මහඔය පොලිස් වසමට අයත් බෙරගල රක්ෂිතය තුළ කාන්තාවක ඝාතනය කර ඇති බවට 2026 ජනවාරි 24 වන දින පෙරවරුවේ පොලිසිය වෙත තොරතුරක් ලැබී තිබේ. ඒ අනුව වහාම ක්රියාත්මක වූ පොලිස් නිලධාරීන් එම ප්රදේශයට ගොස් මූලික විමර්ශන කටයුතු ආරම්භ කර ඇත.
මියගිය කාන්තාව වරාපිටිය ප්රදේශයේ පදිංචි 46 හැවිරිදි අයෙකු බවට මේ වන විට හඳුනාගෙන තිබේ. ඇය පසුගිය ජනවාරි 23 වන දින සවස් කාලයේ ගවයින් බැඳීම සඳහා රක්ෂිතයට ගොස් ඇති අතර, රාත්රී වන තෙක් නැවත නිවසට නොපැමිණීම හේතුවෙන් ඥාතීන් සහ ප්රදේශවාසීන් එක්ව ඇයව සෙවීමේ මෙහෙයුමක් දියත් කර ඇත. එම සෝදිසි කිරීම්වලදී රක්ෂිතයේ දොළ පහරක් අසල තිබී ඇයගේ මළ සිරුර හමුවී ඇති බව වාර්තා වේ.
සිරුර සොයාගන්නා අවස්ථාවේදී ඇයගේ ගෙල ප්රදේශයේ කැපුම් තුවාල දක්නට ලැබුණු බවත්, මෙය මනුෂ්ය ඝාතනයක් බවට පොලිසිය සැක කරන බවත් සඳහන් වේ. කෙසේ වෙතත්, මෙම ඝාතනය කුමන හේතුවක් මත හෝ කවුරුන් විසින් සිදු කරන ලද්දක්ද යන්න පිළිබඳ මෙතෙක් නිශ්චිත තොරතුරක් අනාවරණය වී නොමැත. මහේස්ත්රාත් පරීක්ෂණයෙන් අනතුරුව මළ සිරුර පශ්චාත් මරණ පරීක්ෂණ කටයුතු සඳහා අම්පාර රෝහලේ මෘත ශරීරාගාරයේ තැන්පත් කර ඇති අතර, මහඔය පොලිසිය සිද්ධිය සම්බන්ධයෙන් වැඩිදුර පරීක්ෂණ පවත්වයි.
