2026 විස්සයි20 ලෝක කුසලාන ක්රිකට් තරගාවලියේ සුපිරි 8 වටය යටතේ එංගලන්තය සහ පාකිස්තානය අතර පල්ලෙකැලේ ජාත්යන්තර ක්රිකට් ක්රීඩාංගණයේදී අඟහරුවාදා පැවති තරගය අතරතුරදී දෙපිලේ ප්රේක්ෂකයන් පිරිසක් අතර දැඩි උණුසුම් තත්ත්වයක් හටගත්තේය. සමාජ මාධ්ය ඔස්සේ සංසරණය වන වීඩියෝ දර්ශනවලට අනුව සවුද් නැමැති පාකිස්තානු ආධාරකරුවෙකු සහ එංගලන්ත ප්රේක්ෂකයෙකු අතර ඇති වූ බහින්බස් වීමක් පසුව දැඩි ශාරීරික ගැටුමක් දක්වා දුරදිග ගොස් තිබේ.
තත්ත්වය පාලනය කිරීම සඳහා තරගය නරඹමින් සිටි දේශීය ශ්රී ලාංකික ප්රේක්ෂකයින් කිහිප දෙනෙකුටද මැදිහත් වී ඔවුන් දෙපිරිස වෙන් කිරීමට සිදුවූ බව වාර්තා වේ.ඕස්ට්රේලියානු ජාතික සමාජ මාධ්ය ක්රියාකාරිකයෙකු වන ජේක් ජෙනින්ග්ස් විසින් මෙම ගැටුමේ වීඩියෝව අන්තර්ජාලයට මුදා හැරීමත් සමඟම මෙම සිදුවීම පිළිබඳව බොහෝ දෙනෙකුගේ අවධානය යොමු විය. මෙම තරගාවලිය තුළදී මීට පෙරද තමාට අදාළ පාකිස්තානු ප්රේක්ෂකයා මුණගැසී ඇති බව පවසන ජෙනින්ග්ස්, ඔහු නිරන්තරයෙන් මෙවැනි ගැටුම් ඇතිකරගන්නා පුද්ගලයෙකු බවට චෝදනා කරමින් ඔහුට එරෙහිව පියවර ගන්නා ලෙස ජාත්යන්තර ක්රිකට් කවුන්සිලයෙන් (ICC) ඉල්ලා සිටියේය. කෙසේ වෙතත්, සවුද් විසින් මෙම චෝදනාව ප්රතික්ෂේප කර ඇති අතර, ඔහු පවසන්නේ එංගලන්ත ආධාරකරුවන් මුලින්ම තමා වෙත පැමිණ අනිසි ලෙස හැසිරුණු බවත්, ඔවුන් තමාගේ ඇඟට බියර් ප්රහාරයක් එල්ල කිරීම හේතුවෙන් මෙම ගැටුම ආරම්භ වූ බවත්ය. කෙසේ වෙතත්, තරගාවලියේ බලධාරීන් මෙතෙක් මෙම සිදුවීම සම්බන්ධයෙන් කිසිදු නිල නිවේදනයක් නිකුත් කර නොමැත.
මෙම උණුසුම් වාතාවරණය මධ්යයේ ආරම්භ වූ තරගයේ කාසියේ වාසිය දිනා පළමුවෙන් පන්දුවට පහරදුන් පාකිස්තාන කණ්ඩායම නියමිත පන්දුවාර 20 අවසානයේ කඩුලු 9ක් දැවී ලකුණු 164ක් රැස් කිරීමට සමත් විය. විශිෂ්ට ඉනිමක් ක්රීඩා කළ ආරම්භක පිතිකරු සාහිබ්සාදා ෆර්හාන් පන්දු 45කින් ලකුණු 63ක් ලබා ගත් අතර, ලකුණු රැස් කිරීමේ වේගය වැඩිකරගැනීමට අපහසු වූ නායක බාබර් අසාම් ලකුණු 25කට දැවී ගියේය. ෆකාර් සමාන් සහ ෂඩාබ් ඛාන් ද පාකිස්තාන ඉනිමට සැලකිය යුතු දායකත්වයක් ලබා දුන් අතර, පන්දු යැවීමේදී එංගලන්තයේ ලියම් ඩෝසන් ලකුණු 24කට කඩුලු 3ක් දවා ගනිමින් කැපී පෙනෙන දස්කම් දැක්වීය.
