වෙනිසියුලාවේ අගනුවර වන කරකස් හි සෙනසුරාදා අලුයම් කාලයේදී ප්රබල පිපිරීම් මාලාවක් සහ ගුවන් යානා පියාසර කරන ශබ්ද ඇසී ඇති බව විදෙස් මාධ්ය වාර්තා කරයි. අසල්වැසි කොලොම්බියාවේ ජනාධිපති ගුස්ටාවෝ පෙට්රෝ සමාජ මාධ්ය ඔස්සේ ප්රකාශ කර ඇත්තේ කරකස් නුවර ඉලක්ක කර ගනිමින් මිසයිල ප්රහාර එල්ල වෙමින් පවතින බවත්, මේ සම්බන්ධයෙන් වහාම ක්රියාත්මක වන පරිදි එක්සත් ජාතීන්ගේ ආරක්ෂක මණ්ඩලය කැඳවිය යුතු බවත් ය.
වාර්තා වන අන්දමට එරට වේලාවෙන් අලුයම 2.00 ට පමණ පිපිරීම් හතක් පමණ ඇසී ඇති අතර, නගරයේ දකුණු ප්රදේශයේ පිහිටි ප්රධාන හමුදා කඳවුරක් ආශ්රිත ප්රදේශයේ විදුලිය විසන්ධි වීමක් ද සිදුවී ඇත. කරකස් නගර මධ්යයේ පිහිටි ලා කාලෝටා ගුවන් හමුදා කඳවුර සහ වෙනිසියුලානු ජනාධිපති නිකලස් මදුරෝ රැඳී සිටින බවට විශ්වාස කෙරෙන ෆුවර්ටේ ටියුනා හමුදා කඳවුර දෙසින් විශාල දුමාරයක් නැග එන බව ඇසින් දුටු සාක්ෂිකරුවන් තහවුරු කර තිබේ.
මෙම හදිසි පිපිරීම් සහ ගුවන් යානා ශබ්ද හේතුවෙන් නගරයේ විවිධ ප්රදේශවල ජනතාව භීතියට පත්ව වීදිවලට පැමිණ ඇති බව ද වාර්තා වේ. මෙම සිදුවීම විස්තර කළ කාමන් හිඩැල්ගෝ නම් කාර්යාල සේවිකාවක් පවසා සිටියේ මුළු පොළොවම කම්පා වූ බවත්, ඈතින් ඇසුණු පිපිරීම් සහ ගුවන් යානා ශබ්ද හේතුවෙන් තමන් දැඩි ලෙස බියට පත් වූ බවත් ය.
මෙම පිපිරීම් සිදුව ඇත්තේ වෙනිසියුලානු ජනාධිපති නිකලස් මදුරෝ බලයෙන් පහ කිරීම සඳහා ඇමරිකා එක්සත් ජනපදය විසින් මාස කිහිපයක සිට දැඩි රාජ්යතාන්ත්රික සහ හමුදාමය පීඩනයක් එල්ල කරමින් සිටින පසුබිමක ය. ඇමරිකානු ජනාධිපති ඩොනල්ඩ් ට්රම්ප් විසින් වෙනිසියුලාවේ උතුරු වෙරළට ඔබ්බෙන් විශාල හමුදා බලඇණියක් ස්ථාපිත කර ඇති අතර, මත්ද්රව්ය ජාවාරම් මැඩපැවැත්වීමේ අරමුණින් බව පවසමින් යාත්රා ඉලක්ක කර ගනිමින් ප්රහාර කිහිපයක් ද මෑතකදී දියත් කර තිබුණි.
ඇමරිකානු සම්බාධක සහ හමුදා තර්ජන මගින් තම රජය පෙරළා දැමීමට සහ වෙනිසියුලාවේ තෙල් සම්පත අත්පත් කර ගැනීමට ඇමරිකාව උත්සාහ කරන බව ජනාධිපති මදුරෝ මීට පෙර අවස්ථා ගණනාවකදී චෝදනා කර ඇත. කෙසේ වෙතත්, සෙනසුරාදා වාර්තා වූ මෙම පිපිරීම් සම්බන්ධයෙන් වෙනිසියුලානු රජය, ධවල මන්දිරය හෝ පෙන්ටගනය මෙතෙක් කිසිදු නිල ප්රකාශයක් නිකුත් කර නොමැත.
