වෙනිසියුලාවේ ජනාධිපති නිකලස් මදුරෝ අත්අඩංගුවට ගැනීම සඳහා ඇමෙරිකානු හමුදාව විසින් දියත් කරන ලද මෙහෙයුමේදී 'සොනික්' (Sonic) හෙවත් අධි බලැති ශබ්ද තරංග නිකුත් කරන රහසිගත ආයුධයක් භාවිතා කර ඇති බවට බරපතල චෝදනා එල්ල වී තිබේ. නිව්යෝක් ටයිම්ස් පුවත්පත වාර්තා කරන ආකාරයට, මෙම මෙහෙයුමේදී ඇමෙරිකානු හමුදාව මින් පෙර ලොව කිසිදු යුද ගැටුමකදී දැක නොතිබූ අතිශය බලගතු ආයුධයක් භාවිතා කර ඇති අතර, එමගින් වෙනිසියුලානු ආරක්ෂක අංශ සම්පූර්ණයෙන්ම අසරණ භාවයට පත් වී ඇත.
මෙහෙයුම ආරම්භ වීමත් සමඟම තම රේඩාර් පද්ධති සියල්ල හදිසියේම අක්රීය වූ බවත්, ඉන් තත්පර කිහිපයකට පසු අහසේ ඩ්රෝන යානා විශාල ප්රමාණයක් සැරිසරනු දුටු බවත් සිද්ධිය ඇසින් දුටු වෙනිසියුලානු ආරක්ෂක නිලධාරියෙකු ප්රකාශ කර තිබේ. ඔහුගේ ප්රකාශයට අනුව ඇමෙරිකානු හමුදාව භාවිතා කළ මෙම රහසිගත උපකරණය අධික ශබ්දයක් හෝ ප්රබල තරංගයක් නිකුත් කරන්නක් වූ අතර, එය ක්රියාත්මක වූ වහාම තම හිස ඇතුළින් පුපුරා යනවා වැනි දරාගත නොහැකි වේදනාවක් දැනී ඇත. මෙම තත්ත්වය හමුවේ බොහෝ සොල්දාදුවන්ගේ නාසයෙන් රුධිරය ගලා ගිය අතර, ඇතැම් අයට රුධිරය වමනය වී සියලු දෙනා බිම ඇද වැටී නැවත නැගී සිටීමට නොහැකි තත්ත්වයකට පත්ව තිබේ.
නිව්යෝක් පෝස්ට් පුවත්පතට අනුව, මෙම අතිවිශාල බලපෑමක් ඇති කළ මෙහෙයුම සඳහා ඇමෙරිකාව භාවිතා කර ඇත්තේ හෙලිකොප්ටර් යානා අටක් පමණක් වන අතර, ඉන් ගොඩබැස ඇත්තේ සොල්දාදුවන් විස්සකට ආසන්න පිරිසකි. සංඛ්යාත්මකව අඩු වුවද, තාක්ෂණිකව ඉතා දියුණු මට්ටමක සිටි ඇමෙරිකානු භටයන් විනාඩි 30 කටත් අඩු කාලයකදී මුළු ප්රදේශයම සිය පාලනයට නතු කර ගෙන ඇත. මෙය සටනක් නොව ඒකපාර්ශ්වික ප්රහාරයක් බවත්, වෙනිසියුලානු හමුදාවේ සිය ගණනක් සිටියද ඇමෙරිකානු හමුදාවේ වේගවත් හා නිවැරදි වෙඩි තැබීම් හමුවේ ඔවුන්ට මුහුණ දීමට නොහැකි වූ බවත් වාර්තා වේ.
