ප්රංශයේ දරුවන්ගේ සහ යොවුන් පරපුරේ මනස ආරක්ෂා වියයුතු බව කියන එම්මානුවෙල් මැක්රොන් ජනාධිපතිවරයා, එළඹෙන සැප්තැම්බර් මාසයට පෙර වයස අවුරුදු 15ට අඩු දරුවන් සඳහා සමාජ මාධ්ය භාවිතය තහනම් කිරීමට පියවර ගන්නා බව ප්රකාශ කර තිබේ. රජය මේ වන විටත් ඒ සඳහා අවශ්ය නීතිමය ක්රියාමාර්ග සකස් කරමින් සිටින අතර, වයස අවුරුදු 15ට අඩු දරුවන්ට සමාජ මාධ්ය තහනම් කිරීමට අමතරව උසස් පාසල් තුළ ජංගම දුරකථන භාවිතය ද සම්පූර්ණයෙන්ම නතර කිරීමට තීරණය කර ඇත.
දරුවන්, දෙමාපියන් සහ ගුරුවරුන් යන සියලු පාර්ශවයන්ට පැහැදිලි වන අයුරින් මෙම නීති රීති ක්රියාත්මක කිරීමට ප්රංශ රජය බලාපොරොත්තු වේ.බටහිර රටවල් පුරා දරුවන් සමාජ මාධ්යවල අහිතකර බලපෑම්වලින් ආරක්ෂා කර ගැනීම සඳහා දැඩි නීති සම්පාදනය කිරීමේ ප්රවණතාවක් පවතින පසුබිමක ප්රංශය මෙම තීරණයට එළඹ ඇත. මීට පෙර ඕස්ට්රේලියාව ද ඓතිහාසික පියවරක් තබමින් වයස අවුරුදු 16ට අඩු දරුවන්ට ඉන්ස්ටග්රෑම්, ටික්ටොක් සහ ෆේස්බුක් වැනි සමාජ මාධ්ය ගිණුම් පවත්වාගෙන යාම තහනම් කළ අතර බ්රිතාන්ය රජය ද මේ හා සමාන දැඩි නීති පැනවීම කෙරෙහි අවධානය යොමු කර තිබේ.
මෙම නව යෝජනාවට අනුව ප්රංශයේ සමාජ මාධ්ය පරිශීලකයන් තමන්ගේ සැබෑ වයස තහවුරු කිරීම අනිවාර්ය වන අතර යුරෝපීය ඩිජිටල් සේවා පනත යටතේ එම ක්රියාවලිය දැඩි ලෙස නිරීක්ෂණය කිරීමට නියමිතය. වර්තමානයේ පවතින ක්රමය යටතේ ඕනෑම අයෙකුට උපන් දිනය ව්යාජ ලෙස ඇතුළත් කර ගිණුම් සකස් කළ හැකි වුවද, ඉදිරියේදී පරිශීලකයා වයස අවුරුදු 15ට වැඩි බවට නිසි සාක්ෂි ඉදිරිපත් කළ යුතු වේ. දරුවන් අන්තර්ජාලය හරහා සිදුවන හානිවලින් ආරක්ෂා කර ගැනීම සඳහා මෙවැනි ප්රායෝගික පියවරක් ගැනීම අත්යවශ්ය බව බලධාරීන්ගේ විශ්වාසයයි.
ඕස්ට්රේලියාවේ ක්රියාත්මක වූ සමාජ මාධ්ය තහනම හේතුවෙන් වයස අවුරුදු 16ට අඩු දරුවන් සතු සමාජ මාධ්ය ගිණුම් ලක්ෂ 47කට අධික ප්රමාණයක් අක්රිය කිරීමට හැකි වී තිබේ. දරුවන්ට නිදහසේ දරුවන් ලෙස කාලය ගත කිරීමට ඉඩ දිය යුතු බවට දෙමාපියන්ගෙන් සහ දරුවන්ගෙන්ම ලැබුණු ඉල්ලීම් සලකා බලා මෙම පියවර ගත් බව ඕස්ට්රේලියානු අගමැති ඇන්තනි ඇල්බනීස් සඳහන් කර ඇත. සමාජ මාධ්යවලින් බැහැර වන දරුවන්ට අලුත් ක්රීඩාවක් ඉගෙන ගැනීමට, සංගීත භාණ්ඩයක් වැයීමට හෝ පොත් කියවීමට යොමු වන ලෙස ඔහු එහිදී ආරාධනා කළේය.
සමාජ මාධ්ය මගින් දරුවන්ගේ මානසික සෞඛ්යයට සිදුවන හානිය පිළිබඳව ඇමරිකානු මනෝ විද්යාඥ ජොනතන් හයිට් විසින් රචිත ‘The Anxious Generation’ නමැති කෘතිය මෙම ජාත්යන්තර ප්රතිපත්ති වෙනසට ප්රබල හේතුවක් වී තිබේ. ඕස්ට්රේලියාවේ ප්රාන්ත මට්ටමින් ආරම්භ වූ මෙම නීතිමය ක්රියාවලිය පසුව ජාතික මට්ටමේ ව්යාපාරයක් දක්වා වර්ධනය වූයේ එම පොතේ අන්තර්ගත කරුණු පිළිබඳව සමාජය තුළ ඇති වූ කතිකාවත හේතුවෙනි.