මැදපෙරදිග කලාපයේ වර්තමානයේ පවතින අස්ථාවර තත්ත්වය මුල්කරගනිමින් අනවශ්ය ලෙස ඉන්ධන රැස්කර තබාගැනීමෙන් වළකින ලෙස ශ්රී ලංකා පොලීසිය මහජනතාවගෙන් දැඩි ලෙස ඉල්ලා සිටියි. කලාපීය වශයෙන් ඇති වී තිබෙන මෙම වර්ධනයන් පිළිබඳව ජනතාව තුළ පවතින බිය හේතුවෙන් ඇතැම් පිරිස් අනිසි ලෙස ඉන්ධන ගබඩා කර ගැනීමට උත්සාහ දරන බව නිරීක්ෂණය වී ඇති බව මාර්තු 01 වැනිදා පොලිස් මාධ්ය අංශය විසින් නිකුත් කරන ලද නිවේදනයක දැක්වේ.
මේ සම්බන්ධයෙන් කරුණු දක්වන ලංකා ඛනිජ තෙල් නීතිගත සංස්ථාව අවධාරණය කරන්නේ, රට තුළ ප්රමාණවත් තරම් ඉන්ධන සංචිත පවතින බැවින් කිසිදු අයුරකින් කලබලයට පත් නොවන ලෙසයි. කෙසේ වෙතත්, ඇතැම් පුද්ගලයින් සහ කණ්ඩායම් විසින් බැරල්, කෑන් ඇතුළු විවිධ බාහිර භාජන යොදාගනිමින් සංවිධානාත්මකව ඉන්ධන රැස් කිරීමට කටයුතු කරන බවට තොරතුරු වාර්තා වී ඇත. මෙවැනි ක්රියා කඩිනමින් වැළැක්වීම සඳහා ඉන්ධන පිරවුම්හල් කළමනාකාරීත්වය සමග ඒකාබද්ධව අවශ්ය පියවර ගන්නා ලෙස දිවයිනේ සියලුම පොලිස් ස්ථාන වෙත මේ වන විටත් උපදෙස් ලබා දී තිබේ.
ඒ අනුව, නැවත දැනුම් දෙන තුරු බෝතල්, කෑන් හෝ වෙනත් ඕනෑම බාහිර භාජනයකට ඉන්ධන නිකුත් කිරීම සම්පූර්ණයෙන්ම තහනම් කර ඇත. එහෙත්, ධීවර යාත්රා, කර්මාන්තශාලා, කෘෂිකාර්මික කටයුතු, සේවා ස්ථාන සහ අත්යවශ්ය ගෘහාශ්රිත අවශ්යතා වැනි නීත්යානුකූල සහ අත්යවශ්ය කරුණු සඳහා පමණක් මෙම තහනම බලනොපානු ඇත.
මෙම උපදෙස් උල්ලංඝනය කරමින් නීතිවිරෝධී ලෙස ඉන්ධන තොග රැස් කරන සහ වැඩි මිලට ඒවා අලෙවි කරමින් අනිසි ලාභ ලබන පුද්ගලයින්ට හෝ කණ්ඩායම්වලට එරෙහිව දැඩි නීතිමය පියවර ගන්නා බව පොලිස් මාධ්ය අංශය වැඩිදුරටත් අනතුරු අඟවයි. ඊට අමතරව, ඉන්ධන ලබාගැනීම සම්බන්ධයෙන් සමාජ මාධ්ය ජාලා ඔස්සේ අසත්ය සහ නොමඟ යවන සුළු තොරතුරු පතුරුවා හරින පුද්ගලයින් පිළිබඳව ද විශේෂ විමර්ශන ආරම්භ කර නීතිය ක්රියාත්මක කිරීමට පොලීසිය කටයුතු කරනු ඇත.
