මහජන ආරක්ෂක සහ පාර්ලිමේන්තු කටයුතු අමාත්යාංශයේ නිල වෙබ් අඩවිය, පසුගිය මාස දෙකක කාලය තුළ අවස්ථා දෙකකදී සයිබර් ප්රහාරයන්ට ලක්ව ඇති බව අනාවරණය වී තිබේ.
මෙම සයිබර් ප්රහාර සම්බන්ධයෙන් ශ්රී ලංකා පරිගණක හදිසි ප්රතිචාර සංසදය (SLCERT) වෙත පැමිණිලි ඉදිරිපත් කර ඇති බව මහජන ආරක්ෂක සහ පාර්ලිමේන්තු කටයුතු අමාත්ය ආනන්ද විජේපාල මහතා තහවුරු කළේය. අමාත්යවරයා මාධ්ය වෙත අදහස් දක්වමින් වැඩිදුරටත් සඳහන් කළේ, අමාත්යාංශයේ වෙබ් අඩවියේ ප්රදර්ශනය කර තිබූ ශ්රී ලංකා රාජ්ය ලාංඡනය විකෘති කර තිබීම මෙම ප්රහාරයන්හි බරපතලම අංගයක් බවයි.
මෙය ඉතා බරපතළ තත්ත්වයක් ලෙස අමාත්යවරයා විසින් පෙන්වා දෙන ලදී. එසේම, රාජ්ය ලාංඡනය විකෘති කිරීමේ සිද්ධිය පිළිබඳව අපරාධ පරීක්ෂණ දෙපාර්තමේන්තුව (CID) විසින් විශේෂ විමර්ශනයක් මේ වන විටත් ආරම්භ කර ඇති බව ඔහු වැඩිදුරටත් ප්රකාශ කළේය.
වෙබ් අඩවියේ ආරක්ෂණ පද්ධති ශක්තිමත් කිරීමට සහ අනාගතයේ මෙවැනි සිදුවීම් වළක්වා ගැනීමට අදාළ තාක්ෂණික අංශ ක්රියාශීලීව කටයුතු කරමින් සිටින බව වාර්තා වේ. මේ අතර, මහජන ආරක්ෂක සහ පාර්ලිමේන්තු කටයුතු අමාත්යාංශයේ නිල වෙබ් අඩවිය වන https://pubsec.gov.lk/ මේ වන විට අක්රීය තත්ත්වයේ පවතී.
එම වෙබ් අඩවියට පිවිසෙන විට, එය තාවකාලිකව අක්රීය කර ඇති බවටත්, විමසීම් සඳහා එහි සඳහන් දුරකථන අංකය හෝ ඊමේල් ලිපිනය ඔස්සේ සම්බන්ධ වන ලෙසත් පණිවිඩයක් ප්රදර්ශනය වේ. කෙසේ වෙතත්, මෙම අක්රීය වෙබ් අඩවියේ තවමත් දැක්වෙන්නේ හැකර්වරුන් විසින් විකෘති කරන ලද ශ්රී ලංකා රාජ්ය ලාංඡනය වීම විශේෂයෙන් සැලකිය යුතු කරුණකි.
