බොරලැස්ගමුව ප්රදේශයේ පදිංචිව සිටින හැත්තෑ හතර හැවිරිදි විශ්රාමික බැංකු නිලධාරියෙකුට අයත් රුපියල් ලක්ෂ අසූවකට වඩා වටිනාකමකින් යුත් සුඛෝපභෝගී මෝටර් රථයක් සහ ඔහුගේ බැංකු කාඩ්පතක් රැගෙන රියැදුරෙකු පළාගොස් ඇති බව බොරලැස්ගමුව පොලිසිය පවසයි. මෙම සිදුවීමට සම්බන්ධ වී ඇත්තේ වසර දෙකක පමණ කාලයක සිට වරින් වර අදාළ බැංකු නිලධාරියා යටතේ විශ්වාසවන්ත ලෙස සේවය කළ කැස්බෑව ප්රදේශයේ පදිංචිකරුවෙකු වන රියැදුරෙකි.
රට තුළ පවතින ඉන්ධන හිඟය හේතුවෙන්, සිය මෝටර් රථයට ඉන්ධන ලබාගෙන පැමිණෙන ලෙස දැනුම් දෙමින් අදාළ විශ්රාමික නිලධාරියා විසින් පසුගිය දහසය වනදා තම රියැදුරා වෙත මෝටර් රථය සහ මුදල් ගෙවීම සඳහා ඒ.ටී.එම්. කාඩ්පත භාර දී තිබේ. ඉන් අනතුරුව කැස්බෑව ප්රදේශයේ පිහිටි ඉන්ධන පිරවුම්හලකින් රුපියල් නවදහසක මුදලකට මෝටර් රථයට ඉන්ධන ලබාගෙන ඇති බවට බැංකු නිලධාරියාගේ ජංගම දුරකථනයට කෙටි පණිවිඩයක් ද ලැබී ඇත.
එසේ ඉන්ධන ලබාගැනීමෙන් පසුව පැය ගණනාවක් ගතවුවද රියැදුරා මෝටර් රථයද රැගෙන ආපසු නොපැමිණි බැවින්, මේ සම්බන්ධයෙන් විශ්රාමික බැංකු නිලධාරියා විසින් පසුගිය දහහත් වනදා බොරලැස්ගමුව පොලිසියට නිල වශයෙන් පැමිණිල්ලක් ඉදිරිපත් කර තිබේ. මෙම සිදුවීමට අදාළව බොරලැස්ගමුව පොලිස් ස්ථානාධිපති, ප්රධාන පොලිස් පරීක්ෂක සුමේධ විමල ගුණරත්න මහතාගේ උපදෙස් මත විශේෂ පොලිස් කණ්ඩායමක් විසින් මේ වන විටත් අංශ කිහිපයක් ඔස්සේ පුළුල් විමර්ශන කටයුතු ආරම්භ කර ඇත.
