ලංකා ඊ-නිව්ස් වෙබ් අඩවියේ කර්තෘ මෙන්ම ප්රවීණ මාධ්යවේදියෙකු වන දොන් ප්රදීප් සඳරුවන් සේනාධීර මහතා ඊයේ (11) පස්වරුවේ කටුනායක බණ්ඩාරනායක ජාත්යන්තර ගුවන්තොටුපොළේදී අත්අඩංගුවට පත් විය. වයස අවුරුදු 64ක් වන, ද්විත්ව පුරවැසිභාවය හිමි ඔහු එංගලන්තයේ ලන්ඩන් නුවර සිට ශ්රී ලන්කන් ගුවන් සේවයට අයත් යූ.එල්.- 504 දරන යානයෙන් පස්වරු 1.25 ට පමණ දිවයිනට පැමිණි අවස්ථාවේදී ආගමන විගමන නිලධාරීන් විසින් මෙලෙස අත්අඩංගුවට ගෙන ඇත.
ගම්පහ මහේස්ත්රාත් අධිකරණයේ විභාග වෙමින් පවතින 294/9 දරන නඩුවක් හේතුවෙන් පනවා තිබූ ගුවන් ගමන් තහනමක් මත මෙම අත්අඩංගුවට ගැනීම සිදු කර ඇති අතර, එය පෙර පැවති රජයන් සමයේ ගොනු කරන ලද නීතිමය කටයුත්තකට අදාළව සිදු වූවක් බව වාර්තා වේ. කටුනායක ගුවන් තොටුපොළ පොලිසියට භාර දීමෙන් පසු ඔහු වැඩිදුර විමර්ශන සඳහා කොළඹ කොටුව අපරාධ පරීක්ෂණ දෙපාර්තමේන්තුවට භාර දීමට නියමිතව තිබිණි.වසර දහසයකට ආසන්න කාලයක් එක්සත් රාජධානිය තුළ දේශපාලන රැකවරණ ලබමින් සිටි සේනාධීර මහතාට එලෙස රටින් බැහැර වීමට සිදු වූයේ අතීත රාජපක්ෂ පාලන සමයේදී එල්ල වූ මාරාන්තික තර්ජන හේතුවෙනි. විශේෂයෙන්ම මාධ්යවේදී ප්රගීත් එක්නැලිගොඩ අතුරුදහන් කිරීමේ සිදුවීම සහ 2011 වසරේ ජනවාරි 30 වැනිදා ලංකා ඊ-නිව්ස් ආයතනයට ගිනි තැබීම වැනි දැඩි මර්දනකාරී සිදුවීම් හමුවේ ඔහු සිය ජීවිතාරක්ෂාව පතා මෙරටින් පිටව ගියේය. විදෙස්ගතව සිටියද ඔහු ලංකා ඊ-නිව්ස් ජාලය ඔස්සේ ශ්රී ලංකාවේ ප්රජාතන්ත්රවාදය වෙනුවෙන් අඛණ්ඩව පෙනී සිටි අතර, වත්මන් ආණ්ඩුව පිහිටුවීම සඳහා ජාතික ජන බලවේගයට ද මතවාදී වශයෙන් ප්රබල සහයෝගයක් ලබා දුන් අයෙකි.
ඔහුගේ මෙම හදිසි අත්අඩංගුවට ගැනීම සම්බන්ධයෙන් අන්තර්ජාල මාධ්ය ක්රියාකාරීත්වය (IMA) විසින් සිය බලවත් කනගාටුව සහ විරෝධය ප්රකාශ කරමින් ප්රජාතන්ත්රවාදය සහ මාධ්ය නිදහස පිළිබඳව නිල නිවේදනයක් නිකුත් කර තිබේ. මෙම සිදුවීමත් සමග අතීතයේ ක්රියාත්මක වූ මාධ්ය මර්දනය සහ දේශපාලනික පළිගැනීම් නැවතත් ආරම්භ වී ඇත්දැයි යන සාධාරණ සැකය මෙරට ජනමාධ්ය ප්රජාව අතර යළිත් වරක් ජනිත වී ඇති බව එම සංවිධානය පෙන්වා දෙයි. මෙලෙස මතු වී ඇති සැකය සහ බිය තුරන් කිරීම වත්මන් රජය සතු ප්රධාන වගකීමක් බවද ඔවුන් වැඩිදුරටත් අවධාරණය කර ඇත.
සඳරුවන් සේනාධීර මහතාගේ ජීවිතාරක්ෂාව තහවුරු කිරීමේ සම්පූර්ණ වගකීම රජය විසින් භාරගත යුතු බව අන්තර්ජාල මාධ්ය ක්රියාකාරීත්වය බලධාරීන්ට සහ පොලිසියට තරයේ ප්රකාශ කර සිටී. ඔහුට එරෙහිව ක්රියාත්මක වන ඕනෑම නීතිමය පියවරක් දේශපාලන පළිගැනීම්වලින් තොර විය යුතු බවත්, එය විනිවිදභාවයෙන් යුත් සාධාරණ නීතිමය ක්රියාවලියක් බවට පත් කළ යුතු බවත් ඔවුන් ඉල්ලා සිටියි. එමෙන්ම, මාධ්යවේදීන්ගේ වෘත්තීය නිදහස සහ අදහස් ප්රකාශ කිරීමේ අයිතිය සුරකින බවට රජය විසින් ලබා දී ඇති පොරොන්දු ප්රායෝගිකව ඉටු කළ යුතු බවද එම නිවේදනයේ සඳහන් වේ. මාධ්යවේදීන් දඩයම් කළ අඳුරු යුගයක් යළි මතක් කර දෙන මෙවැනි ක්රියාමාර්ග ප්රජාතන්ත්රවාදයට දැඩි තර්ජනයක් බව පවසන එම සංවිධානය, මෙම ගැටලුවට වහාම මැදිහත් වී යුක්තිය ඉටු කරන ලෙස ආණ්ඩුවට සහ අදාළ බලධාරීන්ට දැඩිව බල කර සිටී.