2024 වසරේ ක්රිකට් පිටියේ දැක්වූ සුවිශේෂී දක්ෂතා ඇගයීම සඳහා පවත්වනු ලබන 18 වැනි ESPNcricinfo සම්මාන උළෙල (ESPNcricinfo Awards 2025) සඳහා නිර්දේශිත නාමයන් මේ වන විට ප්රකාශයට පත් කර තිබේ. ඉයන් බිෂොප්, ෂේන් බොන්ඩ්, ටොම් මූඩි සහ ෆර්වීස් මහරුෆ් ඇතුළු විසි දෙදෙනෙකුගෙන් යුත් විනිසුරු මඩුල්ලක් විසින් මෙම ඇගයීම් සිදු කර ඇත.
පිරිමි එක්දින පිතිකරණ අංශයේ සම්මාන සඳහා ශ්රී ලංකාවේ චරිත් අසලංක, ඕස්ට්රේලියාවේ ජොෂ් ඉන්ග්ලිස්, ඇෆ්ගනිස්ථානයේ ඊබ්රාහිම් සද්රාන්, නවසීලන්තයේ රචින් රවීන්ද්ර සහ ඉන්දියාවේ රෝහිත් ෂර්මා නිර්දේශ වී සිටිති. ඕස්ට්රේලියාවට එරෙහිව කොළඹදී පැවැති පළමු එක්දින තරගයේදී ලකුණු 30කට කඩුලු 3ක් බිඳ වැටී තිබූ අසීරු අවස්ථාවක පිටියට පිවිසි අසලංක, හුදෙකලා සටනක නිරත වෙමින් ලකුණු 127ක් රැස් කළ අතර කණ්ඩායමේ මුළු ලකුණු සංඛ්යාව වූ 214න් 60%කට ආසන්න ප්රමාණයක් ඔහුගේ පිත්තෙන් වාර්තා විය. මීට අමතරව, ලාහෝර්හි පැවැති ශූරයන්ගේ කුසලාන තරගාවලියේදී එංගලන්තයට එරෙහිව ලකුණු 352ක ඉලක්කයක් හඹා යාමේදී ජොෂ් ඉන්ග්ලිස් පන්දු 86කින් ලබා ගත් නොදැවුණු ලකුණු 120 සහ එම තරගාවලියේදීම එංගලන්තයට එරෙහිව ඊබ්රාහිම් සද්රාන් පන්දු 146කට මුහුණ දෙමින් රැස් කළ ලකුණු 177 ද මෙවර සම්මාන සඳහා නිර්දේශ වී තිබේ. ශූරයන්ගේ කුසලාන අවසන් පූර්ව තරගයේදී දකුණු අප්රිකාවට එරෙහිව රචින් රවීන්ද්ර ලබා ගත් ලකුණු 108 සහ අවසන් මහා තරගයේදී ලකුණු 252ක ඉලක්කයක් හඹා යාමේදී රෝහිත් ෂර්මා පන්දු 35කින් වේගවත් ලකුණු 47ක් ලබා ගනිමින් රැස් කළ ලකුණු 76ක ඉනිම ද මෙම ලැයිස්තුවට ඇතුළත් වේ.
පිරිමි ටෙස්ට් පිතිකරණ අංශය යටතේ නිර්දේශ වී ඇති ක්රීඩකයින් වන්නේ ඒඩන් මාක්රම්, ශුබ්මන් ගිල්, ටෙම්බා බවුමා, ට්රැවිස් හෙඩ් සහ ජස්ටින් ග්රීව්ස් ය. ලෝක ටෙස්ට් ශූරතා අවසන් මහා තරගයේදී ලකුණු 282ක ඉලක්කයක් හඹා යාමේදී දකුණු අප්රිකාවේ ඒඩන් මාක්රම් ඕස්ට්රේලියාවට එරෙහිව රැස් කළ ලකුණු 136 මෙන්ම, බර්මින්හැම්හිදී එංගලන්තයට එරෙහිව ඉන්දියාවේ ශුබ්මන් ගිල් රැස් කළ දැවැන්ත ලකුණු 269ක ඉනිම ද මීට අයත් ය. කොල්කටාහි දඟ පන්දු යවන්නන්ට හිතකර තණතීරුවක ඉන්දියාවට එරෙහිව ටෙම්බා බවුමා නොදැවී ලබා ගත් ලකුණු 55, පර්ත්හිදී එංගලන්තයට එරෙහිව ට්රැවිස් හෙඩ් පන්දු 83කින් රැස් කළ වේගවත් ලකුණු 123 සහ නවසීලන්තයට එරෙහිව ක්රයිස්ට්චර්ච්හිදී පැය දහයකට ආසන්න කාලයක් පුරා පන්දුවට පහර දෙමින් බටහිර ඉන්දීය කොදෙව් ක්රීඩක ජස්ටින් ග්රීව්ස් නොදැවී රැස් කළ ලකුණු 202 මෙවර සම්මාන උළෙලේ සුවිශේෂී ටෙස්ට් ඉනිම් ලෙස හඳුනාගෙන ඇත.
