ශ්රී ලංකාව සහ ඉන්දියාව අතර පවතින බොදු දහමේ අසමසම සබඳතාවය යළිත් වරක් තහවුරු කරමින්, 2026 වසරේ පෙබරවාරි මස 02 වන දින අතිශය දුර්ලභ හා ඓතිහාසික පුණ්ය මහෝත්සවයක් ඉන්දියාවේ බිහාර් ප්රාන්තයේදී සිදුවිය. එනම්, ගෞතම බුදු සසුනේ ධුතාංගධාරීන් අතර අග්ර වූ මහා කස්සප මහරහතන් වහන්සේගේ ප්රතිමා වහන්සේ නමක් ශ්රී ලංකාවේ සිට ඉන්දියාවේ පිහිටි උන්වහන්සේ වැඩසිටි ඓතිහාසික ගුරුපාද පර්වතය හෙවත් කුක්කුට සම්පාත පර්වතය වෙත වැඩම කරවීමයි.
ශ්රී ලාංකීය බොදු ජනතාවගේ ශ්රද්ධාවත්, ඉන්දීය බෞද්ධ උරුමයේ පූජනීයත්වයත් එකට යා කරමින් සිදු කෙරුණු මෙම මහා පිංකම දෙරටේම බෞද්ධ ජනතාවගේ සාදු නාද මධ්යයේ අභිමානවත් අයුරින් නිමාවට පත් විය.බුදුරජාණන් වහන්සේ පිරිනිවන් පා වසර ගණනාවකට පසු ධර්ම විනය සංඝායනා කරමින් ශාසනයේ චිරස්තිථිය උදෙසා කැපවූ මහා කස්සප මහ රහතන් වහන්සේ, අනාගතයේ ලොව පහළ වන මෛත්රී බුදුරජාණන් වහන්සේට තම දේහය භාර දීමේ අරමුණින් මෙම කුක්කුට සම්පාත පර්වතය තුළ සමාධි සුවයෙන් වැඩ සිටින බව ශාසන ඉතිහාසයේ සඳහන් වේ. මෙවන් වූ අති පූජනීය භූමියක් වෙත ලංකාවෙන් ප්රතිමා වහන්සේ නමක් වැඩම කරවීම හුදෙක් ආගමික වතාවතක් පමණක් නොව, එය ශාසනික වශයෙන් ඉතා වැදගත් සන්ධිස්ථානයක් ලෙස සැලකේ. දුෂ්කර කඳු මාවත් ඔස්සේ, දැඩි භක්තියකින් යුතුව ශ්රී ලාංකික භික්ෂූන් වහන්සේලා සහ සැදැහැවතුන් විසින් මෙම ප්රතිමාව පර්වත මුදුනට වැඩම කරවූ දසුන කාගේත් නෙතට කඳුලක් එක් කළ සංවේදී අවස්ථාවක් විය.
මෙම පින්කම සඳහා තෝරාගෙන තිබූ කුක්කුට සම්පාත පර්වතය පිහිටා ඇත්තේ සාමාන්ය ජනාවාසවලින් ඈත්ව නිහඬ, විවේකී පරිසරයකය. තුන් පැත්තකින් කුකුළෙකුගේ පයක් ආකාරයට විහිදී ඇති ගිරි ශිඛරයන්ගෙන් සමන්විත මෙම පර්වතය තරණය කිරීම අසීරු වුවද, මහා කස්සප හිමියන් කෙරෙහි ඇති අපරිමිත ගෞරවය නිසාම වන්දනාකරුවන් මහත් වීර්යයෙන් යුතුව මෙම කටයුත්තට දායක වූහ. පෙබරවාරි 02 වන දින උදෑසන හිරු රැස් පර්වත මුදුනට වැටෙද්දී, ශ්රී ලංකාවෙන් වැඩම කරවූ ප්රතිමා වහන්සේ එම පූජනීය භූමියේ තැන්පත් කෙරුණු අතර, එහිදී පැවති විශේෂ පූජා පිංකම් මාලාවට ගිහි පැවිදි බොහෝ පිරිසක් සහභාගී වූහ.
