ශ්රී ලංකා මහ බැංකුව විසින් ‘වෙළෙඳපොළ මෙහෙයුම් වාර්තාව - 2025 දෙසැම්බර්’ ප්රකාශයට පත් කර ඇති අතර, 2025 වසරේ දෙවන භාගයේ වෙළෙඳපොළ හැසිරීම් සහ මහ බැංකුවේ මූල්ය ක්රියාමාර්ග පිළිබඳ විස්තරාත්මක විශ්ලේෂණයක් එහි අන්තර්ගත වේ. නම්යශීලී උද්ධමන ඉලක්කකරණ රාමුවක් සහ නම්යශීලී විදේශ විනිමය අනුපාතික ක්රමයක් යටතේ කටයුතු කරන මහ බැංකුව, සිය මුදල් හා විදේශ විනිමය මෙහෙයුම් පිළිබඳව වෙළෙඳපොළ පාර්ශ්වකරුවන්ගේ අවබෝධය පුළුල් කිරීමේ අරමුණින් මෙම වාර්තාව එළිදක්වා තිබේ.
2025 වසර පුරා දේශීය මුදල් වෙළෙඳපොළ තුළ අඛණ්ඩ ද්රවශීලතා අතිරික්තයක් පැවති බව මහ බැංකු වාර්තාව පෙන්වා දෙයි. මෙම අතිරික්තය සැලකිල්ලට ගනිමින්, 2025 ජනවාරි මස අග භාගයේ සිට අමතර ද්රවශීලතාවක් වෙළෙඳපොළට සැපයීම සඳහා විවෘත වෙළෙඳපොළ කටයුතු සිදු කිරීමෙන් මහ බැංකුව වැළකී සිටියේය. වසරේ පළමු භාගයේදී බරිත සාමාන්ය එක්දින මුදල් අනුපාතිකය (AWCMR) ප්රතිපත්ති පොලී අනුපාතිකය හා සමපාතව පැවතියද, බැංකු කිහිපයක් අතර ද්රවශීලතාව සංකේන්ද්රණය වීම හේතුවෙන් ජූලි මස මැද භාගයේ සිට එම අනුපාතයන් අතර යම් විෂමතාවක් හටගෙන තිබුණි. කෙසේ වෙතත්, 2026 වසරේ ජනවාරි මාසය වන විට බරිත සාමාන්ය එක්දින මුදල් අනුපාතිකය නැවතත් ප්රතිපත්ති පොලී අනුපාතිකය සමඟ සමපාත වී ඇත.
විදේශ විනිමය වෙළෙඳපොළ ක්රියාකාරිත්වය දෙස බැලීමේදී, ඉල්ලුම සහ සැපයුම මත පදනම්ව 2025 වසර තුළ ඇමරිකානු ඩොලරයට සාපේක්ෂව ශ්රී ලංකා රුපියල සුළු අගය වැඩිවීමක් පෙන්නුම් කර තිබේ. විදේශ සංචිත ගොඩනැගීම සහ විනිමය අනුපාතිකයේ අධික උච්චාවචනයන් පාලනය කිරීම අරමුණු කර ගනිමින් මහ බැංකුව දේශීය විදේශ විනිමය වෙළෙඳපොළට මැදිහත් වී ඇත. ඒ අනුව, 2025 වසර තුළ පියවීම් දින පදනම මත මහ බැංකුව විසින් ශුද්ධ වශයෙන් ඇමරිකානු ඩොලර් බිලියන 2.0ක් මිලදී ගෙන තිබේ. මෙම ක්රියාමාර්ගවල ප්රතිඵලයක් ලෙස 2025 වසර අවසාන වන විට මෙරට දළ නිල සංචිත ප්රමාණය ඇමරිකානු ඩොලර් බිලියන 6.8ක් දක්වා වර්ධනය වී ඇති අතර, එය ආර්ථික අර්බුදයෙන් පසු වාර්තා වූ ඉහළම සංචිත මට්ටම ලෙස සැලකේ.
මීට අමතරව, අන්තර් බැංකු වෙළෙඳපොළ ගනුදෙනු සාමාන්යකරණය වෙමින් පවතින බවත්, වෙළෙඳපොළ ක්රියාකාරකම්වල වර්ධනයක් දක්නට ලැබෙන බවත් මෙම වාර්තාව මගින් අනාවරණය කර තිබේ. කාලීන මාතෘකා පිළිබඳ විශේෂාංග ලිපි ද ඇතුළත් මෙම නවතම වාර්තාව මගින් මහ බැංකුවේ ප්රතිපත්ති ක්රියාමාර්ග සහ වෙළෙඳපොළ දර්ශක පිළිබඳ පුළුල් දළ විශ්ලේෂණයක් පාර්ශ්වකරුවන් වෙත ඉදිරිපත් කර ඇත.
