බන්ධනාගාරගත කර සිටින පාකිස්ථානයේ හිටපු අග්රාමාත්ය ඉම්රාන් ඛාන්ගේ සෞඛ්ය තත්ත්වය සම්බන්ධයෙන් ඔහුගේ පක්ෂය වන පාකිස්ථාන ටෙහ්රීක්-ඊ-ඉන්සාෆ් (PTI) දැඩි අනතුරු ඇඟවීමක් නිකුත් කර තිබේ. එක්ස් සමාජ මාධ්ය ජාලය ඔස්සේ ප්රකාශයක් නිකුත් කරමින් එම පක්ෂය පෙන්වා දෙන්නේ ඉම්රාන් ඛාන්ට වහාම නිසි ප්රතිකාර ලබා නොදුනහොත් ඔහුගේ එක් ඇසක පෙනීම ස්ථිරවම අහිමි වී අන්ධභාවයට පත්වීමේ දැඩි අවදානමක් පවතින බවයි.
බන්ධනාගාර වෛද්යවරුන් විසින් සිදු කරන ලද පරීක්ෂණවලදී හෙළි වී ඇත්තේ ඔහු 'සෙන්ට්රල් රෙටිනල් වේන් ඔක්ලූෂන්' (CRVO) නමැති බරපතල රෝගී තත්ත්වයකින් පෙළෙන බව වන අතර, එය ඔහුගේ දකුණු ඇසට බලපා ඇති බව වාර්තා වේ.මෙම රෝගී තත්ත්වය සඳහා ශල්යාගාර පහසුකම් සහ විශේෂඥ වෛද්ය ප්රතිකාර අවශ්ය වුවද, ඔහු රඳවා සිටින රාවල්පින්ඩියේ අඩියාලා බන්ධනාගාර පරිපාලනය ඔහුව බන්ධනාගාරය තුළම තබාගෙන ප්රතිකාර කිරීමට උත්සාහ කරන බවට පක්ෂය චෝදනා කරයි. අඩියාලා බන්ධනාගාරයේ මෙවැනි සංකීර්ණ රෝගී තත්ත්වයකට ප්රතිකාර කිරීමට අවශ්ය පහසුකම් නොමැති බැවින්, ඔහුව වහාම පෞද්ගලික රෝහලකට හෝ ඔහු කැමති ෂෞකට් ඛානම් රෝහල වැනි උසස් පහසුකම් සහිත රෝහලකට මාරු කරන ලෙස ඉල්ලීම් ඉදිරිපත් වී ඇත. මේ අතර ඉම්රාන් ඛාන්ගේ සහෝදරියන් වන නූරීන් ඛානම් සහ අලීමා ඛානම් බන්ධනාගාරය ඉදිරිපිට විරෝධතාවල නිරත වෙමින් පවසා සිටින්නේ සිය සොහොයුරාගේ අක්ෂි රෝගය පිළිබඳව බන්ධනාගාර බලධාරීන් පවුලේ අයට නිල වශයෙන් දැනුම් දී නොමැති බවයි.
වෛද්ය විද්යාත්මකව CRVO ලෙස හඳුන්වනු ලබන්නේ ඇසේ දෘෂ්ටි විතානයේ සිට රුධිරය බැහැර කරන ප්රධාන නහරය අවහිර වීම වන අතර, මෙහිදී රුධිරය දෘෂ්ටි විතානය තුළම එකතු වීම නිසා ඉදිමීම සහ පෙනීම අහිමි වීම සිදුවේ. පැය 24 ත් 72 ත් අතර කාලයක් ඇතුළත නිසි ප්රතිකාර නොලැබුණහොත් මෙහි හානිය ස්ථිර විය හැකි බව විශේෂඥයෝ පෙන්වා දෙති. ඉම්රාන් ඛාන්ගේ පාර්ශවය චෝදනා කරන්නේ දේශපාලන පලිගැනීම් මත රජය හිතාමතාම ඔහුගේ ජීවිතය අනතුරේ හෙළන බවත්, 2024 ඔක්තෝබර් මාසයෙන් පසු ඔහුට නිසි වෛද්ය පරීක්ෂණයකට ඉඩ ලබා දී නොමැති බවත්ය. අධිකරණ නියෝග පවා උල්ලංඝනය කරමින් ඔහුගේ මූලික මානව හිමිකම් අහිමි කරන බව පවසන PTI පක්ෂය, මෙම තත්ත්වය සම්බන්ධයෙන් වහාම මැදිහත් වන ලෙස විපක්ෂ සන්ධානවලින්ද ඉල්ලා ඇත.
අගෝස්තු 2023 සිට බන්ධනාගාරගතව සිටින 71 හැවිරිදි ඉම්රාන් ඛාන්ට එරෙහිව දූෂණ සහ රාජ්ය රහස් හෙළි කිරීම ඇතුළු නඩු 100කට අධික ප්රමාණයක් පවරා ඇති අතර ඔහු දැනට වසර 14ක සිර දඬුවමක් විඳිමින් සිටී. ඉතිහාසය දෙස බැලීමේදී අතීත ඇමරිකානු ජනාධිපතිවරයෙකු වූ වුඩ්රෝ විල්සන් ද මෙවැනිම රෝගී තත්ත්වයකට මුහුණ දී ඇති බව වෛද්ය වාර්තා පෙන්වා දෙයි. විශේෂයෙන් දියවැඩියාව සහ අධික රුධිර පීඩනය වැනි රෝගී තත්ත්වයන් පවතින පුද්ගලයින් අතර මෙම CRVO රෝගය වැළඳීමේ ප්රවණතාව වැඩි බවත්, දකුණු ආසියානු කලාපයේ දියවැඩියා රෝගීන් අතර මෙය බහුලව දක්නට ලැබෙන බවත් වෛද්ය පර්යේෂණ මගින් තහවුරු වී ඇත.
