පුත්තලම, මහකුඹුක්කඩවල ප්රධාන වැව ආශ්රිතව නීතිවිරෝධී ලෙස කිරි ඉබ්බකු දඩයම් කළ විදේශිකයෙකු නීතියේ රැහැනට කොටු කර ගැනීමට මහකුඹුක්කඩවල පොලිසිය පසුගිය 15 වැනිදා සමත් විය. මෙලෙස අත්අඩංගුවට පත්ව ඇත්තේ වයස අවුරුදු හතළිස් එකක් වන චීන ජාතිකයෙකි.
ශ්රී ලංකාව තුළ දැඩි ලෙස සංරක්ෂිත සත්ත්ව විශේෂයක් ලෙස නම් කර ඇති කිරි ඉබ්බන් අල්ලා ගැනීමේ අරමුණින් මෙම සැකකරු ක්රියාත්මක වී ඇති බව පොලිස් විමර්ශනවලදී අනාවරණය වී තිබේ.මෙහෙයුම සිදු කරන අවස්ථාවේදී සැකකරු සතුව තිබී දඩයම් කරන ලද කිලෝග්රෑම් දෙකකට ආසන්න බරකින් යුත් ජීවමාන කිරි ඉබ්බෙකු නිලධාරීන් විසින් සොයාගෙන ඇත. ඊට අමතරව, මෙම සතුන් ඇල්ලීම සඳහා ඔහු විසින් භාවිතයට ගත් බවට සැක කෙරෙන බිලී පිති හතරක් ද පොලිස් භාරයට ගෙන තිබේ.
පොලිස් අත්අඩංගුවට පත් වූ චීන ජාතිකයා සම්බන්ධයෙන් සිදු කළ මූලික විමසීම්වලදී ඔහු පසුගිය 2023 වසරේ සිටම මදුරන්කුලිය ප්රදේශයේ පදිංචිව සිටින අයෙකු බව තහවුරු වී ඇත. එමෙන්ම, ඔහුට 2028 වසරේ මාර්තු මාසය දක්වා ශ්රී ලංකාවේ රැඳී සිටීම සඳහා නීත්යානුකූල වීසා බලපත්රයක් ද හිමිව තිබෙන බව පොලිසිය ප්රකාශ කරයි.
මහකුඹුක්කඩවල පොලිසියේ උප පොලිස් පරීක්ෂක චන්දන මහතාගේ මූලිකත්වයෙන් යුත් නිලධාරී කණ්ඩායමක් විසින් මෙම වැටලීම සිදු කර ඇත. සැකකරුට එරෙහිව තවදුරටත් පුළුල් පරීක්ෂණ මෙහෙයවා ඔහුව පුත්තලම මහේස්ත්රාත් අධිකරණය වෙත ඉදිරිපත් කිරීමට මේ වන විට පොලිසිය මගින් අවශ්ය කටයුතු සම්පාදනය කරමින් පවතී.