දිවයින පුරා පවතින දැඩි උණුසුම් කාලගුණික තත්ත්වය හේතුවෙන් පාසල්වල පැවැත්වෙන ක්රීඩා උත්සව සහ ක්රීඩා පුහුණුවීම් සම්බන්ධයෙන් දැඩි විමසිල්ලෙන් කටයුතු කළ යුතු බවට සෞඛ්ය අංශ අනතුරු අඟවයි. කොළඹ රිජ්වේ ආර්යා ළමා රෝහලේ ශ්වසන රෝග පිළිබඳ විශේෂඥ වෛද්ය චන්න ද සිල්වා මහතා පෙන්වා දෙන්නේ, මෙම උණුසුම් කාලගුණය හමුවේ දරුවන්ගේ සෞඛ්යාරක්ෂාව තහවුරු කිරීම සහ ක්රීඩා ඉසව් සංවිධානය කිරීමේදී දැඩි අවධානයක් යොමු කිරීම අත්යවශ්ය බවයි.
ජනතාව දැනුවත් කිරීමේ අරමුණින් සෞඛ්ය හා ජනමාධ්ය අමාත්යාංශයේ ප්රධාන ශ්රවණාගාරයේදී අද (13) පැවති විශේෂ මාධ්ය හමුවකට එක්වෙමින් ඒ මහතා මේ බව අවධාරණය කළේය.විශේෂයෙන්ම උදෑසන 10.00 සිට දහවල් 1.00 දක්වා කාල සීමාව තුළ දැඩි හිරු රශ්මියක් පවතින බැවින්, එම වේලාවන්හිදී පාසල් ක්රීඩා කටයුතු හැකිතාක් අවම කිරීමට පියවර ගත යුතු බව විශේෂඥ වෛද්යවරයා මෙහිදී යෝජනා කළේය. ළමුන් එක දිගට ක්රීඩා කිරීම සඳහා කැමැත්තක් දැක්වුවද ඊට ඉඩ නොදී, කඩින් කඩ ප්රමාණවත් විවේකයක් ලබා දීම අනිවාර්ය වේ. ඊට අමතරව, දරුවන් නිරන්තරයෙන් සිසිල් සහ සෙවන සහිත ස්ථානවල රැඳවීමටත්, ඔවුන්ගේ සිරුරේ ජල ප්රතිශතය පවත්වා ගැනීම සඳහා නිතර ජලය මෙන්ම ලවණ අඩංගු පාන වර්ග ලබා දීමටත් කටයුතු කිරීම ඉතා වැදගත් බව ඔහු පෙන්වා දුන්නේය.
නිසි සෞඛ්ය උපදෙස් අනුගමනය නොකිරීමෙන් සහ ශරීරයේ උෂ්ණත්වය ඉහළ යාමෙන් දරුවන් විවිධ ශාරීරික සංකූලතාවලට ගොදුරු වීමේ දැඩි අවදානමක් පවතින බව වෛද්යවරයා සඳහන් කළේය. අධික මහන්සිය, ක්ලාන්තය සහ මස්පිඩු පෙරළීම වැනි තත්ත්වයන් මෙහිදී මූලික ලක්ෂණ ලෙස මතුවිය හැකි අතර, මෙම තත්ත්වය හඳුනා නොගෙන දරුවන්ගේ ශරීරයේ තාපය තවදුරටත් ඉහළ ගියහොත් එය තාප කම්පනය (Heatstroke) වැනි සංකීර්ණ සහ මාරාන්තික තත්ත්වයන් දක්වා වුවද වර්ධනය විය හැකිය.
යම් හෙයකින් දරුවෙකුට ක්ලාන්ත ගතියක්, හිස කැරකැවිල්ලක්, අධික තෙහෙට්ටුවක් හෝ සිහි කල්පනාව වෙනස් වීමේ ස්වභාවයක් පෙන්නුම් කරන්නේ නම්, වහාම ක්රියාත්මක විය යුතු ආකාරයද වෛද්යවරයා විසින් පැහැදිලි කරන ලදී. එහිදී පළමු පියවර ලෙස අදාළ දරුවා උණුසුම සහිත ස්ථානයෙන් ඉවත් කර සිසිල් ස්ථානයකට රැගෙන යා යුතු අතර, පානය කිරීමට හැකි තත්ත්වයක සිටී නම් ජලය ලබා දිය යුතුය. එසේ ප්රථමාධාර ලබා දීමෙන් පසුවත් අදාළ රෝගී ලක්ෂණ මඟනොහැරී දිගටම පවතින්නේ නම්, පමා නොකර දරුවා ළඟම ඇති රජයේ රෝහල වෙත ඇතුළත් කිරීමට පියවර ගත යුතු බව විශේෂඥ වෛද්ය චන්න ද සිල්වා මහතා මෙහිදී වැඩිදුරටත් අවධාරණය කර සිටියේය.