ඇමරිකා එක්සත් ජනපදය සහ ඊශ්රායලය ඒකාබද්ධව ඉරානයේ ටෙහෙරාන් අගනුවර ඇතුළු ප්රධාන නගර දහයක් ඉලක්ක කර ගනිමින් දැවැන්ත ගුවන් ප්රහාර මාලාවක් දියත් කර තිබේ. 'ලියොන්ස් රෝර්' සහ 'එපික් ෆියුරි' යන කේත නාමයන්ගෙන් හැඳින්වෙන මෙම හමුදා මෙහෙයුම් හේතුවෙන් දකුණුදිග ඉරානයේ හෝර්මොස්ගාන් පළාතේ මිනාබ් නගරයේ පිහිටි බාලිකා පාසලකට මිසයිලයක් පතිත වීමෙන් පාසල් දැරියන් 85 දෙනෙකු ජීවිතක්ෂයට පත්ව ඇති අතර තවත් 45 දෙනෙකු පමණ තුවාල ලබා ඇත.
මෙම ප්රහාරවලින් ඉරාන ආරක්ෂක අමාත්ය අමීර් නසීර්සාදේ සහ විප්ලවීය මුරගාමී බලකායේ (IRGC) අණදෙන නිලධාරී මොහොමඩ් පක්පෝර් ජීවිතක්ෂයට පත්ව ඇති බවට විදෙස් මාධ්ය වාර්තා කර ඇතත්, ඉරාන විදේශ අමාත්යවරයා පවසන්නේ සිය ඉහළ පෙළේ නායකයින් ආරක්ෂිතව පසුවන බවයි.ඉරානයේ බැලිස්ටික් මිසයිල වැඩසටහන සම්බන්ධයෙන් න්යෂ්ටික සාකච්ඡාවලදී ඇති වූ දැඩි මතභේදාත්මක තත්ත්වය මෙම ප්රහාරයට ප්රධාන හේතුව වී ඇති අතර, ඇමරිකානු ජනාධිපති ඩොනල්ඩ් ට්රම්ප් ප්රකාශ කර ඇත්තේ ඇමරිකානු පුරවැසියන් ආරක්ෂා කිරීම සහ ඉරාන මිසයිල වැඩසටහන සම්පූර්ණයෙන්ම විනාශ කිරීම මෙහි අරමුණ බවයි. මීට ප්රතිචාර දක්වමින් ඉරානය විසින් ඊශ්රායලය සහ මැදපෙරදිග කලාපයේ පිහිටි ඇමරිකානු හමුදා කඳවුරු ඉලක්ක කර ගනිමින් මිසයිල 400කට ආසන්න ප්රමාණයක් එල්ල කර ඇති අතර, ඔවුන්ගේ ප්රහාරක ඉලක්ක අතරට එක්සත් අරාබි එමීර් රාජ්යය, සෞදි අරාබිය, කටාර්, කුවේට්, ජෝර්දානය, බහරේනය, ඊශ්රායලය, ඉරාකය සහ සිරියාව යන රටවල් නවය අයත් වේ.
ඉරානය විසින් එල්ල කරන ලද මෙම දැවැන්ත ප්රතිප්රහාර හේතුවෙන් එක්සත් අරාබි එමීර් රාජ්යයේ ඩුබායි හි පිහිටි ලොව උසම ගොඩනැගිල්ල වන බර්ජ් ඛලීෆා ගොඩනැගිල්ල අවට ප්රදේශයට ඩ්රෝන ප්රහාර එල්ල වී ඇති අතර, පාම් හෝටල් සංකීර්ණයට ද මිසයිල පතිත වී ඇති බවට වාර්තා පළ වේ. මීට අමතරව අබුඩාබි නුවරට එල්ල වූ ප්රහාරයකින් එක් පුද්ගලයෙකු මියගොස් ඇති අතර, බහරේනයේ මනාමා නුවර පිහිටි ඇමරිකානු නාවික හමුදාවේ පස්වන බලඇණිය ස්ථාපිත කර ඇති කඳවුරට සහ නේවාසික ගොඩනැගිලිවලට ද ඉරානය විසින් දැවැන්ත ඩ්රෝන සහ මිසයිල ප්රහාර එල්ල කර තිබේ. කටාර් රාජ්යයේ අල්-උදෙයිද් සහ කුවේටයේ අල්-සාලෙම් ඇමරිකානු ගුවන් කඳවුරු ද ඉරාන ප්රහාරයන්ට ලක්ව ඇති අතර, ඊශ්රායලයේ ප්රදේශ කිහිපයකටම මිසයිල සුන්බුන් පතිත වීම හේතුවෙන් එරට පාසල් සහ කාර්යාල වසා දමා හදිසි තත්ත්වයක් ප්රකාශයට පත් කර ඇත.
මෙම තත්ත්වය හමුවේ එක්සත් ජාතීන්ගේ ආරක්ෂක මණ්ඩලය හදිසි රැස්වීමක් කැඳවා ඇති අතර, ප්රංශය, රුසියාව, නෝර්වේ සහ ඕමානය ඇතුළු රටවල් රැසක් මෙම ගැටුම වහාම නතර කරන ලෙස අදාළ පාර්ශවයන්ගෙන් ඉල්ලා තිබේ. කලාපයේ උද්ගතව ඇති යුදමය වාතාවරණය හේතුවෙන් එයාර් ඉන්ඩියා, බ්රිතාන්ය ගුවන් සේවය, ලුෆ්තාන්සා සහ එමිරේට්ස් ඇතුළු ප්රධාන පෙළේ ගුවන් සමාගම් 12කට වැඩි ප්රමාණයක් මැදපෙරදිග කලාපය හරහා සිදුකරන සියලුම ගුවන් ගමන් තාවකාලිකව අත්හිටුවීමට පියවර ගෙන ඇති අතර ඩුබායි ගුවන් තොටුපළේ මෙහෙයුම් ද සම්පූර්ණයෙන්ම නවතා දමා ඇත. යේමනයේ හූති කැරලිකරුවන් ද ඊශ්රායලය ඉලක්ක කර ගනිමින් යළිත් ප්රහාර දියත් කිරීමට සූදානම් වන බවට අනතුරු අඟවා ඇති අතර, කලාපයේ සේවය කරන ඉන්දියානුවන් ඇතුළු විදේශිකයන්ගේ ආරක්ෂාව සම්බන්ධයෙන් දැඩි අවධානයක් යොමුව පවතින පසුබිමක ඉන්දියාවේ සහ ශ්රී ලංකාවේ පැවැත්වෙන 2026 T20 ක්රිකට් ලෝක කුසලානය සඳහා සහභාගී වන ක්රීඩකයින්ගේ ආරක්ෂාව තර කිරීමට ද ජාත්යන්තර ක්රිකට් කවුන්සිලය පියවර ගෙන තිබේ.
