයිව් (Jackson 5) සංගීත කණ්ඩායම හරහා මයිකල්ගේ නැගී සිටීමේ සිට ඔහුගේ අතිසාර්ථක ඒකල සංගීත ගමන දක්වා වූ කතාව රැගෙන එයි.
කෙසේ වෙතත්, චිත්රපටය මගින් ඔහුගේ ගායන හා නර්තන කුසලතා ඉස්මතු කිරීමට සමත් වී ඇතත්, ඔහුට එල්ල වූ ලිංගික අපයෝජන චෝදනා පිළිබඳව කිසිදු සඳහනක් මෙහි අන්තර්ගත නොවීම විචාරකයින්ගේ දැඩි විවේචනයට හේතු වී තිබේ.මයිකල් ජැක්සන්ගේ බූදලයේ (estate) මූල්ය දායකත්වයෙන් නිර්මාණය වී ඇති මෙම චිත්රපටයේ සංගීත නිර්මාණ සඳහා සම්පූර්ණයෙන්ම පාහේ යොදාගෙන ඇත්තේ ඔහුගේ මුල් හඬයි. ඇන්ටොයින් ෆුක්වා විසින් අධ්යක්ෂණය කරන ලද මෙහි මයිකල්ගේ පියා වන ජෝ ජැක්සන්ගේ චරිතය කෝල්මන් ඩොමින්ගෝ විසින් ද, මව වන කැතරින්ගේ චරිතය නියා ලෝන්ග් විසින් ද, නීතිඥ ජෝන් බ්රැන්කාගේ චරිතය මයිල්ස් ටෙලර් විසින් ද නිරූපණය කරනු ලබයි. චිත්රපටයේ මුල් පිටපතේ ජෝඩන් චැන්ඩ්ලර් නමැති දහතුන් හැවිරිදි දරුවා විසින් මයිකල්ට එල්ල කළ අපයෝජන චෝදනා පිළිබඳව ඇතුළත් වුවද, අතීතයේදී ඇති කරගත් රහස්යතා ගිවිසුමක (NDA) නෛතික කොන්දේසි හේතුවෙන් එම චරිතය හෝ චෝදනා පිළිබඳ දර්ශන සම්පූර්ණයෙන්ම ඉවත් කිරීමට නිෂ්පාදකයින්ට සිදුවී ඇත. එමනිසා, චිත්රපටයේ අවසානය 1980 දශකයේ අගභාගයට සීමා වන පරිදි නැවත රූගත කිරීම් සිදු කර තිබේ. අධ්යක්ෂවරයා සඳහන් කරන්නේ මුදල් වෙනුවෙන් ඇතැම් පුද්ගලයින් අසත්ය චෝදනා එල්ල කළ හැකි බවත්, 2005 වසරේදී වෙනත් අපයෝජන නඩුවකින් මයිකල් ජූරියක් මගින් නිදොස් කොට නිදහස් වූ බවත්ය.
මෙම චිත්රපටය සම්බන්ධයෙන් අදහස් දක්වන බ්රිතාන්ය හා ඇමෙරිකානු සිනමා විචාරකයින් රැසක් මෙයට ලබා දී ඇත්තේ ඉතා අඩු තරු ප්රමාණයකි. ද ඉන්ඩිපෙන්ඩන්ට් (The Independent) පුවත්පතේ ක්ලැරිස් ලොෆ්රි මෙය හුදෙක් මුදල් ගරාගැනීමේ අරමුණින් කළ නිර්මාණයක් ලෙස හඳුන්වමින් එයට එක් තරුවක් පමණක් ලබා දී ඇත. ද ගාඩියන් (The Guardian) පුවත්පතේ පීටර් බ්රැඩ්ෂෝ පවසන්නේ මෙය විනාඩි 127ක පූර්ව ප්රචාරක පටයක් වැනි බවත්, මයිකල් ජැක්සන්ගේ ළමා කාලයේ ඔහු මුහුණ දුන් කටුක අත්දැකීම් හෝ ඔහුට එල්ල වූ චෝදනා කිසිවක් මෙහි නොපෙන්වන බවත්ය. ටෙලිග්රාෆ් පුවත්පතේ රොබී කොලින්ද මෙම කරුණ අවධාරණය කරමින් පවසන්නේ, චෝදනා පිළිබඳව අවම වශයෙන් හෝ ඉඟියක් ලබා නොදීම චිත්රපටයේ විශ්වසනීයත්වයට විශාල හානියක් ගෙන දෙන බවයි. බීබීසීයේ නිකලස් බාබර් මෙය නීරස රූපවාහිනී නිර්මාණයකට සමාන කර ඇති අතර, ටයිම්ස් පුවත්පතේ කෙවින් මාහර් ප්රකාශ කරන්නේ සංගීතමය දර්ශන විශිෂ්ට වුවද සම්පූර්ණ චිත්රපටය යථාර්ථයෙන් ඈත් වූ කසළ ගොඩක් වැනි බවයි.
මෙම දැඩි විවේචන මධ්යයේ වුවද, ජර්මේන් ජැක්සන්ගේ පුත්රයා මෙන්ම මයිකල්ගේ බෑණනුවන් ද වන ජාෆාර් ජැක්සන්ගේ රංගන ප්රතිභාව බොහෝ දෙනෙකුගේ පැසසුමට ලක්ව තිබේ. හොලිවුඩ් රිපෝටර් (The Hollywood Reporter) සහ වෙරයිටි (Variety) වැනි සඟරා සඳහන් කරන්නේ ජාෆාර් තම මාමාගේ චරිතයට උපරිම සාධාරණයක් ඉටු කරමින් ප්රේක්ෂකයින් මවිතයට පත් කර ඇති බවයි. ඔවුන් වැඩිදුරටත් පවසන්නේ සැබෑ රසිකයින්ට මෙය අමිහිරි අත්දැකීමක් නොවනු ඇති බවත්, මයිකල් ජැක්සන්ගේ සංගීතය සහ නර්තන විලාසය සැමරීමක් ලෙස මෙය ඉහළින්ම සාර්ථක බවත්ය. ඩෙඩ්ලයින් (Deadline) හි පීට් හැමන්ඩ් ද මෙම අදහස අනුමත කරමින් පවසන්නේ රසිකයින් සිනමාහලෙන් පිටව යන්නේ නර්තනයක යෙදෙමින් බවයි. මෑත කාලයේ එල්විස් ප්රෙස්ලි, බොබ් මාර්ලි, ක්වීන් සහ එල්ටන් ජෝන් වැනි තරු රැසකගේ ජීවිත කතා සිනමාවට නැගීමේ රැල්ලේ තවත් එක් දිගුවක් ලෙස මෙය නිර්මාණය වී ඇත. මයිකල්ගේ පුතුන් වන ප්රින්ස් සහ බිගී චිත්රපටයේ මංගල දර්ශන සඳහා සහභාගී වුවද, ඔහුගේ දියණිය වන පැරිස් එය මනඃකල්පිත ලෝකයක ජීවත් වන රසිකයින් පිනවීමක් පමණක් යැයි පවසමින් ඊට සහභාගී වීමෙන් වැළකී සිටියාය.
