2026 පන්දුවාර 20-20 ලෝක කුසලාන ක්රිකට් තරගාවලියෙන් බංග්ලාදේශ කණ්ඩායම ඉවත් වීමට සිදුවීම සම්බන්ධයෙන් අදහස් දක්වමින් දකුණු අප්රිකානු ක්රිකට් තරුවක් වන ජොන්ටි රෝඩ්ස් පවසා සිටියේ දේශපාලනය සහ ක්රීඩාව එකිනෙකෙන් වෙන් කළ නොහැකි බවයි. ඉන්දියාවේ සංචාරය කිරීම බංග්ලාදේශ ක්රිකට් පාලක මණ්ඩලය ප්රතික්ෂේප කිරීම හේතුවෙන් ඔවුන් වෙනුවට ස්කොට්ලන්තය තරගාවලියට ඇතුළත් කිරීමට ජාත්යන්තර ක්රිකට් කවුන්සිලය ගත් තීරණයත් සමඟ මෙම සංවාදය ගොඩනැගී තිබේ.
ලබන පෙබරවාරි 7 වැනිදා සිට මාර්තු 8 වැනිදා දක්වා ඉන්දියාව සහ ශ්රී ලංකාව සම සත්කාරකත්වය දරන මෙම තරගාවලියේ ඉන්දියාවේ පැවැත්වීමට නියමිතව තිබූ සියලු තරග ආරක්ෂක හේතූන් මත එරටදී ක්රීඩා කිරීමට බංග්ලාදේශය අකමැත්ත ප්රකාශ කර තිබුණි. තමන්ගේ සියලු තරග ශ්රී ලංකාවට මාරු කරන ලෙස බංග්ලාදේශය කළ ඉල්ලීම ජාත්යන්තර ක්රිකට් කවුන්සිලය විසින් ප්රතික්ෂේප කරන ලද්දේ ස්වාධීන ආරක්ෂක ඇගයීම් මගින් ඉන්දියාවේ ක්රීඩා කිරීමට කිසිදු තර්ජනයක් නොමැති බව තහවුරු වීමෙන් පසුවය.
ප්රවර්ධන වැඩසටහනකට එක්වෙමින් රෝඩ්ස් සඳහන් කළේ පාලකයින් ක්රීඩාවෙන් දේශපාලනය ඉවත් කිරීමට උත්සාහ කළද එය සැමවිටම සාර්ථක නොවන බවත්, දකුණු අප්රිකාවේ වර්ණභේදවාදී සමයේ පැනවූ ක්රීඩා සම්බාධක එරට දේශපාලන වෙනසකට මඟ පෑදූ ආකාරය තමන් අත්දැක ඇති බවත්ය. 20-20 ක්රිකට් ආකෘතියේ පවතින සුවිශේෂීත්වය හේතුවෙන් ඕනෑම කණ්ඩායමකට ප්රබල කණ්ඩායම් හමුවේ අභියෝගයක් එල්ල කළ හැකි බවත්, මිනිත්තු දහයක් ඇතුළත එක් ක්රීඩකයෙකුට මුළු තරගයක ඉරණම වෙනස් කළ හැකි බවත් ඔහු මෙහිදී වැඩිදුරටත් අවධාරණය කළේය.
මෙම තීරණයට එළඹීමට පෙර ජාත්යන්තර ක්රිකට් කවුන්සිලය සති තුනකට වැඩි කාලයක් බංග්ලාදේශ ක්රිකට් පාලක මණ්ඩලය සමඟ සාකච්ඡා පවත්වා ඇති අතර ඉන්දියාවේ ආරක්ෂක විධිවිධාන පිළිබඳව ඔවුන්ට සියලු කරුණු පැහැදිලි කර දී තිබේ. කෙසේ වෙතත් නියමිත කාලසීමාව තුළ බංග්ලාදේශය සිය තීරණය වෙනස් නොකිරීම හේතුවෙන් ශ්රේණිගත කිරීම්වල ඉදිරියෙන්ම සිටි ස්කොට්ලන්තයට තරගාවලිය සඳහා අවස්ථාව හිමි විය.
