ජ්යෙෂ්ඨ විදේශ සේවා නිලධාරිනියක් වන ජේන් හොවෙල් මහත්මිය කොළඹ පිහිටි ඇමෙරිකානු තානාපති කාර්යාලයේ නියෝජ්ය ප්රධානී (Deputy Chief of Mission) ලෙස සිය රාජකාරි භාරගෙන තිබේ. වසර හතරකට ආසන්න කාලයක් මෙරට ඉහළම ඇමෙරිකානු රාජ්ය තාන්ත්රික නිලධාරිනිය ලෙස කටයුතු කළ වත්මන් තානාපතිනි ජුලි චංග් මහත්මිය 2026 ජනවාරි 16 වන දින ශ්රී ලංකාවෙන් පිටත්ව යාමට නියමිතය.
ඇයගේ නික්ම යාමෙන් පසුව, නව තානාපතිවරයෙකු පත් කරන තෙක් තානාපති කාර්යාලයේ වැඩ බලන ප්රධානියා (Chargé d’Affaires) ලෙස ජේන් හොවෙල් මහත්මිය ක්රියා කරනු ඇත.ජුලි චංග් මහත්මියගෙන් පුරප්පාඩු වන තානාපති ධුරය සඳහා, ධවල මන්දිරය විසින් 2025 ජූලි මාසයේදී ජ්යෙෂ්ඨ රාජ්ය තාන්ත්රික නිලධාරියෙකු වන එරික් මෙයර් මහතාව නම් කර ඇත. ඇමෙරිකානු සෙනෙට් මණ්ඩලයේ අනුමැතිය ලැබීමෙන් පසු ඔහු මෙම ධුරයේ වැඩ භාර ගැනීමට නියමිතය. එතෙක්, කොළඹ ඇමෙරිකානු තානාපති කාර්යාලයේ නායකත්වය ජේන් හොවෙල් මහත්මිය විසින් දරනු ලබයි.
නව නියෝජ්ය ප්රධානී ජේන් හොවෙල් මහත්මියට විදේශ සේවයේ පුළුල් අත්දැකීම් රාශියක් ඇත. මෑතකදී ඇය පකිස්ථානයේ සහ තුර්කියේ කොන්සියුලර් කටයුතු පිළිබඳ අමාත්ය උපදේශකවරිය ලෙස සේවය කළාය. එම රටවල තානාපතිවරුන්ගේ ආගමන හා වීසා ප්රතිපත්ති සම්බන්ධයෙන් ජ්යෙෂ්ඨ උපදේශිකාවක් ලෙස කටයුතු කළ ඇය, වාර්ෂිකව එම රටවල සංචාරය කරන දහස් සංඛ්යාත ඇමෙරිකානු පුරවැසියන් සඳහා අවශ්ය සේවාවන් සම්බන්ධීකරණය කිරීමට දායක විය. මීට අමතරව, ඝානාවේ ඇක්රා, සිම්බාබ්වේ හි හරාරේ සහ ඇෆ්ගනිස්ථානයේ කාබුල් හි කොන්සියුලර් අංශ ප්රධානියා ලෙස ද ඇය සේවය කර ඇති අතර, වොෂින්ටනයේ කොන්සියුලර් කටයුතු පිළිබඳ කාර්යාංශයේ නියෝජ්ය විධායක අධ්යක්ෂ ඇතුළු ජ්යෙෂ්ඨ තනතුරු කිහිපයක් ද හොබවා ඇත.
ශ්රී ලංකාවෙන් නික්ම යන තානාපතිනි ජුලි චංග් මහත්මිය ප්රකාශ කර සිටියේ, ශ්රී ලංකාවේ ගත කළ සෑම මොහොතක්ම තමන් බෙහෙවින් අගය කරන බවයි. ආරක්ෂක හවුල්කාරිත්වයන් ශක්තිමත් කිරීම, වෙළඳාම සහ ආයෝජන පුළුල් කිරීම මෙන්ම ප්රජාතන්ත්රවාදී වටිනාකම් ප්රවර්ධනය කිරීම තම මූලික අරමුණු වූ බව ද ඇය සඳහන් කළාය. නිදහස් හා විවෘත ඉන්දු-ශාන්තිකර කලාපයක් වෙනුවෙන් දෙරට අතර සබඳතා වර්ධනය කිරීමට හැකි වූ බව ද ඇය වැඩිදුරටත් පැවසුවාය.
2022 පෙබරවාරි මාසයේදී රාජකාරි ආරම්භ කළ ජුලි චංග් මහත්මියගේ ධුර කාලය තුළ සුවිශේෂී සන්ධිස්ථාන රැසක් වාර්තා විය. 2023 දී ඇමෙරිකා-ශ්රී ලංකා රාජ්ය තාන්ත්රික සබඳතාවලට වසර 75ක් පිරීම, 2024 දී ඇමෙරිකානු සාම බලකායේ (Peace Corps) ස්වේච්ඡා සේවකයන් නැවත පැමිණීම සහ ෆුල්බ්රයිට් වැඩසටහනේ 80 වන සංවත්සරය ඒ අතර ප්රමුඛ වේ. එසේම, 2022 ඔක්තෝම්බර් මාසයේදී 'LEED Gold' සහතිකය ලත් නව තානාපති කාර්යාල ගොඩනැගිල්ලක් ඇයගේ මූලිකත්වයෙන් විවෘත කෙරිණි. මෙය තිරසාර හා ආරක්ෂිත හවුල්කාරිත්වයක් සඳහා ඇමෙරිකාවේ කැපවීම පෙන්නුම් කරන්නකි.
ඇයගේ නායකත්වය යටතේ ශ්රී ලංකාවේ ආර්ථික පුනර්ජීවනය සඳහා ද ඇමෙරිකාවෙන් සැලකිය යුතු සහායක් ලැබිණි. ජාත්යන්තර මූල්ය අරමුදලේ පහසුකම සඳහා සහාය දැක්වීම, ආහාර සුරක්ෂිතතාව වෙනුවෙන් කෘෂිකර්ම දෙපාර්තමේන්තුව හරහා ආධාර ලබා දීම සහ 2025 දෙසැම්බර් මාසයේදී බලපෑ 'ඩිත්ව' සුළි කුණාටුවෙන් විපතට පත් වූවන් සඳහා මානුෂීය ආධාර ලබා දීම ඊට අයත් විය.
ආරක්ෂක සහයෝගීතාව වර්ධනය කිරීම අතින් ද ජුලි චංග් මහත්මියගේ ධුර කාලය ඉතා වැදගත් විය. CARAT, ATLAS ANGEL සහ Pacific Angel වැනි ඒකාබද්ධ අභ්යාස පැවැත්වීම මෙන්ම, මොන්ටානා ජාතික ආරක්ෂක බළකාය සහ ශ්රී ලංකා ආරක්ෂක අමාත්යාංශය අතර අවබෝධතා ගිවිසුමකට එළැඹීම ද සිදු විය.