වෙනිසියුලානු ජනාධිපති මදුරෝ වානේ බිත්ති සහිත බලකොටුවක් වැනි අතිශය ආරක්ෂිත නිල නිවසක රැඳී සිටියද, ඇමෙරිකානු භටයන් දොර වසා ගැනීමටවත් ඉඩ නොතබා අකුණු වේගයෙන් ඇතුළු වී ඔහු අත්අඩංගුවට ගැනීමට සමත් වී ඇත. ඇමෙරිකානු හමුදාව මදුරෝගේ දින චර්යාව, ආහාර රටාව සහ සුරතල් සතුන් පිළිබඳව පවා මාස ගණනාවක් තිස්සේ අධ්යයනය කර, ඔහුගේ නිවසට සමාන ආකෘතියක් සාදා පුහුණුවීම් සිදු කර ඇති බව ජොයින්ට් චීෆ්ස් ඔෆ් ස්ටාෆ් ප්රධානී ජෙනරල් ඩෑන් කේන් සඳහන් කර තිබේ. මෙම ප්රහාරයෙන් ආරක්ෂක අංශ සාමාජිකයන් 100 දෙනෙකු පමණ මියගොස් ඇති බව වෙනිසියුලානු ස්වදේශ කටයුතු අමාත්යාංශය තහවුරු කර ඇති අතර, විශේෂඥයින් පවසන්නේ මයික්රෝවේව් හෝ ලේසර් බලශක්තිය භාවිතා කරන 'ඩිරෙක්ටඩ් එනර්ජි' ආයුධ මගින් මෙවැනි ශාරීරික හානි සිදුවිය හැකි බවයි.
මෙම සිදුවීම් මධ්යයේ ඇමෙරිකානු ජනාධිපති ඩොනල්ඩ් ට්රම්ප් තමන් වෙනිසියුලාවේ වැඩබලන ජනාධිපතිවරයා ලෙස ප්රකාශයට පත් කර ගනිමින් සමාජ මාධ්ය සටහනක් තබා ඇති අතර, 2026 ජනවාරි සිට එම ධුරය දරන බව සඳහන් කර ඇත. මදුරෝගේ පාලනය ජාත්යන්තර ආරක්ෂාවට තර්ජනයක් වීම, මත්ද්රව්ය ජාවාරම සහ සංක්රමණික ගැටළු මෙම හදිසි ක්රියාමාර්ගයට හේතු ලෙස ඇමෙරිකාව පෙන්වා දී තිබේ. වෙනිසියුලාවේ පාලනය ඇමෙරිකාව විසින් සිදු කරනු ඇති බවත්, ආරක්ෂිතව බලය හුවමාරු වන තෙක් එම කටයුතු එලෙසම පවතින බවත් ට්රම්ප් අවධාරණය කර ඇත.
නව තත්ත්වය යටතේ වෙනිසියුලාවේ තෙල් සම්පත සම්බන්ධයෙන්ද ට්රම්ප් දැඩි තීරණ ගෙන ඇති බව පෙනී යයි. අන්තර්වාර රජය විසින් උසස් තත්ත්වයේ තෙල් බැරල් කෝටි 3 ත් 5 ත් අතර ප්රමාණයක් ඇමෙරිකාවට ලබා දෙනු ඇති බවත්, එය වෙළඳපොළ මිලට අලෙවි කර ලැබෙන මුදල් ජනාධිපතිවරයා යටතේ පාලනය වන බවත් ඔහු ප්රකාශ කර තිබේ. එක්සොන් මොබිල් සහ ෂෙව්රොන් වැනි ප්රධාන තෙල් සමාගම් සමඟ සාකච්ඡා කර ඇති ට්රම්ප්, වෙනිසියුලාවේ ආයෝජනය කළ හැක්කේ කුමන සමාගම්වලටද යන්න තීරණය කරන්නේ ඇමෙරිකාව බව පවසා ඇත.
මෙම ප්රහාරයෙන් පසු ලතින් ඇමෙරිකානු රටවල් අතර දැඩි භීතියක් ඇති වී තිබෙන අතර, මෙක්සිකෝවද තම ලැයිස්තුවේ ඇති බවට ට්රම්ප් කළ ප්රකාශයත් සමඟ මෙම තත්ත්වය තවදුරටත් උත්සන්න වී තිබේ. මේ අතර, ඩොනල්ඩ් ට්රම්ප් ග්රීන්ලන්තය අත්පත් කර ගැනීම සඳහා සැලසුම් සකස් කරන ලෙස විශේෂ විධානයක් නිකුත් කර ඇති බවත්, හමුදා නිලධාරීන් එය නීති විරෝධී ක්රියාවක් ලෙස දකින බවත් අතුරු වාර්තා මගින් හෙළි වී තිබේ. වෙනිසියුලානු ජනාධිපතිවරයා සහ ඔහුගේ බිරිඳ අත්අඩංගුවට ගෙන මේ වන විට නිව්යෝක් වෙත රැගෙන ගොස් ඇත.