මෙම වසරේ ටෙස්ට් පන්දු යැවීමේ අංශය මුළුමනින්ම වේග පන්දු යවන්නන්ගේ ආධිපත්යයට නතු වී තිබේ. ලෝක ටෙස්ට් ශූරතා අවසන් මහා තරගයේදී දකුණු අප්රිකාවට එරෙහිව ලකුණු 28කට කඩුලු 6ක් දවා ගත් පැට් කමින්ස් සහ ඕස්ට්රේලියාවට එරෙහිව ලකුණු 59කට කඩුලු 4ක් දවා ගත් කගිසෝ රබාඩා ඒ අතර පෙරමුණේ පසුවෙති. එංගලන්තයට එරෙහිව ලකුණු 104කට කඩුලු 5ක් දවා ගනිමින් ඉන්දියාවට තියුණු ජයග්රහණයක් ගෙන දුන් මොහොමඩ් සිරාජ්, පර්ත්හිදී එංගලන්තයට එරෙහිව ලකුණු 58කට කඩුලු 7ක් බිඳ හෙලූ මිචෙල් ස්ටාර්ක් සහ ඉන්දියාවට එරෙහිව ගුවහාටිහිදී ලකුණු 48කට කඩුලු 6ක් දවා ගත් මාකෝ ජැන්සන් ද ටෙස්ට් පන්දු යැවීමේ අංශයේ නිර්දේශිත නාමයන් අතරට එක්ව සිටිති.
පිරිමි එක්දින පන්දු යැවීමේ අංශයේ නිර්දේශිත ක්රීඩකයින් පස්දෙනාගෙන් සිව්දෙනෙකුගේම දක්ෂතා ශූරයන්ගේ කුසලාන තරගාවලිය මත පදනම් වී ඇත. ලාහෝර්හිදී එංගලන්තයට එරෙහිව ලකුණු 58කට කඩුලු 5ක් දවා ගත් ඇෆ්ගනිස්ථානයේ අස්මතුල්ලා ඕමර්සායි සහ ඩුබායිහිදී ඉන්දියාවට එරෙහිව ලකුණු 42කට කඩුලු 5ක් බිඳ හෙලූ නවසීලන්තයේ මැට් හෙන්රි මීට ඇතුළත් ය. ඊට අමතරව, ඉන්දියාවේ වරුන් චක්රවර්ති සහ කුල්දීප් යාදව් යන දඟ පන්දු යවන්නන් ද මීට නිර්දේශ වී තිබේ. නවසීලන්තයට එරෙහිව ලකුණු 42කට කඩුලු 5ක් දවා ගනිමින් වරුන් චක්රවර්ති දැක්වූ දක්ෂතා මෙන්ම, අවසන් මහා තරගයේදී ලකුණු 40කට කඩුලු 2ක් දවා ගනිමින් තරගයේ හැරවුම් ලක්ෂ්යය නිර්මාණය කළ කුල්දීප් යාදව්ගේ පන්දු යැවීම ද මෙහිලා ඇගයීමට ලක්ව ඇත. ශූරයන්ගේ කුසලාන තරගාවලියෙන් පරිබාහිරව මෙම ලැයිස්තුවට එක්ව ඇති එකම ක්රීඩකයා වන්නේ පාකිස්ථානයට එරෙහිව ලකුණු 18කට කඩුලු 6ක් දවා ගත් බටහිර ඉන්දීය කොදෙව් කණ්ඩායමේ ජේඩන් සීල්ස් ය.