ශ්රී ලංකා මහ බැංකුව විසින් අද (07) දිනයට නිකුත් කරන ලද දත්තවලට අනුව, ඇමෙරිකානු ඩොලරයට සාපේක්ෂව ශ්රී ලංකා රුපියල සැලකිය යුතු ලෙස අවප්රමාණය වී තිබේ. ඒ අනුව, නිරූපිත එතැන් විනිමය අනුපාතිකය රුපියල් 310.02ක් ලෙස සටහන් වී ඇති අතර, 2024 වසරේ පෙබරවාරි මස 29 වැනිදායින් පසුව ඩොලරයක අගය රුපියල් 310 සීමාව ඉක්මවා ගිය පළමු අවස්ථාව මෙය වේ.
මේ දිනවල ඇමරිකාවේ පවතින බල අර්බුදය හේතුවෙන් ගෝලීය වශයෙන් විනිමය ඒකක රැසකට බලපෑම් එල්ල වී ඇති බව ද වාර්තා වේ.මහ බැංකුවේ දෛනික විනිමය අනුපාතික සටහනට අනුව, අද දිනයේ ඇමෙරිකානු ඩොලරයක ගැනුම් මිල රුපියල් 306.28ක් සහ විකුණුම් මිල රුපියල් 313.81ක් ලෙස වාර්තා විය. මීට පෙර මහ බැංකුව විසින් ප්රකාශ කර තිබුණේ, මේ වසරේ මේ දක්වා කාලය තුළ දී ඇමෙරිකානු ඩොලරයට සාපේක්ෂව ශ්රී ලංකා රුපියල 5.6%කින් අවප්රමාණය වී ඇති බවයි.
දේශීය වාණිජ බැංකු වල විනිමය අනුපාත දෙස අවධානය යොමු කිරීමේ දී, ඊයේ දිනයට සාපේක්ෂව අද දිනයේ ඩොලරයේ අගය බොහෝ දුරට ස්ථාවර මට්ටමක පැවති බව නිරීක්ෂණය විය. බොහෝ බැංකුවල ඩොලරයක විකුණුම් මිල රුපියල් 313ක් ලෙස සටහන්ව තිබුණ ද, මහජන බැංකුවේ ඩොලරයක ගැනුම් මිල රුපියල් 306.53ක් සහ විකුණුම් මිල රුපියල් 313.29ක් දක්වා සුළු ඉහළ යෑමක් දක්නට ලැබුණි.
අනෙකුත් වාණිජ බැංකු අතර, සෙලාන් බැංකුවේ ඩොලරයක ගැනුම් මිල රුපියල් 307.15ක් සහ විකුණුම් මිල රුපියල් 311.90ක් ලෙස වාර්තා විය. එන්.ඩී.බී. (NDB) බැංකුවේ එම අගයන් පිළිවෙළින් රුපියල් 306.75ක් සහ රුපියල් 313.25ක් ලෙස පෙර පරිදිම නොවෙනස්ව පැවතුණි. කොමර්ෂල් බැංකුවේ ඩොලරයක ගැනුම් මිල රුපියල් 304.74ක් සහ විකුණුම් මිල රුපියල් 313.25ක් ලෙස සටහන්ව තිබූ අතර, සම්පත් බැංකුව විසින් අද දිනයේ ඩොලරයක ගැනුම් මිල රුපියල් 306.75ක් සහ විකුණුම් මිල රුපියල් 313.25ක් ලෙස ප්රකාශයට පත් කර ඇත.