ජාතික අධ්යාපන ආයතනයේ හිටපු අධ්යක්ෂවරයෙකු වන අයි.ජී.එස්. ප්රේමතිලක මහතාට එරෙහිව අධිකරණයට අපහාස කිරීමේ චෝදනා ගොනු කරන ලෙස ශ්රේෂ්ඨාධිකරණය විසින් නීතිපතිවරයා වෙත නියෝගයක් නිකුත් කර තිබේ.
මෙම නියෝගය ලබා දී ඇත්තේ, මීට පෙර ඔහුට එරෙහිව ලබා දී තිබූ ශ්රේෂ්ඨාධිකරණ තීන්දුවක් නියමිත කාල සීමාව තුළ ක්රියාත්මක කිරීම පැහැර හැරීමේ සිද්ධියක් පදනම් කර ගනිමිනි.මෙම සිද්ධියට පසුබිම් වී ඇත්තේ පසුගිය 2024 වර්ෂයේ පැවැත්වුණු පහ වසර ශිෂ්යත්ව විභාගයට අදාළ ප්රශ්න පත්රයකින් ප්රශ්න තුනක් කල්තියා පිටවීමේ සිදුවීමයි. ඊට එරෙහිව විභාගයට පෙනී සිටි දරුවන්ගේ දෙමාපියන් පිරිසක් විසින් මූලික අයිතිවාසිකම් පෙත්සම් හතරක් ශ්රේෂ්ඨාධිකරණය හමුවේ ගොනු කරනු ලැබූ අතර, අදාළ පෙත්සම් විභාග කළ අධිකරණය 2024 දෙසැම්බර් මස 31 වන දින සිය අවසන් තීන්දුව ප්රකාශයට පත් කරන ලදී.
එම අවසන් තීන්දුව මගින් ශ්රේෂ්ඨාධිකරණය නියම කර තිබුණේ, මූලික මිනිස් අයිතිවාසිකම් උල්ලංඝනය වීමට වගකිව යුතු බැවින් අයි.ජී.එස්. ප්රේමතිලක මහතා රුපියල් මිලියන තුනක වන්දියක් සිය පෞද්ගලික ධනයෙන් රජයට ගෙවිය යුතු බවයි. තීන්දුව ලබාදුන් දිනයේ සිට සති හතරක කාලයක් ඇතුළත එම මුදල ගෙවා අවසන් කළ යුතු බවට ද එහිදී වැඩිදුරටත් නියෝග කර තිබුණි.
කෙසේ වෙතත්, අදාළ සති හතරක කාලය ගතවී තිබුණ ද වගඋත්තරකාර ප්රේමතිලක මහතා විසින් එම නියෝගය පරිදි කටයුතු කර නොමැති බව අද (23) දින අධිකරණය හමුවේ කරුණු අනාවරණය විය. ඒ අනුව ඔහුට එරෙහිව අධිකරණයට අපහාස කිරීමේ චෝදනාව යටතේ පියවර ගන්නා ලෙසට ඉදිරිපත් වී තිබූ ඉල්ලීමක් සලකා බැලීමෙන් අනතුරුව, විනිසුරු ප්රීති පද්මන් සූරසේන මහතා ප්රමුඛ ත්රිපුද්ගල ශ්රේෂ්ඨාධිකරණ විනිසුරු මඬුල්ල විසින් මෙම නව නියෝගය ප්රකාශයට පත් කරන ලදී.
ඒ අනුව අදාළ වගඋත්තරකරුට එරෙහිව චෝදනා ගොනු කිරීමට නීතිපතිවරයාට නියම කළ ශ්රේෂ්ඨාධිකරණය, ලබන මාර්තු මස 26 වන දින අධිකරණය හමුවේ පෙනී සිටින ලෙසට ද ප්රේමතිලක මහතාට දැනුම් දීමක් සිදු කර ඇත.