ඉරානයේ නව උත්තරීතර නායක මොජ්තබා කමේනිගේ පළමු නිල ප්රකාශය එරට රාජ්ය රූපවාහිනිය හරහා ප්රචාරය කර තිබෙන අතර, ඒ වන විටත් ඔහු දැඩි ලෙස තුවාල ලබා කෝමා තත්ත්වයක පසුවන බවට විවිධ මාධ්ය වාර්තා පළ වෙමින් පවතී. ඩොනල්ඩ් ට්රම්ප්ගේ මෙහෙයවීමෙන් දියත් කළ 'ඔපරේෂන් එපික් ෆියුරි' (Operation Epic Fury) නම් ඇමරිකානු සහ ඊශ්රායල ඒකාබද්ධ මෙහෙයුමෙන් තම පියා වන අයතුල්ලා අලි කමේනි ඝාතනයට ලක්වීමෙන් පසු පදවියට පත් වූ 56 හැවිරිදි මොජ්තබා කමේනි, මෙම ප්රකාශය නිකුත් කරන අවස්ථාවේදී කැමරාව ඉදිරියේ පෙනී සිට නැත.
ඒ වෙනුවට ඔහුගේ පණිවිඩය රූපවාහිනී ප්රවෘත්ති නිවේදකයෙකු විසින් කියවනු ලැබූ අතර, ඊට හේතුව ලෙස සැලකෙන්නේ පෙබරවාරි 28 වැනිදා එල්ල වූ ප්රහාරවලින් ඔහුටද බරපතල තුවාල සිදුවී තිබීමයි.ඔහුගේ සෞඛ්ය තත්ත්වය සම්බන්ධයෙන් තොරතුරු සපයන රහසිගත ආරංචි මාර්ග සඳහන් කරන්නේ, කමේනිගේ උදරයට හෝ අක්මාවට බරපතල හානි සිදුව ඇති බවත්, ඔහුගේ එක් පාදයක් හෝ අහිමි වී ඇති බවත්ය. අන්තර්ජාල සබඳතා අත්හිටුවා ඇති පසුබිමක වුවද ලැබී ඇති තොරතුරු අනුව, ඔහු මේ වන විට ටෙහෙරානයේ පිහිටි සීනා විශ්වවිද්යාල රෝහලේ දැඩි ආරක්ෂාවක් මධ්යයේ වෛද්ය මොහොමඩ් රේසා සෆාර්ගන්ඩිගේ අධීක්ෂණය යටතේ දැඩි සත්කාර ඒකකයේ ප්රතිකාර ලබන බව වාර්තා වේ. කෙසේ වෙතත්, ඉරාන ජනාධිපතිවරයාගේ පුත් මෙන්ම රජයේ උපදේශකයෙකු වන යූසෙෆ් පෙසෙෂ්කියන් මෙම කටකතා ප්රතික්ෂේප කරමින් ප්රකාශ කර ඇත්තේ නව උත්තරීතර නායකයා ඉතා සුරක්ෂිතව සහ නිරෝගීව පසුවන බවයි. එමෙන්ම නිව් යෝර්ක් ටයිම්ස් පුවත්පතට අදහස් දක්වා ඇති ඇතැම් නිලධාරීන් පවසා ඇත්තේ ඔහු පාදයේ තුවාල ලබා සිටියද, කෝමා තත්ත්වයක නොමැති බවත් සීමිත සන්නිවේදන පහසුකම් සහිත රහසිගත ආරක්ෂිත ස්ථානයක රඳවා ඇති බවත්ය.
රූපවාහිනිය ඔස්සේ ප්රචාරය වූ ඔහුගේ නිල නිවේදනය මගින්, ඝාතනයට ලක්වූ ඉරාන ජාතිකයින්ගේ රුධිරය වෙනුවෙන් පලිගැනීම තම ප්රමුඛතාවය බව ඔහු අවධාරණය කර ඇත. සතුරාගෙන් නිසි වන්දි ලබාගන්නා බවත්, ඔවුන් ඊට එකඟ නොවන්නේ නම් සතුරු දේපළ විනාශ කිරීමට හෝ ඒවා තම පාලනයට නතු කරගැනීමට පසුබට නොවන බවත් එම ප්රකාශයේ දැක්වේ. තවද, කලාපය තුළ පවතින සියලුම ඇමරිකානු හමුදා කඳවුරු වහාම ඉවත් කරගත යුතු බවට අනතුරු අඟවන ඔහු, ලෝකයේ ඛනිජ තෙල් සැපයුමෙන් පහෙන් එකක් ගමන් කරන හෝමුස් සමුද්ර සන්ධිය සතුරන්ට පීඩනයක් එල්ල කිරීම සඳහා අඛණ්ඩව වසා තැබීමටත් ඩුබායි වෙත ප්රහාර එල්ල කිරීමටත් තීරණය කර ඇති බව කලාපීය රටවලට දන්වා තිබේ.