ලකුණු 165ක ජයග්රාහී ඉලක්කයක් හඹා යෑම සඳහා පිටියට පිවිසි එංගලන්ත කණ්ඩායමට සාර්ථක ආරම්භයක් ලබා ගැනීමට නොහැකි විය. ෂහීන් ෂා අෆ්රිඩි යැවූ ඉනිමේ පළමු පන්දුවෙන්ම ෆිල් සෝල්ට් ලකුණු නොලබා දැවී ගිය අතර, ඉන් නොනැවතුණු අෆ්රිඩි වැඩි වේලාවක් යෑමට මත්තෙන් ජොස් බට්ලර් සහ ජේකබ් බෙතෙල්ගේ කඩුලු ද දවා ගැනීමට සමත් විය.
කෙසේ වෙතත්, අංක 3 පිතිකරු ලෙස පිටියට පිවිසි එංගලන්ත නායක හැරී බෘක් පන්දු 51කින් ලකුණු 100ක් රැස් කරමින් සිය මංගල විස්සයි20 ජාත්යන්තර ශතකය වාර්තා කරමින් විශිෂ්ට ඉනිමක් ක්රීඩා කළේය. පිරිමි විස්සයි20 ලෝක කුසලාන තරගයකදී ශතකයක් රැස් කළ පළමු නායකයා බවට පත්වෙමින් ඔහු තනිවම එංගලන්ත කණ්ඩායම නැවතත් ජයග්රහණය කරා රැගෙන ගිය අතර, අවසානයේදී කඩුලු 4ක් දවාගත් අෆ්රිඩිගේ යෝකර් පන්දුවක් හමුවේ බෘක් දැවී ගියේය.
ඉනිමේ අවසන් භාගයේදී එංගලන්ත පිතිකරුවන් කිහිප දෙනෙකුගේම වගකීම් විරහිත දැවී යාම් හේතුවෙන් තරගයේ අවසන් පන්දුවාරය දක්වාම දැඩි තියුණු මුහුණුවරක් දක්නට ලැබුණි. අවසන් පන්දුවාරයේදී කඩුලු 2ක් අතැතිව ජයග්රහණය සඳහා ලකුණු 3ක් අවශ්යව තිබියදී ජොෆ්රා ආචර් හතරේ පහරක් එල්ල කරමින් එංගලන්තයට ජයග්රහණය තහවුරු කළේය. ඒ අනුව පන්දුවාර 19.1කදී කඩුලු 8ක් දැවී ලකුණු 166ක් ලබාගත් එංගලන්තය පන්දු 5ක් ඉතිරිව තිබියදී කඩුලු 2ක තියුණු ජයක් වාර්තා කළේය. මෙම තරගයේ ප්රතිඵලයත් සමඟින් මෙවර තරගාවලියේ අවසන් පූර්ව වටයට සුදුසුකම් ලැබූ පළමු කණ්ඩායම බවට එංගලන්තය පත් වූ අතර, පාකිස්තානයේ අවසන් පූර්ව වටයේ බලාපොරොත්තු වෙනත් තරගවල ප්රතිඵල මත රඳා පවතින තත්ත්වයකට පත්ව ඇත. ඒ අනුව තරගාවලියේ රැඳී සිටීම සඳහා ඔවුන්ට මීළඟට පැවැත්වෙන ඔවුන්ගේ අවසන් සුපිරි 8 වටයේ තරගය ජයගැනීම අනිවාර්ය වී තිබේ.
