දේශපාලන බලය කොතරම් ප්රබල වුවත්, මිනිස් සිරුරේ අස්ථිරභාවය ඉදිරියේ ඒ සියල්ල නිහඬ වෙයි.
සති කිහිපයකට පෙර ජීවිතයත් මරණයත් අතර තීරණාත්මක සටනකට මුහුණ දීම සඳහා සිංගප්පූරුව බලා පිටව ගිය හිටපු ජනාධිපති රනිල් වික්රමසිංහ මහතා, සාර්ථක හෘද ශල්යකර්මයකින් අනතුරුව අද (09) උදෑසන යළිත් මව්බිමට පය තැබුවේය.
ඔහුගේ සෞඛ්ය තත්ත්වය පිළිබඳව රට තුළ දැඩි කතාබහක් නිර්මාණය වූයේ 2025 වසරේ අගෝස්තු මාසයේදීය. හිටපු ජනාධිපතිවරයාගේ හෘදයේ ප්රධාන ධමනි හතරෙන් තුනක්ම සම්පූර්ණයෙන්ම පාහේ අවහිර වී ඇති බවත්, ඔහුට කඩිනම් හෘද සැත්කමක් අත්යවශ්ය බවත් කොළඹ ජාතික රෝහල විසින් අධිකරණයට වාර්තා කර තිබුණි. තත්ත්වය වඩාත් බරපතළ වූයේ වකුගඩු ආබාධයක් සහ පෙනහළු ආසාදනයක් ද ඒ වන විටත් ඔහුගේ සිරුර වෙළාගෙන තිබූ බැවිනි. මෙම දැඩි අවදානම් සහගත තත්ත්වය මැද, වැඩිදුර ප්රතිකාර සඳහා ඔහු පසුගිය මාර්තු මස 15 වැනිදා සිංගප්පූරුව බලා පිටත්ව ගියේය.
ශ්රී ලාංකික සම්භවයක් සහිත විශේෂඥ වෛද්ය සිවදාසන් මහතාගේ තියුණු ශල්යකර්ම කුසලතාවය මත වික්රමසිංහ මහතාගේ හදවතේ තිබූ දරුණු අවහිරතා සම්පූර්ණයෙන්ම පාහේ සාර්ථකව මඟහරවා ගැනීමට එහිදී හැකි විය. මෙම අසීරු සහ සංවේදී අවස්ථාවේදී මහාචාර්ය මෛත්රී වික්රමසිංහ මහත්මිය සහ ඔහුගේ සොහොයුරු චන්න වික්රමසිංහ මහතා ඔහුගේ සෙවණැල්ල මෙන් ළඟින්ම රැඳී සිටියහ. ශල්යකර්මයෙන් සතියකට පමණ පසු සාමාන්ය වාට්ටුවකට මාරු කර යැවුණු හිටපු ජනාධිපතිවරයාගේ සුවදුක් විමසීම සඳහා එක්සත් ජාතික පක්ෂයේ සභාපති වජිර අබේවර්ධන, ජාතික සංවිධායක සාගල රත්නායක සහ වජිර අබේවර්ධන මහතාගේ පුත් තීක්ෂණ අබේවර්ධන යන මහත්වරුන් ද පසුව සිංගප්පූරුවට ගොස් තිබුණි.
දශක පහකට ආසන්න කාලයක් මෙරට දේශපාලන පිටියේ නොසැලී සිටි දැවැන්ත චරිතයක්, සිය ජීවිතයේ බරපතළම සෞඛ්ය අභියෝගය ජයගෙන යළි පැමිණීම හුදු පුද්ගලික ජයග්රහණයක් පමණක් නොවේ. හෘදයේ ධමනි අවහිරතා මඟහරවා ගත් රනිල් වික්රමසිංහයන්, ඉදිරියේදී එක්සත් ජාතික පක්ෂයේ මෙන්ම රටේ දේශපාලන ගමන්මඟ තුළ පවතින අවහිරතා මඟහරවා ගැනීම සඳහා යළිත් සක්රීයව මැදිහත් වෙයිද? නැතහොත් දේශපාලන තිරයෙන් පසුබිමට වී විවේකී දිවියක් ගත කරනු ඇත්ද යන්න තවමත් ඇත්තේ අභිරහසක් ලෙසිනි.
හදවතේ සටන ජයගත් ඔහු, දේශපාලන පිටියේ මීළඟ සටනට පිවිසෙනු ඇත්දැයි නිහඬව බලා සිටීමට දැන් කාලය එළඹ තිබේ.
