ඉන්දීය අග්රාමාත්ය නරේන්ද්ර මෝදි මහතාගේ විශේෂ ආරාධනයකට අනුව, ශ්රී ලංකා ජනාධිපති අනුර කුමාර දිසානායක මහතා එළඹෙන පෙබරවාරි 16 වැනිදා සිට 20 වැනිදා දක්වා නවදිල්ලි නුවර පැවැත්වෙන 2026 ඉන්දු-කෘත්රිම බුද්ධි බලපෑම් සමුළුව (India–AI Impact Summit 2026) සඳහා සහභාගී වීමට නියමිතව තිබේ.
ඉන්දීය රජයේ සත්කාරකත්වයෙන් සංවිධානය කෙරෙන මෙම ජාත්යන්තර සමුළුව, කෘත්රිම බුද්ධිය පිළිබඳ ජාත්යන්තර සහයෝගීතාව උදෙසා වන ඉන්දියාවේ දැක්ම නියෝජනය කරමින් 'ජනතාව, පෘථිවිය සහ ප්රගතිය' යන ප්රධාන කුළුණු තුනක් මත පදනම්ව ක්රියාත්මක වෙයි.
තිරසාර සහ සහභාගීත්ව වර්ධනයක් ප්රවර්ධනය කිරීමෙහිලා කෘත්රිම බුද්ධියේ අනාගත කාර්යභාරය පිළිබඳව පුළුල් ලෙස සාකච්ඡා කිරීම සඳහා ගෝලීය නායකයින්, ප්රතිපත්ති සම්පාදකයින්, නවෝත්පාදකයින් සහ ක්ෂේත්රයේ ප්රවීණයන් රැසක් මෙම ඉහළ පෙළේ වේදිකාවට එක්රැස් වනු ඇත.
මෙම සමුළුව සඳහා ලෝක නායකයින් 20 දෙනෙකු පමණ සහභාගී වීමට නියමිත අතර, ජනාධිපති දිසානායක මහතාට අමතරව භූතාන අග්රාමාත්ය ෂෙරින් ටොබ්ගේ, බ්රසීල ජනාධිපති ලුයිස් ඉනාසියෝ ලූලා ද සිල්වා, ප්රංශ ජනාධිපති එමානුවෙල් මැක්රොන්, සර්බියානු ජනාධිපති ඇලෙක්සැන්ඩර් වුචික්, ස්ලෝවැකියානු ජනාධිපති පීටර් පෙලෙග්රිනි, ස්විට්සර්ලන්ත ජනාධිපති ගයි පාමලින්, නෙදර්ලන්ත අග්රාමාත්ය ඩික් ස්කූෆ් සහ එක්සත් අරාබි එමීර් රාජ්යයේ ඔටුන්න හිමි කුමරු වන කාලිඩ් බින් මොහොමඩ් බින් සයීඩ් අල් නහියන් යන රාජ්ය තාන්ත්රිකයින් ද ඊට එක්වන බව මේ වන විට තහවුරු කර තිබේ.
ඔවුන්ට අමතරව රටවල් 45කට අධික සංඛ්යාවක් නියෝජනය කරමින් අමාත්ය මණ්ඩල නියෝජිතයින්, එක්සත් ජාතීන්ගේ මහලේකම්වරයා මෙන්ම ජාත්යන්තර සංවිධාන කිහිපයකම ජ්යෙෂ්ඨ නියෝජිතයින් ද මෙම සමුළුව සඳහා සහභාගී වීමට අපේක්ෂා කෙරේ.
කෘත්රිම බුද්ධිය සඳහා වන ගෝලීය පාලන රාමු සකස් කිරීම, වගකීම් සහගත නවෝත්පාදන හඳුන්වාදීම සහ ලොව පුරා තිරසාර සංවර්ධනය වේගවත් කිරීම උදෙසා නැගී එන නව තාක්ෂණයන් ප්රායෝගිකව භාවිතා කරන ආකාරය පිළිබඳව මෙවර සමුළුවේදී ප්රධාන වශයෙන් අවධානය යොමු කෙරෙනු ඇත.