පසුගිය සිකුරාදා දිනයට සාපේක්ෂව අද (12) දිනයේදී අමෙරිකානු ඩොලරයට එරෙහිව ශ්රී ලංකා රුපියලේ අගය සුළු වශයෙන් ඉහළ ගොස් ඇති බව වාර්තා වන අතර බොහෝ වාණිජ බැංකුවල ඩොලරයේ විකුණුම් මිල රුපියල් 312 සීමාවේ පවතී.
සෙලාන් බැංකුවේ විනිමය අනුපාත පිරික්සීමේදී ඩොලරයේ ගැනුම් මිල රුපියල් 306.65 දක්වාත් විකුණුම් මිල රුපියල් 311.40 දක්වාත් අඩු වී ඇති ආකාරයක් දක්නට ලැබේ. එන්.ඩී.බී. (NDB) බැංකුවට අනුව ඩොලරයේ ගැනුම් මිල සහ විකුණුම් මිල පිළිවෙලින් රුපියල් 306ක් සහ රුපියල් 312.50ක් ලෙස පහත වැටී ඇති අතර මහජන බැංකුවේ ද එම අගයන් රුපියල් 305.74 (ගැනුම්) සහ රුපියල් 312.48 (විකුණුම්) ලෙස පහළ ගොස් තිබේ.
කෙසේ වෙතත්, කොමර්ෂල් බැංකුවේ සහ සම්පත් බැංකුවේ විනිමය අනුපාතවල වෙනසක් සිදුව නොමැති අතර කොමර්ෂල් බැංකුවේ ඩොලරයේ ගැනුම් මිල රුපියල් 304.24ක් ලෙසත් විකුණුම් මිල රුපියල් 312.75ක් ලෙසත් පවතී. සම්පත් බැංකුවේ ඩොලරයේ ගැනුම් මිල රුපියල් 305.75ක් සහ විකුණුම් මිල රුපියල් 312.25ක් ලෙස නොවෙනස්ව සටහන් විය. මේ අතර ශ්රී ලංකා මහ බැංකුවේ නිල දත්තවලට අනුව ඩොලරයේ ගැනුම් මිල රුපියල් 305.62 සිට 305.53 දක්වාත්, විකුණුම් මිල රුපියල් 313.16 සිට 313.07 දක්වාත් පහළ බැස ඇති අතර ගල්ෆ් කලාපීය මුදල් ඇතුළු විදේශීය මුදල් කූඩයකට සාපේක්ෂව රුපියලේ අගය සුළු වෙනස්කම්වලට භාජනය වී ඇත.
විදේශ විනිමය වෙළෙඳපොළ තත්ත්වය එසේ පවතිද්දී ලෝක වෙළෙඳපොළේ රන් මිල ඉහළ යාමට සමාන්තරව දේශීය රන් මිල ගණන්වල ද ඉහළ යාමක් පෙන්නුම් කරයි.
වෙළෙඳපොළ දත්තවලට අනුව අද දිනයේ රන් අවුන්සයක මිල රුපියල් 1,458,000ක් ලෙස සටහන් වූ අතර කැරට් 24 රන් ග්රෑම් එකක මිල රුපියල් 46,900ක් ලෙස දැක්විණි. කැරට් 22 රන් ග්රෑම් එකක් රුපියල් 42,900කට සහ කැරට් 21 රන් ග්රෑම් එකක් රුපියල් 40,900කට අලෙවි වන බව වාර්තා වේ. රන් පවුම් මිල ගණන් සැලකීමේදී කැරට් 24 රන් පවුමක් රුපියල් 375,000ක් ලෙසත් කැරට් 22 රන් පවුමක් රුපියල් 343,200ක් ලෙසත් සටහන් වී තිබේ.