ස්පාඤ්ඤයේ දකුණුදිග අන්දලූසියා ප්රදේශයේ ඇඩමුස් (Adamuz) නගරයට ආසන්නයේදී අධිවේගී දුම්රිය දෙකක් එකිනෙක ගැටීමෙන් සිදුවූ දරුණු අනතුරකින් පුද්ගලයින් 39 දෙනෙකු පමණ ජීවිතක්ෂයට පත්ව තිබේ. ඉරිදා සවස සිදුවූ මෙම අනතුර ස්පාඤ්ඤයේ මෑත ඉතිහාසයේ සිදුවූ බරපතලම දුම්රිය ඛේදවාචකයක් ලෙස වාර්තා වන අතර, තවත් විශාල පිරිසක් තුවාල ලබා රෝහල් ගත කර ඇත.
වාර්තා වන ආකාරයට අනතුර සිදුව ඇත්තේ මලගා (Málaga) සිට මැඩ්රිඩ් බලා ධාවනය වෙමින් තිබූ Iryo සමාගමට අයත් දුම්රියක් පීලි පැනීමකට ලක්ව, ඊට යාබද දුම්රිය මාර්ගයට ඇතුළු වීමෙනි. එම අවස්ථාවේදී ප්රතිවිරුද්ධ දිශාවෙන් මැඩ්රිඩ් සිට හුවෙල්වා (Huelva) බලා ධාවනය වෙමින් තිබූ Renfe Alvia නම් රජයේ දුම්රිය, පීලි පැන මාර්ගය අවහිර කරමින් තිබූ Iryo දුම්රියේ ගැටී තිබේ. මෙම දරුණු ඝට්ටනය හේතුවෙන් දුම්රිය මැදිරි කිහිපයක් මාර්ගයෙන් ඉවතට විසිවී, මීටර් හතරක පමණ ප්රපාතයකට වැටී සුනුවිසුනු වී ගොස් ඇත.
අනතුර සිදුවන අවස්ථාවේ දුම්රිය දෙකෙහිම මගීන් 500කට අධික පිරිසක් ගමන් කරමින් සිට ඇති අතර, විකෘති වූ දුම්රිය මැදිරිවල යකඩ සහ ආසන අතර මගීන් සිරවී සිටි බව සහන සේවකයෝ පවසති. කෝඩෝබා හි ගිනි නිවන අංශ ප්රධානියා සඳහන් කළේ පණපිටින් සිටි පිරිස් බේරා ගැනීම සඳහා සුන්බුන් අතර තිබූ මළ සිරුරු ඉවත් කිරීමට පවා සිදුවූ බවත්, මෙය ඉතා සංකීර්ණ සහ වේදනාකාරී මෙහෙයුමක් වූ බවත්ය.
ස්පාඤ්ඤ ප්රවාහන අමාත්ය ඔස්කාර් පුඑන්ටේ මෙම සිදුවීම "අසාමාන්ය සහ පැහැදිලි කිරීමට අපහසු" එකක් ලෙස හැඳින්වූයේ, අනතුරට මූලික වූ Iryo දුම්රිය වසර හතරකටත් අඩු කාලයක් භාවිත කළ නවීන එකක් වීමත්, එය දින කිහිපයකට පෙර පරීක්ෂාවට ලක්කර තිබීමත් හේතුවෙනි. එසේම අනතුර සිදුවූ ස්ථානය දුම්රිය මාර්ගයේ ඉතා ඍජු කොටසක් බව ද අමාත්යවරයා පෙන්වා දී තිබේ. ප්රවාහන අමාත්යාංශය යටතේ ක්රියාත්මක වන නමුත් ස්වාධීන ආයතනයක් වන දුම්රිය අනතුරු විමර්ශන කොමිසම (CIAF) විසින් මේ පිළිබඳ පූර්ණ තාක්ෂණික විමර්ශනයක් මේ වන විටත් ආරම්භ කර ඇත.
විපතට පත්වූවන්ට සහ ඔවුන්ගේ ඥාතීන්ට සහාය වීම සඳහා විශේෂ මනෝවිද්යාඥ කණ්ඩායම් සහ හමුදා හදිසි ප්රතිචාර ඒකක (UME) යොදවා තිබේ. මෙම අනතුරත් සමඟ මැඩ්රිඩ් සහ අන්දලූසියා අතර අධිවේගී දුම්රිය ගමනාගමනය සම්පූර්ණයෙන්ම අත්හිටුවීමට බලධාරීන් පියවර ගෙන ඇති අතර, මියගිය සංඛ්යාව තවදුරටත් ඉහළ යා හැකි බවට සහන සේවා අංශ අනතුරු අඟවයි.
